Tlai lam dár nga a pel det a. Khawpui lùn laia infiamna hmun (indoor stadium) atang chuan inkhêl zo hlim hlawt tih hriat tak thian dùn—Andy leh Lenny-a te chu an rawn chhuak thlan hluam a. Tui vawt leh cold drinks vawt zawrhna dàwr lam an pan ding nghâl a.

An pahnih chuan tui bottle, litre chanve chu an tlâk thuai mai. An chhãwl chu a la hãl hle a ni chék ang chu; dàwrkai chu no lian (mug)-a energy drinks thli tùrin an ti zui zat a. Tìtì pahin dàwr kawtah chuan ding chungin an khiat dùn ta a.

Chutia thil an in lai chuan zu rui pakhat, kal hlei thei lo hian anni thian dùn chu a rawn su thut mai. An no-a an thil in lai chu a rawn sut buaksak titih! Chu zu ruipa chu a thianten an kai hrang nghal thuai a; mahse, a thil tih buak, man neia Andy-te thian dùnin an lei, energy drinks bua chu ruh chi ziazáng a ni si lo! Andy thin chu a ter ta at a. Mahse, Lenny-a chu a ngawi ngal thung. 

"Engati nge i ngawih reng a!? Hei, kan no chanve lai mai min tih buaksak hi i hmu ve lo em ni?’ tiin a Lenny-a chu lungawi lo Andy-a chuan a ti hrep a. Lenny-a chuan muangchangin, ‘Ka hmu ve tho alãwm. Min tih buaksak vek loa a làwmawm ngawt a nia. Hei, no chanve vêl tal in tùr kan la nei alãwm,’ a ti ta mai a!

Hmãnlai hian zirna in sáng taka rilru lam zirtirtu sáng (psychological professor) hian a dàn ngai tê-a zirlaite a zirtír zawh rual chuan an zirlaibu khup tùrin a hrilh a. Zirtírna dawhkànah chuan no a rawn chhawp chhuak thut mai! A chhúngah chuan tui, no chanve vêl àwm tùr chu a thli zui a.

Zirlaite chuan a zawhna ngai bawk, ‘He no-a tui awm zât hi no chanve-a khat lo nge a niha no chanve-a khat?’ tia a zawh leh an ring sup hlawm. Mahse, tûn tum chu an ring sual chhiava chiang e!

Ka kuta ka ken lai no-ah hian tui a awm a; no hi engtia rit nge a niha in rin hlawm le?’ tiin an zirtirtupa chuan a zâwt ta thut mai!

Zirlaite chuan an inrinsiak nak nak hlawm a. A chhànna dik tak niàwm rêng an hre fuh thei si lo—‘risk’ ngawt loh chuan! 

Zirtirtupa chuan heti hian a sawi ta a: ‘A rih záwng chu he no-a tui awm leh a no rihna tak tak lam a ni lo e,’ tiin.

Sawi zawm zêl a: ‘He no-a tui awm, ken thuta zãng tak rih záwng hi a kengtu azira chhût ngai a ni. A kengtu ken rei leh rei loh lamin he no rih záwng hi a hril zâwk ang. Minute chanve lek ka ken chuan a zãng hle ang a; mahse, darkár khat ka ken chuan a rit viau tawh ang,’ a ti ta mai a!

No chanve thlírtute chuan ngaih dàn chi hnih an nei fo—a kiam lam thlírtu leh a la awm zât thlírtu. Keini ve hi le? Kan beisei ang, kan hisâp lâwk anga thil a kal loh hian ‘A chanve a bo hmak!’ tia indawm kun mai chíng mi nge kan niha, ‘E khai! A chanve dang ka la nei tho e!’ tia kan thil chàn lam aia kan la chan awmchhun lungawipui thiam mi kan ni zâwk?

Lungawina leh hlimnate hi, beih chiama neih chi a ni ngawt lo fo—kan ban phaka inchhawp reng atanga dawn theih thil a ni cháwk. Tam tak hi chu kan rilru hrisèl dàn azira ni tina kan neih theih a ni ve a nia! Chu chu kan hai fo a; sum leh pai, building chhàwng sáng, phone chhuak thar, lirthei changkãngah te leh thil dang dangah lungawina hi kan zawng thin. Lungawina awmna chu kan rilru, khawvêl kan thlìr dànah a awm zâwk thin a ni si a.

Professor leh zirlaite ‘case’ pawh khi … no chanve thu-hla tho a ni. Rilru hrehawm leh beidawng dáwna kan inhriatna chhan ni bera ka hriat chu—min ti natu kan hriat reng thin vàng a ni! 

Kan tahna leh kan natnate hi chhût chiang ta ila—kan nat tan lai aia a tûka kan nat fé zâwkna chhan te hi … A chhànna mãwl tak chu—kan hriat renga kan vulh len thin vàng a ni.

Sâwtna tùr leh ziaawmpuina tùra rilru kan sèn thu ka sawi lo e—mite min sawi dàn … lei ka batnaten ka bat zât min thìn dàn type … ka bialpa ex-ina min tih el vêl dàn … tih te leh chhan tam tak vàngin kan lungngai fo. Mahse, kan tahna hi keimahni vêk hian kan vulh lian thin a, tah zui châkawm khawp hian keimahni leh keimahni hi kan infuihpawrh fo mai a. A chunga Professor kan sawi ang khian, zan khua leh a tûk niléng thleng thlengin no kan keng thin a—a tìra zãng tak kha, ken reng tâkah chuan a tûkah a lo rit tawh thin a ni!

Pangngai reng chu no a ni; pangngai lo erawh chu, no kengtu keimahni hi! Bán a kham hmaa thil ritsak tùr chu dah mai thiam hi kan zir a lo va’n ngai tak êm!