Ziaktu hlawhtling tak pakhat, kum tina lehkhabu thar ti chhuak ziah thin hi chanchinbu miten an kâwm a. ‘I va han taima âwm bîk ve aw… Kum tin lehkhabu i ti chhuak ziah thei mai a. Engtin nge thu ziak tûr hian hun i neih theih bîk a, engtin nge i insiam rem thin?’ tiin an zâwt a. Ani lehkhabu ziaktu chuan heti hian a chhâng a: ‘A harsa hlei nêm, ni tin phêk khat zêl ka ziak thin a… Ka tui deuh chângin phêk khat aia tam deuh te…’ tiin.

Tin, a hun hman dân an zawh pawh chu ho tê bawkin a chhâng leh a. ‘Ni tin lehkha ziah nân minute 10 pawh hun ka hmang ngai hlei nêm. Ziah tûr ngaihtuah nân ni tin minute 20 lo hmang ta pawh ni ila; mut nân, hna thawh nân, chhûngkaw tân, khawtlâng leh thil danga inhman nân leh thil dang dang tih nân minute 1410 hun ka la nei tho alâwm … a hranpaa lehkhabu ziak tûra hun pêk emaw insiam rem chiam a ngai chuang hlei nêm,’ a ti leh êt mai.

Mi’n lehkhabu chhah pui puite ziakin, in ropui tak takte an din a, khâwl ropui leh motor changkâng tak takte an siam chhuak pawh a ni maithei. Mahse, tû mah hian vawi khatah emaw tum khatah emaw an hlawhtlinpui nghal vek ngai lo. Chutih rual erawh chuan, mi hlawhtling tû mah hian an thil tih, a laklawhah an tâwpsan ngai lo a, an beidawnsan ve ngai lo thung.

Pa pakhat, Inrinni tlai tin an khaw daia dîl kianga teihawi thin hi a awm a. Chu hmun a kal apiang chuan pitar pakhat, dîl kama thu hi a hmu ziah thin a. A kawm chian hnû chuan pitar pawh chu, Inrinni tlaia darkâr hnih chhûng, chu lai hmuna hun hmang thin a ni tih a hre ta a. A hmuh apiangin pitar chuan, dîla satel hrang hrang hi chharin, an kâwr a tih faisak ziah thin.

Pitari hun hman thin dân chu a thlîr ru reng thin a. Pakhat a ti fai a, tuiah a dah a; a dang tih fai tûr a man leh zêl a. Satel lah chu, chû dîlah chuan tih fai zawh rual loha tam an chêng bawk si. A hun hman dân chu, hun hehthlâk a tihpui hle thin.

Tlai khat chu a kianga thuin pitar chu a tîtîpui ta a. ‘Ka pi, hêng Satelte hi an dam chhûngin pât-êk leh hnah tawihten an bâwm reng dâwn tih i hre tho âwm si a. Tin, khawvêla satel zaa 99.9 te hian nangmah anga fel, an kâwr bâl tih faisaktu an nei ve si lo a. I hun hlu tak heti mai maia khawhral lo hian thil tangkai dang tih nân hmang zâwk ta la, tha i ti zâwk lo maw?’ a ti ta a. Pitar chuan a satel man thar chu chawi kâng pahin, ‘E! Vâla, he satel hi tawng thei ta se maw, “Ka pi hian, ka tân khawvêl thar min siamsak maw le!” tiin a hrilh duh hial che ka ring asin!’ a ti ta a.

Tuipui kam pakhatah hian starfish hi tui fâwnin a rawn lên chhuak chiam thin a. Chûng starfish-ho chu khawmualah rei tak an dam thei ngai si lo. Tuipui kama chêng tlangvâl pakhat hian a tlai lên khawthawn pahin chûng starfish tam takte chu, a theih leh a peih chen chen tuipuiah chuan a vawm lêt leh thin a. A thianten a vawm luh hman loh, starfish thi an hmuh chuan a thil tih chu âtthlâk an ti a; ti lo law law sela, a tân pawh a hahdamthlâk tûr thu an hrilh chuan chû tlangvâl chuan, ‘A khai! Hetia pakhat chauh ka vawm luh hian, starfish nunna pakhat ka chhan a; pakhat tê têa ka tih zêl hian, nunna eng emaw zât ka chhan chhuak thin alâwm,’ a ti êt mai a.

Ni e, vawi leh khatah emaw tum khatah emaw, thil lian tham leh khawvêl thlâk danglam dâwrh thei thil ropui kan ti nghâl rum rum thei kher lo ang; mahse, pakhat tê têa kan tih bek bek hian, thil ropui tak a tih theih thin a lo ni.