Ovaries chu hmeichhe chi bawm a ni a. Chibawm anih angin hmeichhe chi Ovum siam tu a ni. Chhul bul ding leh veiah a awm a, chhul atanga rawn chhuak chi kawng (Fallopian Tube) nen insi deuh thaw in an awm bawk. Hmeichhe chi siamtu anih bakah hian hmeichhe nih phung - thi neih, hnute than len te leh taksa insiam dan thlenga inrawlh tuihnang (Hormones) pawimawh tak Oestrogen leh Progesterone siamtu an ni. An lian lem lo na in an pawimawh vet vet hle a ni; an buai vaih chuan harsatna tam tak an thlen thei a ni. Ovarian cyst kan tih hian Ovaries a bawk, a chhunga tui pai tihna ani mai a. Chi hrang tam tak a awm thei a, a common ber chu Functional Cyst kan ti a, thi neih nen a inkaihhnawih thin a, hmeichhe naupai rual ah a common zual a ni. Functional cyst hi a hlauhawm lova, thi neih nen a inkaihhnawih avangin a tam zawk chu amahin a reh leh mai thin. Na a siam lem lova, amaherawhchu thenkhat chuan taina te leh, a len deuh chuan ek emaw zun a ti buai thei ve bawk. Functional cyst hi a tlangpuiin a lian vak lova, a thanlen erawh chuan paih a ngai thin. Ovarian cyst dang leh chu Polycystic Ovaries kan ti a. Hei thung hi chu chi insiam puitling thei lo vanga awm ani thin a, thi neih buai te a thlen fo a, a nasa zualah phei chuan hormones buai vanga harsatna hrang hrang, taksa hmul insiam nasa te thlengin a thlen thei a ni. Chibawm ah hian bawk tui pai tereuhte te tam tak a insiam a, chu chuan ovary hnathawh te an ti buai thin a ni. Naupai theih loh te a thlen thei a, enkawl loh phei chuan a rei hnuah zunthlum (Diabetes) leh lung lam natna, thisen sang (Hypertension) leh thisen zam fel lo te a thlen thei bawk. A dang leh chu Endometriosis kan ti a. Hetah hi chuan chhul chhungril ber bang Endometrium a timur (tissue/cell) ho hi chhul bang layer dangah te, chhul pawnah te a lo intuh a, thi an neih apiangin chutiang awmna apiangah chuan thi a rawn insiam ve ta thin a. Chibawm a an awm chuan cyst hi a rawn insiam phah ta thin a ni. Na an ti thei viau a, fa nei thei lo an awm phah fo bawk. A dang leh chu Cystadenoma an ti a. Tui pai ngawt ni lovin solid lai te a awm a, an thang lian fo bawk. Kg chuang lai te in an thang lian thei a ni. Dermoid cyst tih a la awm leh bawk a, hetiang ah hian chuan taksa peng danga awm ha, sam leh hmul ang te a insiam thei a ni. Ovarian cyst tam zawk hi cancer a insiam lo chi (Benign kan ti) ani a. Cancer ah a insiam erawh chuan hriat a har hle a, hriat chhuah meuh chuan a lo darh viau hman tawh fo thin. Cancer anih leh nih loh en nan screening test an hman thin chu CA 125 ani a, hei hi Aizawl ah pawh a tih ve theih tawh a ni. Ovarian cyst nei te insawisel dan hrang hrang te chu: 1. Pum nuam lo puar el ul 2. Zun harsa, zun zawnga tai na, zun chhuak sek 3. Kawng kham leh tai na 4. Sex hman laia na 5. Thi neih na zual 6. A hun lova thi nei fo 7. Taksa rih belh (weight gain) 8. Chaw ei chak lo, luak chhuak. Kan sawi tak angin tam tak chuan insawiselna hi an nei lem lo bawk. Ovarian cyst hi a hriatna ber chu Ultrasound a en atangin a ni a. A awm chuan a than leh than loh monitor a pawimawh a, a khat mawi tawka ultrasound tih thin nise. A len lamah (size) 7 cm aia a len chuan paih a ngai tlangpui thin bawk.