Tunlai chu NLUP hlawhchham thu leh NECS in Cheng vbc 1.26 chuang VAT an awl chungchang hian sawi a hlawh rih viau mai a. Sawi hlawh awm reng pawh a ni ve ve. Kan hriat angin NLUP hi sorkar hmalakna pui ber (flagship programme) a ni a, a chheh velah hian thu dik leh dawt hriat hran theih loh leng vel a tam hle a. A pawisa hi a tir lamah kha chuan prime minister special package atanga hmuh tur niin rorel lai party lamin an sawi a, mahse, a tak takah chuan state sum bawma mi hman thin a lo ni reng. Sorkar laipuiin state annual plan (pawisa) a rawn pek zinga tel a ni a, kan state budget sum hman a ni, ti pawhin a sawi theih awm e. Mahse, pawisa an rawn pek dan tak hi chiang kuang taka sawi fiah leh puan zar a ni ngai lo a. CSS leh CS atanga sum lokal thin kha sorkar laipuiin NLUP atan a rawn chhung khawm ta tih pawh kan hre lem lo a. Centrally sponsored scheme (CSS) hi sorkar laipuiin state sorkar hmalakna hrang hrang atana pawisa an rawn pek thin a ni a, a pung awm chi te, state sorkarin a do let ve ngai chi te a ni hlawm. CSS hi state sorkarten hma thar lakna hrang hrang atana an innghahna ber a ni nghe nghe a, Mizoramah pawh kan hre lar khawp mai. Thil danga tangkai taka hman thin CSS leh CS sum Cheng vbc 2873.13 zet NLUP atan hman a ni. NLUP tum pawimawh tak chu tlangram lo neitute an eizawnna ban san tir a, eizawnna hlawk zawk leh ngel nghet zawk siam sak a ni. Mahse, hei hi a hlawhchham chiang viau. NLUP kalpui chhung hian tlangram lo neih hmun zau zawng a tlahniam hle a, lo neitu zat pawh an tlem rawk a ni. Kum 2010-11 leh kum 2014-15 inkar hian tlangram lo neihna hmun zau zawng hectare 28,562 atangin hectare 20,064 ah a tlahniam a, hemi chhung bawk hian lo neitu pawh 68,433 atangin 60,338 in an tlem bawk. Chumi awmzia chu lo neitu 14% chauhin an ban san a, NLUP tum bulpui ber a hlawhchham hle tihna a nih chu. Tun thleng hian lo neih hi eizawnna pui a la nih reng avangin NLUP hi a la hlawhtling lo tih hi phat rual a ni lo a, lo neih ban sante pawh hian eizawnna ngel nghet leh hlawk zawk an nei zui ta vek kher loin a rinawm bawk. CAG report-ah hian NLUP thil tum hrang hrang a la hlawhtlin loh zia tarlan a ni a. NLUP-in a tum dang leh chu kan chaw rinpui ber buh a intodelh tura leilet siam belh zel a ni a. Kum nga (2011-12 leh 2015-16) chhung khan buh thar chhuah 52,894 MT atangin 61,977 MT (20%) in a pung a, leilet a buh thar pawh nasa takin a pung bawk. Chutihlaii, NLUP tum ber pakhat buh a intodelh erawh a la hla hle thung. Tun thleng hian kan mamawh buhfai 70% vel hi state dang atanga chawk luh a la ni reng. NLUP thil tum langsar tak ramngaw siam belh chungchangah pawh a taka hmalak a la ni lo a, hemi atan hian sum dah a la ni lo a, a buaipuitu tur NLUP Committee on Afforestation pawhin bul an tan dawn ek ek chauh a ni. State pum atanga chhut a ramngaw zau zawng 38% atanga 80% a tihpun tumna pawh a la hlawhchham rih bawk. NLUP sum enkawl dan hi a felfai lo viau bawk a, sum tam la hman loh tam tak civil deposit-ah leh bank account-ah dah a ni a. Chungte chu hman tawh anga tarlan a ni lawi si hi thil fel lo tak a ni a. Tul lem lo a sum hman a tam hle bawk. Trade hrang hrang a sum dawngtute hmalak dan vil zui mumal loh a tam hle a, a dawngtu tam takin an trade an thlak thul, a hun chhung (kum nga chhung atana ruahman a ni a) liam tawh mahse a hlawhtlinna hmuh tur a vang hle a ni. NLUP hlawhchham chungchang baka tunlaia sawi lar tak mai chu sorkarin Aizawl Football Club vanga (a neitu) NECS in chhiah an chawi tur Rs 1,26,63,418 (Cheng vbc 1.2) zet a awltir hi a ni. RTI Act hmanga hemi chungchang zawhna Taxation department chhanna pawh kar hnih liam ta (May 21) khan kan ziak tawh a. A hmaa tarlan tawh angin VAT hi indirect tax a ni a, bungraw hralhnaah lak a ni a, a petu tak chu a leitu an ni. Sumdawngte hian VAT an chhun luh hian