Dr Hrekima Titi

Nupui nei tura patling

Dr. C. Lalhrekima - Apr 05, 2014

Nupui nei tura patling

"Kum engzat nge i nih?” “Kum 30” “Lehkha eng thleng nge i zir?” “Pawl 10 ka pass lo,” “Nupui i nei tawh em?” “Nei tawh e,” “Fa engzat nge i neih?” “Pathum” “Enge i thawh?” “Engmah..” “Engati nge i lo kal ve le?” “Zu / drugs ka ti nasa lutuk a…..”   Hetiang thu leh hla hi zing tin tlai tina ka hmuh thin hoah hian an va tam em! Kum 30 mi, pawl 10 pawh pass loin fa pathum neih hi sawi buai ka tum hauh lo. A chhanna hnuhnung pahnih hi a ni lu tihai thin chu! Pianphungah chuan puitling fu, rorum hmel tak, han belhchiana sawngnawi si hi kan tam viau ang em aw? Nupui neih nachang hi kan hre hlawm fu mai a, fa neih dante hi kan hre phian. Ruih nachang pawh kan hria. Hna thawh nachang erawh kan hre hlawm mang lo a ang! Nupui fanau nei si, engmah thawk peih si lo, rui nileng ringawt mai hian lu an tihai e. Kum a tam hian nupui neih ngawt tur pawh a ni lem lo. Nupui pasal neih hun hi a kum bia thliah fel ngawt chi a ni tlat lo. Kumah chuan puitling kum rual ni si, mahse nunphung leh thil danga puitling si lo a awm theih. Nupui neih hi a chak apiangina tih ngawt chi a ni lo. Hautak deuh a nia! Taimak te a ngai a, zaidam te a ngai a, tuarchhelte a ngai a, rinawmte a ngai maw le!! Nupui neihin a ken mawhphurhna hrang hrang tihlawhtling thei tur khawpa ‘patling chin’ chauh hian nupui neih mai a tha. Tichuan chhungkua kan hlim ang a, hma kan sawn ang. Chhungkaw hlim lo leh mumal lo hian kan ram a tichhiain min tithuanawp tlat a nih si hi. Nupui fanaute mamawh ngaihtuah hi pa mawhphurhna a ni. Chhungkaw mamawh phuhruk hi pa hna a ni. Puitling anga lang nazawng hi patling an lo ni vek lem dawn lo a niang e. Patlinna hi kum lama teh chi a ni lo a, dar pharh hlai zawnga teh tur pawh a ni hek lo ang. Mahni hmaa mawhphurhna lo chhuak tha taka hlen zo, taima taka nupui fanau enkawlna tura thawh theih apiang chhel taka thawk peih, sum leh pai neih ang ang renchem taka hmang thiam, tumah er si loa rual el thin, mi dang tana hnawk hauh si loa hmasawn tum, nupui fanaute zaidam taka thlamuan thin, thlemna chi hrang hrang karah pawh chhungkaw tana rinawm tlat, nupui fanaute ei-in ai ruih zawh sak lo mipa hi nupui nei thei tawh khawpa ‘patling’ ka tih ve chu a ni. Chhungkua hi patling chinin din ila, chhungkua kan hlim ang a, kan ram hian hma a sawn chauh hian ka ring thin.
Share now