Nu leh pa chawimawi dan chu an thuawih hi a ni tih hi kan sawi len ber a ni. Chawimawi dan langsar ber leh tha ber a ni reng a. Kawng dang hi hriat a har fu. Pangpar thi han awrhtir ni tin emaw a rem si lo. Nu leh pa chawimawi dan awlsam te te, hman mai theih tam tak zingah tlem azawng kan ‘titi’ ang e.

Hun harsa leh dinhmun khirh tak te, thlemna hautak tak lo thlen laitea duhthlanna dik leh rintlak i siam thin kha i nu leh pa i chawimawi theihna sang berte zinga mi a ni. Puitlin huna duhthlanna dik an siam theihna tura naupang lo enkawl hi nu leh pa mawhphurhna a ni si a.

Ni tina i thil tawna i hlawhtlinna leh hun hlimawmte i hrilh siam siam thin kha chawimawina a ni. Ngaihnawm an ti a, an hlim thin si a. Anmahnia rinna nghatin an hriat chak em em i hna chungchang te, i rilru te, i hmathlir te, i ruahmannate i hrilh a, i sawipui khan nuam an ti. Chawimawina a ni. An tel lo leh an hriat loh pawhin thil tam tak i ti thei ngei ang; mahse, han rawn der la, han hrilh ve la, an tan chuan ‘pangpar thi’ a ni asin!

Thilpek chhete tal engemaw i pek kha chawimawina a ni. An pianchamah emaw, an ni pawimawh bik emaw i hriatsaka chibai i buk thin kha chawimawina a ni.

Inhauh leh intihtauh nihkhuaa an ngaihdamna i va dil leh thei kha chawimawina a ni. Thinrim chang a awm ngai. Nu leh pa biak duh loh rengte hi a mawi lo. Thinrim fe hnua a be hmasatua i tan lehte kha chawimawina a ni.

I laka an thil tih tawh hrang hrang avanga an chunga lawmthu i sawi hi chawimawina a ni. An titi ngaithla a, an nuihza siam i nuihpui kha chawimawina a ni.

An hlawhtlinna leh dinhmun hlenchuah tawhte chhuang tak, chapopui si loa mi bula i sawi thin kha chawimawina a ni. Mi zinga sawi dan awm tawk erawh zir ve a ngai. An thusawi hlimawm tak leh chhinchhiahtlak, a fiamthute thlenga i sawichhawn kha chawimawina a ni. Chanchin ngaihnawm sawi tur an neih loh pawh a, an chanchin chhe lam i sawi duh miah loh kha chawimawina a ni. I nupui, i pasal bulah pawh i tan tlatte kha chawimawina a ni.

I zinna atanga i phone emaw, lehkha emaw thawna i chanchin i va hrilh a, an chanchin i ngaihven kha chawimawina a ni. I chhuah dawna i kalna tur i hrilh te, i haw hun awm i hrilh te, i tum anga i awm chiah theih loh tuma i chinchang i va hrilh zelte kha chawimawina a ni.

Harsatna i tawh tuma an thurawn i lak kha chawimawina a ni. Nu leh pa hnen aia mi dang hnena thlen hmasak hi a fuh ber lo. I nu leh pa laka thlen ngam loh tur harsatnaah inhamhnawk lo thung la.

I zirlai tha taka i tih a, i hna tha taka i thawh a, nungchang mawi tak i neih a, mite faktlaka i awm khan i nu leh pa i chawimawi a ni. “Saw saw a va fel reuh ve, tu fa nge maw ni le?” tih hi miin an inzawt ziah si a.

Nu leh pa sawi bik tur nei lo tan tu pawh, kan laka nu leh pa zia (ngilnei, duattu, rinawm leh rintlak, zilhtu leh fuihtu, thlamuantu, hmangaihtu) tilangtu apiang kha chawimawi mai tur a ni.

Mi nu leh pa i awt thin maw? Mahni nu leh pa neih chhun chawimawi thiam lo chuan mi nu leh pa pawh va nei thei ta tehreng se, an chawimawi thiam chuang lo tawp ang. Mahni nihna leh neih anga lungawi thiam lo hian engpawh neih belh mahse lungawi ni an nei tak tak lo. Tuna i nu leh pa neih lai (hringtu, fa atana latu, enkawltu, pahrawn, nuhrawn, etc) chungah khan lawm la, hmangaih la, duhsak la, zah la, an thu awih mai rawh.

Pathian tih la, Pathian thu awih la, chu chu nu leh pa chawimawi dan tha ber chu a ni e.