an hlep atanga an chhun luh ni loin mipuiin an thil zawrh an lei ruala chhiah an pek tel tling khawm kha a ni zawk. Ama'rawhchu, VAT paih hnu a hlep hnem duh vangin sumdawngte hian tihniam turin sorkar an nawr fo thin a. A nihna takah chuan VAT tihhniam a nih hian thil leitu (mipui) chhiah pek tur a tlem sawt tihna a ni a, thil man a tlawm sawt tur a ni. Chhiah awl leh ngaihnathiam hi dil an awm fo a, entry tax phei chu dil an tam hle thin. Nikum July khan Mizoram Liquor Vendor Association pawhin Taxation minister hnenah lehkha theh lutin kum 2015-16 chhunga VAT awl turin an ngen a. MIFCO hian zu an zuar a, anni pawh hian September 2015 khan an zu zawrh (retail margin of liquor) atanga chhiah awl an lo dil tawh a, mahse phalsak an ni lo a. Nikum January thla khan an dil nawn leh bawk. Mizoram anga state pachhia tan chuan Cheng vbc 1.26 hi a uihawm tham khawp a, kan economy a la derthawng bawk a, sumdawng zingah kum khata heti zat chhiah chhung lut thei hi an tam lo. RTI Act hmanga zawhna department lamin an chhannaah kum nga kal ta chhung 2012-13 leh 2016-17 inkar hian sorkarin NECS bakah VAT a awltir dangte chu PHE department hnuaia Greater Khawzawl Water Supply Scheme tum khat awltir an ni a, UD&PA department hnuaiah Rajiv Awas Yajona (RAY) pilot project schemes a an work contract a VAT pek tur awltir an ni bawk. Department lam hian mipui tangkaipui tur (public interest) anih avangin MVAT Act a Section 47 tlawh chhana awltir an nih thu an tarlang a. Mahse, football club pakhat vanga sorkarin NECS chhiah a awltir hi mipui nawlpui tana a tangkaina tur sawi tur a vang ngawt ang. Induhsakna hleihluak a awmna sorkar leh mi hausate thiltihtheihna sorkar hi sorkar tha a ni ngai lo. Kum 2016-17 chhunga NECS-in VAT an awlna hna (works) hi 19 lai a ni a, heti zat tum khata hna lian an thawk hi a mak khawp mai, an hna zawng zawng project amount belhkhawm hi Rs 116,96,68,310 lai a ni a. Tun hnaia Vanglaini tarlan danin NECS proprietor & chief managing director Robert Romawia Royte-in commissioner, taxation department hnenah Aizawl FC vanga VAT awl dilna a thlen chu taxation minister Pu Lalsawta'n midangin an sawisel theih thu leh contract hnathawkte phei chuan an sawisel a hlauh thu leh zir chian phawt a duh thu a ziak a. Chu lehkha chu parliamentary secretary Pu K.S.Thanga hnenah thawn a ni a, ani thung chuan 'pawmpui ni se' (for approval pls) tih ziah belhin minister-ah a thawn leh a. Minister hian thil thui tak a ngaihtuah a, a pawmpui theih loh thu leh phalsak ni ta se contractor tam takin an thik anga an rawn dil ve sup sup tur thu a ziak a. Minister leh parliamentary secretary-te thu a inhmu lo viau a, thil a kal zel a, a tawi zawngin sawi ta ila, finance minister leh finance commissioner (taxation) ten VAT awltir ngawt mai hi tul an ti lo a, mahse, parliamentary secretary hian awltir turin a ziak leh tho a. Minister leh parliamentary secretary ngaihdan a inang lo a, a tawpah chuan chief minister-in (parliamentary secretary duh dan angin) NECS chu chhiah a awltir ta nge nge a ni. Politics zawng pawhin hetianga thil kal vel hi a ngaihnawm phian a ni. Mak deuh chu he chhiah awltir chungchangah hian eptu party lam an ngawi leh diak a, sorkar thutlukna mak tak mai hi sawi leh sel reng reng an awm lo. Chutihlaiin, rorel lai party chhungkuaah hian a ruka phun sep sep an tam hle a, tlem lai deuh phei kha chuan NECS in contract hna an hmu tam bik lutuk hi committee meeting-ah sawi chhuak an awm a, mahse amah tantu minister lawk ber pakhat chuan an party fund a pek tam thu a sawi a ni awm e. Engpawhnise, he ramah hian sorkar tha, dik, fel hlel taka mi hausa vulh liantu ni lo mi harsate chawikangtu sorkar, dik tak leh fel taka thuneihna hmang thinten an hruai sorkar kan mamawh khawp mai. Kan ram hruaitu fel tak takte pawh hi tang zel teh se.