Zawhna: Obstructive Jaundice ka ni a, Pancreas Tumor-in a block vang a lo ni a, Calcut-ah refer ka ni a, a stent an dah thei lo a, an drain ta zawk a. Bilirubin san lam 20 te a kai a, a tlakhniam theih hun chhung thla 3 vel hun min pe a. Thla khat a ral ta chemo khai nan; Bilirubin 5 aia sang lo a ngai a, zai theih nan Billi 10 ai a hniam a ngai si, billi a la sang si, cancer min ti bawk si. Ka zawh duh tak chu Chemo khai loa inzai hi a tai darh chak hlea ngaih a ni bawk si, rilru a va buai em. Chemo la loa zai hi awmzia chiang deuhin min hrilh thei em?

Chhanna: I zawhna hi chhan tur tam tak a awm a, chutih rualin he zawhna i la rawn zawt thei hi i pachang (tough) hle mai ka ti. I dinhmun hi a khirh a, chutih rualin eng natna mai pawh hi eng angin nge a rawn inherchhuah dawn (prognosis) tih hi sawilawk a harsa hle. Cancer kan han tih hian a mi deh dan a dang zar mai thin a. Cancer rau rauah a awmna lai hmun, a intanna, a size te leh a bulhnai tisa (tissue) a khawih dan a zir hian a prognosis hi a hril thui thei hle a, chumi hmang chuan Staging an tih mai, Enganga serious nge? Eng nge dam chhuahna chance (survival)? Eng treatment nge tha ber ang? tihte a innghat a ni. Tisa sakhat cancer (thisen cancer te tiam lovin)-ah hian chumi staging chu an hman tam ber a ni a, TNM Staging tiin an sawi mai thin (T- tumour size, a bawk len lam, N-Lymph node involvement, taksa penga thal a khawih dan leh, M-Metastasis, a darh dan).

Pancreas hi thau hlawm rilbawhtu, kan taksaa insulin siamtu a ni a. A tuiril (enzyme) siam hi rilah a rawn chhawpchhuak thin a, chumi tuiril rawn chhuahna pancreatic duct leh thin (liver) atanga tuiril bile rawn chhuahna chu hmun khatah (pipe ang deuhin) luangzain pumpui hnuai lawk ril intannaah a rawn invuah dun a ni. Pancreatic tumor hian he pipe hi a nek fo mai a, a block a, thin atanga tuiril bile rawn chhuahna a block tel tak avangin bile luang chhuak thei lovin thisenah a tai darh a, mitliam (jaundice) kan tih chu a lo thleng ta thin a ni. Bilirubin hi thinin kan thisen timursen (red blood cells) atanga hemoglobin a lo theh darh atanga insiam a ni a, rilah a paih chhuak thin a. Chu chu block emaw, thin hnathawh a buai vangin emaw a inkhawlkhawm ta thin a, thisenah insem darhin bilirubin sang vangin mitliam a lo awm ta thin a ni.

Ka han peng thui ta hret a, i zawhna lai zawk hi han chhan tum ta ila. Pakhatnaah chuan kan Surgeon doctor ten cancer reng reng zai theih leh theih loh uluk taka an zirchian hnuah zai theih nia an sawi hi chuan zaiin hma a sawn ber dawn (best prognosis) nia an hriat vang a ni a, a lawmawm hleah ngaih phawt ni ta se. Zaiin awmzia a awm tawh loh chuan an zai mang mang lo vang; nun a tibuai ting a ni mai (reduced quality of life). Chutih rualin chemo an chawh hmasak chuan a chhan common ber chu an zai tur lai, cancer intanna lai kha tihtet (debulking an ti mai a) an duh hmasak vang a ni thin; chu chuan zai a tihawlsam vang a ni. Amaherawhchu, Chemotherapy lak hian taksa a shock duh hle a, taksa natna do theitute a tihtlem (reduced immunity) avang hian fimkhur erawh a ngai hle. A chang erawh chuan an zai phawt a, chumi hnuah a tai darh tur ven nan Chemo an chawh leh fo bawk. Chemo bakahhian hem (radiotherapy) anchawhtelfobawk (a cancer a zirin).

Chutichuan i zawhna chhan nan chuan i cancer hi staging an siam hmasa vek ang a, chumi stage a zirchuan a enkawl dan turah khawvelin an zawm treatment standard protocol a prognosis tha ber an thlang leh dawn a ni. Chemo la hmasa tura an ti che a nih chuan chhan a nei ngei ang. Cancer treatment lamah hian hma kan sawn nasa khawp mai a, zai lamah phei chuan kan doctor-te thiam dan hi phai lam ai mah pawhin a tha fo tawh zawk a ni. Cancer prognosis an teh dan tlanglawn ber chu “5 years survival” hi a ni a, chumi chu percentage zawngte pawhin an sawi thin. Inthlahrung hauh lovin i doctor-te hnenah he prognosis hi zawt chiang la, i ngaimawh chungchang hi chiang takin an hrilh thei ngei ang che. Loh theih loh vangin saptawng leh medical term ka han hmang ta nual a, min lo hrethiam dawn nia.