Kum 2008 inthlan hma atanga congress party auhla ber leh chumi hnua sorkar hmalakna pui ber chu NLUP hi a ni a. Chumai a ni lo a, kum nga liam ta chhung khan NLUP bak hi hmasawnna lam hawia hmalakna lian tham dang hmuh tur leh sawi tur a vang khawp mai. Development programme a ni lo tiin a hmain lo sawi lawk mahse an kalpui dan han ngaihtuah hian hei bak development programme dang an nei lem lo rih chu a ni. Chutiang a nih lai chuan Zirtawpni a chhuak tualchhung chanchinbu hrang hrangah khan NLUP-ah thil dik lo a tam tak a awm thu chief minister-in a sawi chhuah tarlan a ni a, NLUP hi a tir angin an phur tawh loh thu a sawi phei kha chuan ngaihtuah a tithui khawp mai. Kan hriat angin NLUP hi mi tam tak sawiselna leh rinhlelhna karah 2009 atang khan bul tan a ni a, hei hi chu a hmahruai ang chauh a ni nghe nghe. Planning Commission phalnain kum 2009-10 chhunga NLUP atana sum hman tur hi state annual plan chhunga mi Cheng vbc 100 dah a ni a, chu chu budget-ah pawh tarlan a ni nghe nghe. Mahse, hmalakna mumal a awm loh avangin he NLUP sum hmahruai hi mipui hnen thleng loin department hrang hrangah an sem darh ta ringawt a. Engemaw lai phei kha chuan sawi pawh a hlawh viau a nih kha. Zep thu a awm lo a, ministry hmasa zawkah khan an tum ang leh duh angin NLUP pawisa kha sorkar laipuiin a pawm sak lawk lo a. Cabinet Committee on Economic Affairs (CCEA) in August 2010 ah khan kum nga chhunga hman tur NLUP atana sum ruahman Cheng vbc 2,873.13 chu a pawmsak ta chauh a ni. He pawisa tam tham takah hian Cheng vbc 2526.98 chu sorkar laipui tum tur a ni a, a bak Cheng vbc 346.15 erawh chu NLUP sum dawngtuten an thawh ve tur (beneficiary contrbution) a ni thung. Chuta tang chuan sorkar laipui hian kum tina state sorkar a pek thin centrally sponsored schemes leh additional central assistance atangin state annual plan hnuaiah NLUP hi a rawn pe thin a, budget-ah tarlan thin a ni. Tichuan, NLUP atana sum hmuh hmasak ber Cheng vbc 234.82 chu dawn a nih hnuah financial year tawp dawn hnai January 14,2011 khan chief minister-in NLUP hmalakna chu a hawng nghe nghe a nih kha, NLUP hmalak tan kum chu 2010-2011 a ni ta a ni. Tuna NLUP kal mek hi kum nga chhung atana ruahman a ni a, chu chu sorkar laipui pawmsak dan pawh a ni. Chuti a nih chuan kumin (2014-15) hi a kum tawp ber a lo ni ta der mai tihna a ni ang. A tir atanga tun thleng a sorkar hmalakna hrang hrangte, a dawngtute hmalak dan te leh NLUP in kan ram economy-a nghawng a neih dan te ngun taka han chhut hian a lungawithlak hmelin kan hria em? A tira kan hruaitute sawi ang kha kan thleng phak em? Ngaihdan a inang lo viau ang. Hmalak dan tura ruahman lawk dan chuan hralhsum chang thei thlai thar chhuahte chu state pawn lama thawn chhuah tur a ni ang a, chumi atana hmalatu tur Marketing Cell pawh din a ni a. Anni hian NLUP hlawhtlin vanga hralh chhuah tur thlai tharte lakkhawm leh hralh dan tur an buaipui ang a, internet hmang pawha awlsam taka an hralh zung zung theih dan tur thlengin hma an la tur a ni. Chutiang tur chuan ruahmanna hrim hrim chu fel taka siam a ni. Mahse, vawiin thleng hian NLUP vang liau liaua pawn lama hralh chhuah tham thar chhuah kan nei meuh em, tih hi zawhna awm thei tak a ni thung. Engpawhnise, a hlawhtlinna leh a hlawhchhamna sawi tur chuan a la hma deuh pawh a ni thei bawk ang. A tir lamah khan NLUP hmanga eizawnna thar ruahmansak tur hi chhungkaw 1,20,000 an ni a, hei hi a beitham deuhin kan hotute hian an hria a, an dil belh leh a. Chumi hnuah chuan NLUP dawng tur chhungkaw 15,000 dang sorkar laipuiin a pawmsak leh ta a. Tichuan NLUP hmanga eizawnna bul tanna tur sum leh tanpuina dawng tur zat chu chhungkaw 1,35,000 lai an ni dawn a ni. Heng zinga tam tak hi chuan sum leh sum ni lo thildang hi an dawng tawh a, an hmang zo tawh nghe nghe. Thenkhat chuan eizawnna bul tha takin an tan tawh laiin tam tak chuan eng ualah an chhuah lo thung. A hnuhnung zawkte zingah hian chhuanlam nei tha tak tak pawh an tam bawk. Engpawhnise, hetiang khawpa ram hmasawnna tura project lian tham hi a hlawhtling dawn nge hlawhtling dawn lo, tiin mipuiin kan thlir thup a. Kan ram hruaitu lu berte ka atangin NLUP hi Pathian program a nih thu te, a hlawhchham a nih chuan mipui thiam loh a nih tur thu te kan hre fo thin. A nih leh hlawhtling ta se tute nge nge fak hlawh ang? Tun thlenga an kalpui tawh chinah chuan a hlawhtlinna an sawi apiangin sorkar fakna a ri tel thin a, dik lo taka thiltite chungah hremna an lek pawhin fak hlawh an phut bawk. Chutihlaiin, ruahmanna fel tak nena hmalak a nih laia a hlawhchham a nih chuan mipui ni loin sorkar bawk hian mawh a phur ngam tur a ni dawn lo'm ni? A pawimawh ber zawk chu kan ram hruaitu lu ber tawngkam atang hian NLUP hlawhtlinna tur hian tanlak a ngai takzet tih a lang a, a la tawp hma hauha beidawn nghal mai chi a ni lo. Mahse, kum tela lo nei an tlem tial tial lai hian eizawnna tlo leh tha zawk NLUP hian a siam chhuak lo a nih chuan a tawpa a tuartu tur chu kut hnathawktute hi an ni dawn. Politics a lo beidawng fo tawh an nih avangin a rilru put hmang tur pawh sawi thiam a har viau ang a, chief minister leh ram hruaituten beiseina sang tak an lo siamsak tawh hnu a NLUP hi a hlawhchham leh si a nih chuan an retheih tur zia leh a rilru hnual tur zia hi sawiin a siak lo ang. - Lalthlamuana Ralte