Dr Hrekima Titi

Nun Tam — Dr. Hrekima

Dr. C. Lalhrekima - Sep 07, 2014

Nun Tam — Dr. Hrekima

Nun tam Tlangval pakhat nen kan inkawm a. Chu tlangval chu tunhma atanga ka hmelhriat than pawh a ni lo. “Ka nun a chhe zo vek tawh. Dam chhan tur ka nei lo, ka thi duh..” a tih avanga intawng chawp ta mai kan ni. Inhmelhriat hrep tawh ang maiin kan titi dun ta vak a. A thil tawn mek chu hrehawm tak a ni. Thihsan daih chakawm khawpa tawrh har a ni. A nun chu a buai ve khawp mai. Mahse, a nun pumpui chu a chhe zo vek tak tak em tih chu kan zir dun ta a. _______________________ ‘Zawhte hian nunna pakua a nei e,’ an ti thin. Mihring erawh hi chuan pakhat chauh kan nei a nih hmel. Kan nunna hi roh viau tur a ni a, hlut hle tur a ni. Mi pakhat ka ni. Ka nun chu pakhat a ni. He nunna pakhat chhungah ‘nun tam’ a awm tih hi kan ngaihtuah ngai em? He nun pakhat chhungah hian ‘nun’ peng hrang hrang a awm asin. Nu leh pa nena ka nun, ka unaute nena ka nun, ka mopuite nena ka nun, ka puzawnte nena ka nun, ka thiante nena ka nun, ka ngaihzawng nun, kan nupa nun, ka fate nena ka nun, ka zirlai nun, ka hnathawhna nun, ka sumdawng nun, ka inchhung nun, ka kohhran nun, ka YMA nun, ka badminton nun, (Ti ve ziah..pawimawh ve viau si alawm!), ka thlarau nun, ka nun ruk tuma hriat ve loh leh nun dang tam tak pawh a la awm ang. He nunna pakhat chhungah hian ‘nun tam’ a lo inphum a nih chu! Tu nunah mah hian engkim hi a fel thluam bik reng lo tih hria ang che. Kan hnathawhnaah te, in lamah te, thiante nen kan inkarahte, ngaihzawngte nen kan boruak thuahte harsatna a awm thei a. A chang phei chuan engkim hi a buai ta veka hriat changte pawh a awm thin. Mahse uluk takin han ngaihtuah vang vang la, i nun tihlim lotu leh harsatna i tawh mekte kha ‘engkimah’ ni lovin i nun peng pakhat lekah khan a lo ni fo thin tih i hre mai ang. Kan nun hi a hlawma kan thlir thin avangin engkim hi a buai vekin kan hre mai thin alawm. Heng nun peng hrang hrang hi an inzawm tho si avangin an innghawng che luai luai fo. Pakhat a buai hian a dang hi a nghawng ve thin ngei e. Mahse inkhawibuai loh tir hi zir theih a ni. I nun peng hrang hrangte kha ip khatah thun khawm vek suh. Nun peng hrang hrangte hi a hrang theuhin, ip hran theuha awm angin thliar hrang thin la, a hrangin thlir fo thin teh. Nun peng pakhata fel lo kha ‘engkim’ a ni lo tih i hrethiam mai ang. An buai rual vek ngai mang lo a nia. Thil hi a hlawma kan thlir puk thin avang hian kan ngaihtuahnate hi a buai nuaih fo alawm. I nun peng khata i hlim lohna khan i nun peng dang khawih buai tir loh tum ang che. Kawng khata i hlim loh khan kawng dang atangin hlimna a la tam tih i hmu chhuak ang. Sawifiah lehzual teh ang. I ngaihzawng nen in inthen a, i nun a buai a, i na a, hmangaihtu pawh nei loin i inhria a, thihpui tham khawpin i nun zawng zawng chu a chhe zo ta vekin i hria maw? I tawrh mek hi a na lo e tihna ni loin i nun zawng zawng chu a chhe ta vek em tih hi thlir zau chhin ang le. I nu leh pa nena in nun a la buai hleinem! I thiante nena in nun a buai hleinem! Kohhrana i chanvo pawh a la ngai vek alawm le! I unaute’n an la hmangaih che a ni lawm ni? I mit leh beng an la tha tiraw? Kut leh ke i la neih kha! I inkhelhpui thin ten an la khelhpui duh che a ni lawm ni? YMA section hruaitu i nihna atangin an ban che em ni? I nun peng hrang hrang zinga ‘i ngaihzawng nun’ chauh hi a nih hi buai chu. I man thiam tawh em? I nun zawng zawng chu a chhiat zawh vek si loh hi maw le, tiraw? “Kei zawng nun an neih nan, tam taka an neih nan lo kal ka ni,” titupa sawi tum ‘nun tam’ hi a awmzia ka zir thui ve thiam lo. A tum pawh ka hrethiam phak hauh lo ang. Mahse he nun pakhat chhunga nun tam awm, nun peng hrang hrangte hi hlim tak leh nuam taka kan hman hi a duh ve ngei ka ring. Nun tam tak zinga ‘pakhat’ buai avanga thih ai chuan a la buai ve lo ‘pakua’ hi dam chhan zawk ang hmiang! September ni 10 hi World Suicide Prevention Day a ni. Nun tam hman tan nan i hmang teh ang u.
Share now