Hei kum 90 ka pelhna pawh thla 6 a lo liam leh ta der mai! Pathian khawngaihna azarah pang dam mah sela, a hlui ve ta hrim hrim a, hriatrengna kha hriat reng lohna a chang titih ta, ka fa neih zat hi chu ka hria, ka tu leh tuchhuan vel hi... tu pa emaw an sawi ang mai ka ni. Tuchhuan engzat nge ka neih tih hi ka mote ka zawt sek mai a, nimina ka thil zawh, min hrilh kha vawiin hian ka theihnghilh leh hman ta zel mai!

Tu pa emaw pawh hi a hauhawt khawp a, ama fate hming pawh a hre thei lo an ti. An han ninhleite hian an nun hnenah, “Nu-i, kha kha vel rawh, a upa ber atanga pathumna kha,” te a ti an ti! Fiamthu mai mai emaw ka ti thin a, a lo ni dawn miah lo! Mahni nupuite hming pawh kan theihnghilh lo chauh mai dawn a lo ni!

Aw le - Naupan lai bawk aw, kei ve hi chu ram vah - sava veh, thangkam hi ka hrat em em a, ka len deuh hnu chuan len den, sangha vuak tih hi ka uar leh bawk. Chuti e ti lo chuan sa ka la kap miah lo!Savate mai mai, thangthlenga awk rual hi chu leh sahdal ka awk ve nual tawh. Silai hi chuan ka kah len ber chu Saphairuang an tih hi ka kap ve hram! Phulraw tam avang khan ramar erawh chu ka kap ve nasa hle, ka hrat bawk a, ni khata 4/5 hawn tumte pawh ka nei ve. Phulraw rah tlan kha chu a rual an ni chawk a, an bengchheng thei khawp mai. Mahni rah tur hnahthel kha thian fai zel ila, hnai deuh atangin a kah theih. Naupan lai kha chuan, Aizawl daiah hi chuan Phuanberh, Saphut, Thingvawkpui rah tla, beltur rah tla tih angreng hi kan kam hnan ber. Tui tlan kam hi a nuam hle bawk. Nuam ka tih em em chu tui pawh awm lohna kawr tea chang khama thangthleng kam hi, Phuihnam hmin kan han chah ngei a, dawkek hi a insum zo lo ni ngei tur a ni, phuihnam chahah chuan a awk ngei ngei ti tila kan sawi sual tampui awm lo e.

Chhiartu duh tak, KA HUANG hi ka huang reng thei dawn tawh lo a ang khawp mai. Bible-ah khan, “Mihring dam chen chu kum 70 emaw, chakna avangin kum 80 pawh a ni thei,” a ti a. Pathian khawngaihna avang liau liauin hei, chu chakna avang chu kum 10 leh thla 6-in ka pel ta. Ka mit ding lam hi Glaucoma an ti emaw ni avangin a del ta der mai... En pawh a êng deuh chuang eih lo, a mim thei a, êk a nei a, chu chu mit a nihna a ni mai. Thatchhiat sa reng nak alaiin kum a’n tam phei chuan khum atanga thawha sitting room thutthlengseiah insawnin ka mu leh ringawt mai thin. Chu chu ka hna ber a ni ta mai. KA HUANG pawh hi mi dangin hung tawh maoi se ka ti.