Zawhna: Covid-19 hi nupa khum khata mu, pakhat positive a, pakhat dang negative tlat lawi si thin hi, Blood group inan loh vang nge chhan dang vang ni ang?

Chhanna: Covid-19 hri hi a thar (Novel coronavirus an tih chhan) a nih ang hian kan hriat chin pawh a danglam fo mai a. A tir lamah boruak atangin a inkai theih loh/kaina chance a tlem, thil kan khawiha a hrik kan khawih atang chauhin a inkai theihte an han ti zet a, a hnu lamah boruak atangin a inkai theih (airborne) ngei tihte an sawi leh hnuhnawh bawk a. Room khata meeting ho theuh theuh zingah pawh a then kai, a then kai chuang lo an awm leh bawk a. A test-na kan hman ber, RtPCR leh RAgT te lah 100% a accurate a ni chuang lo bawk a, hri kai ngei kai lo anga test result nei (false negative) te pawh kan awm ngei ang; chutiangin hri kai lo kai anga result nei (false positive) pawh an awm ngei bawk ang.

Zirchianna kal mek reng a ni a. Tun china kan hriatah chuan Blood group lam chu a kai hma bik emaw, kai duh bik emaw han sawi tur chiang taka documented a awm hrih lo niin a lang (research thenkhatah erawh sawi lan awm mah se a nawlpui anga pawm a ni hran lo; chuvangin, “possible link” tih tawngkamte pawh an hmang). Kan hriat chinah erawh chuan immune-compromised an tih mai, taksa natna do chak lo – cancer damlo chemotherapy la laite, HIV+ te, kidney emaw liver transplant damlote hi hri kai awlsam bik anga ngaih chu an ni. Covid kai ve lo, an chhungte positive enkawl ngaite zingah pawh kai lo an awm ve leh nawlh thin bawk. Kan la hriat belh zel turah ngai phawt ang.