Zawhna: Ka pu, Avil mum 30 lai ni khata ei hian taksaah eng nge effect a neih ang, chutiang hlir chuan thla khat ei ta se, emaw a aia rei pawh?

Chhanna: Avil tia kan hriat lar tak mai damdawi hi a chemical composition chu Pheniramine Maleate a ni a, thil huat (allergy) atana an hman lar ber pawl a ni awm e. Allergy damdawi tam ber hi Antihistaminic drugs tiin an sawi a. Kan taksaah hian Histamine receptors a awm a, a bik takin Histamine-1 receptor hi kan airway – hrawk leh chuap chhunga kan boruak hip luh kalkawng ah te, thisen zamah te, pumpui leh chawkawng ah te a awm a, thluak leh hnungzang a thazam hlawm (spinal cord)-ah te a awm bawk. H-1 receptor te hi eng emaw vanga hnathawk tam tura tihchet an nih chuan (eng emaw huat a awm te hian) thawkna dawt a lo zim a, chu chuan thawhah boruak kham lote a siam a (asthma attack kan tih hi), thisen zam a lo vung a, chu chuan vun vual a lo siam leh a, luak chhuak te leh ril chet nasat vanga kawthalo te a thlen bawk thin. Tin, thluak lam a effect chuan harhfim zualna te a thlen thei a ni. Avil hi chumi block-tu chu a nih vangin thawhah, vual leh luak chhuak te a control a, motor ruih ven nan te pawh an hmang tel fo. Mahse, thluak lam a effect tel thin avangin mut chhuak leh zawi te a thlen tel thin a; chuvangin, Avil damdawi ei chuan lirthei khalh loh a tha ber bawk. Naupang kum 5 hnuai lamah te, mipa upa lam prostate thangah te pek loh tur a ni.
I zawhna han chhut chian hian damdawi ngawlveina lam chi a nih duh hmel viau mai. Ni khatah engvanga mum 30 lai mai ei nge a nih ang? Chu mai ni lovin thla khat lai chutiang dose chuan a lo ei tawh tihna a nih hmel a, taksa harsatna avanga damdawi inchawh dan chu a ni lo phawt mai. Engpawhnise, avil hi hmansual a awl viau mai a; tin, Heroin addict te pawh hian an chawhpawlh fo bawk. Thluak lam a effect vang a nih hmel ber a, chuvang tak chuan hetiang a tam ni tin a ei chuan a taksa a ngaihtuahawm hle a rinawm. Engpawhnise, hetiang dose-a a lo ei tawh a nih chuan zun lamah harsatna a nei ngeiin a rinawm a (zun harsat), khawhmuh fiah lo te, bengchhet te, ka chhung ro te, thisen sang leh lungphu rang te, nungchang buai, awm hle hle thei lo, zawi ngawih ngawih, thil hmuh sual (hallucination), kawthalo deuh reng te pawh a nei fo a rinawm. Kaihte a awm theih avangin fimkhur a ngai hle. Engpawhnise, ka sawi angin hetiang zat a/i ei thin a nih chuan enkawl vat a/i mamawh tihna a ni a, Psychiatrist pan thei se a tha ber ang.
Han sawi zau ta lawk ila, Anti-allergic damdawi kan tihho - Antihistaminic drugs hi chu hrang a tam viau mai a. Kan hriat lar zingah chuan Cetirizine leh Levocetirizine te hi a ni awm e. Heng bakah hian Loratadine, Fexofenadine tih te pawh a awm bawk. Allergy nei laklawhte hi a reh mai duh lo viau a, damdawi ei chhung zawng chuan a in-control a, a hnuah a lo lang leh mai thin. Chutiang avang chuan heng damdawite hi mahni thua inchawh chuan a ngawlvei a awl duh phian a; chuvangin, doctor rawn hmasak zel thin ni thei se duhthusam a ni. Tin, damdawi reng reng chu a dose ang thlapa ei a pawimawh hle a, naupang lamah phei chuan a pawimawh lehzual. Chuvang tak chuan mahni thua damdawi ei mai mai hi chin loh a tha ber. Ruih nana an hmansual damdawi ang chi phei chu doctor prescription tel lova lei a him lo hle; naupang phei chu damdawi lei tur hian i tir lo vang u.