Tûm tum chu ’rau lo zetin kohhran lam hawi ka’n sawi te’ng. Thalaite tân bîka ziak ka nih avângin khawvêl thila mi lârte hming nên ka lam pawlh nawk dâwn a; min hre thiam dâwn nia.

 ‘Vanlalsailova kha Pu C. Dina awm lo se, khati khawp khân a lâr ang em? A nih, Zoramchhani te, TBC Zaia te, Hmingtea, Cindy, Duhsaki te leh mi dang dangte hi… Idol/Icon/Praise On te hi awm lo ta se, an lâr tho ang em? A nih leh, Vânneihtluang hi awm lo ta se, Dârrokima hi a lâr tho ang em? Lalrammawia Ngênte hi awm lo se…’ zawhna a tam thei ang.

Kan chhânna pawh a hrang nuai mai thei. Keia chhânna chu, ‘An lâr tho ang a; mahse, vawiina an dinhmun ang hi an thleng kher lo maithei,’ tih a ni. Pathianin talent hlu tak min pêk kan up bo hlen loh nân tute emaw, kan talent min pho chhuaksaktu kan mamawh vek a ni tih a chiang viau.

Khawvêl huap paw’n thlîr ila: Simon Fuller awm lo se khati khawp khan Spice Girls kha an lâr lo ang a; Simon Cowell awm lo se One Direction a piang lo ang. Big Hit Entertainment tel loin vawiina Korean boyband hlawhtling BTS leh rawn lâr chho mêk TXT te hi an piang lo ang a; YG Entertainment hi awm lo se, Blackpink pawh hian chart record an siam theih ka ring mawlh lo! A nih mi hlui deuh, Dolly Parton pawh kha… Porter Wagoner tel loin a lâr chhuak mai bîk lo a. ‘The Porter Wagoner Show’-a kum sarih an thawh dun atanga khawvêl mi hriat a nih chauh kha. Roy Acuff, Fred Rose, Chet Atkins te tel loa lâr chhuak lo tûr Country stars an kuh tul bawk. Bon Jovi band lâr zârzoin Skid Row an rawn invawrh ve a nih kha. Sawi tûr an tam mai; kan khawvêl zêl hmain thupuia luh a hun.

Tû pawh hian, kan talent hlawhtlinpui emaw lâr chhuahpui tûr emaw hian nghenchhan tûr leh inpho chhuah (expose)-na tûr kan mamawh theuh mai tih a chiang e. Hetah hian Mizote hi kan va’n vânnei tak êm, ka ti thin—kohhran kan nei tlat mai hi. Kohhran tluka training centre tha hi a awm chuang dâwn em ni aw? Talent chhuan tûr êm êm nei lo, hringnun zirlai zir mêk tân pawh a tha vek. Ngaihzâwng leh nupui pasal zawn nân pawh kohhran tluka tha leh him hi a awm dâwn chuang em ni? Mizo Kristiante hi kan va’n nihlawh tak êm!

June Carter atanga Katy Perry thleng hian, biak inah zaiin bul tan ve tho mah se, anni aiin Mizote hian advantage kan nei tha fê zâwk. Khawi hmunah mah a thlâwna kan zir ngai rêng rêng loh tûr Tonic Solfa chu, kohhran thalaia kan inhman rual, kohhran zaipâwla kan tel rualin kan zir nghal chat a. Kan âw azirin conductor-ten kan awmna tûr part min siamsak a. Solfa ‘vuak’ chhiar dân thlengin kan hriat phah zêl a. Kei ngei pawh hi, fel lo chung chung khan kohhran thalai pâwl kha bèl tlat lo ila chuan, khawi hmunah mah solfa ka vai hauh lo ang tih ka chiang sak!

Music lam tui tân phei phei, kohhran hi inpho chhuahna hmun tha a va’n ni teh lul êm! Vawiina kan musician tha ber berte hi kohhran thalai pâwla inhnim pil tawh an ni deuh vek—chîk chîk mah rawh. Hming hmerha sawi tûr pawh ka ngah ve mai; hmunin min daih si lo. Thu leh hla lama tui tan tîr tân paw’n inzirna tûr kohhran chanchinbu kan nei fur a, thil tangkai êm êm a ni. Article kan thawh ve lo a nih paw’n, mi thu ziah lo ennawnsak ringawt pawh hi a hlâwkpui theihzia hre chiangtute zînga mi ka ni ve tlat! Graphic lam tui mi tân pawh, kohhran thalaia inhman hi a tangkai leh zêl. Kan rual û-te tih dân enin inzir ve chawm zêl ila; khâwmpui leh hunpuiah kan âwl lo thuai ang. Vawiina banner (flex) printing-na hmuna design chawp ngai lo khawihsak thintute hi kohhran thalaia an inhman laia tin-baw puan pawt pharh duai duai chunga ‘lehkha mawi’-a hawrawp chep a, Fevicol hmanga bel leh thinte kha an ni duh khawp. Thla la mi leh lemchang thiam, a… YouTuber thleng paw’n a ni ang chu, kohhranah hian tangkai theihna kan nei leh zêl. Tûn laiah kohhran thalai film a chhuak chuai chuai a, kan awmna kohhran thalai pâwl hi inzir nân, bul tan nân a va’n tangkai tak êm!

Thil kal phung leh pâwl inrêlbâwl dân te, committee kal hmang, minute ziah dân thlengin, kohhran hi inzir nân a tlâk tak zet. Kohhran thalai pâwl bawhkâna kohhran Pavalai/BMP adt. -a ‘direct’-a inhmangte ai chuan, kohhran thalai pâwla kum ‘over’ thlenga inhmangho hian thil chinchâng, pâwl kal phung leh nih phung an hre zâwk zêl a, pâwlah an tangkai zâwk fo.

Thian siam nân leh ‘thian aia thûk deuh zâwk’ siam nân hlei hlei hian a nia tha ni. Kohhran thalaia inhmang tak thian kâwm reng chuan, thlêk bâwk bâwk châng nei ve bawk thin mah se, an thle hlen ngai lo tlângpui. Wrestler lâr thin, Mark Mero-an, ‘Vawiina i thian kawm min hrilh la, i hma khaw nun tûr ka hrilh ang che,’ a tih ang chiah kha a ni. Kan neih sâ bâk thian tha, kan chhiat kan thata min tuam mawitu tûr chu kohhranah hian chhar belh tûr an awm teuh—kan duh phawt chuan.

Sawi dâwn chuan sawi tûr a tam mai. Mahse, a pawimawh ber hi kan thelh ang tih erawh a hlauhawm. Piangthar miah loin kohhran thalai pâwlah hian a inhman ‘over’ thak theih a nia! Pisa leh hnathawhnaah emaw, kan zirlaipuite emaw hmu ‘ro’ thak khawpa inlâk ‘kohhran mi’ leh lutuk te; chhûngkua, zirlai leh kan hna aia kohhran thalai pâwl thil tih dah pawimawh leh lutuk te hi thil tha ber a ni ang em? Pathian aia pâwl thil ‘pathìan’ tlat pawh a tha lo.  Pathian rawngbâwltu ropui apiangin chhuan tûr an nei ngai lo tih hi hriat reng a va tha êm!