Doctor rual zinga kan hotute kha Suangpuilawnah thil pawimawh tiin an zin a. Nu pakhat a lo kal a. Dr. John M Ralte chu rawn panin, “Kan fapa i enkawl kha a dam ta zel a, kan lawm lutuk a, ka rawn chibai che,” tiin hlim em emin a rawn chibai lawp lawp a. Dr. Johna’n a chhan hma chuan an bula lo awm ve Dr. BZA chuan chu nu hnunglam chu zawn nei niawm taka melh ruai chungin, “Pakuate kha khawiah nge?” a’n lo ti pek a! Chu nu pawh chu a hawihai hman tep a ni awm asin! An bula lo awm ve Dr. Gordon-a leh Dr. Lenghaia kha an lo nui ta kiah kiah niawm a ni! Lal Isua pawh khan lawmthu sawi ngaihthlak chu nuam a ti ve a niang, phar sawm a tihdam tuma pakhat chauhin lawmthu a rawn sawi khan dam ve tho lawmthu sawi ve ta si lo ho kha a zawng ruai mai! Dam ngawi rengho khan an tihrilhhai ta zawk viau a nih hmel. Tunlai tleirawl thenkhat lungawi lo ka hmuh thinte sawi fo chu, “Engpawh ti ila ka chhungte hi ka lakah an lawm ngai lo..min hau reng, min sawisel reng,” tih a ni. Ni tam tak an fel a, mahse tuman lawmthu an hrilh lo a. Ni khat an sual a, kan zilh nek lawi site pawh a ni mai awm tak asin! Lawmthu han hrilh ve lawkte hi a har loh tehlul nen hian! Sawisel kan ran tluk hian lawmthu inhrilh hi rang ve se chu kan hlim tlang zawk ang maw le! Lawmthu sawi phut deuha awm tur erawh a ni hauh lo. Phut let neia thil tih reng reng a hlimawm tluantling thei lo. Kan phut kan hmuh loh phei chuan lungawi lohna a inkhawlkhawm mai mai. Kan hna theuh, kan tihtur theuh hi ‘ka tihtur’ a nih avangin ti mai ila, nun a hlim mai thin. Chutichung chuan, lawmthu sawina kan dawn chuan kan hlim zual zawk tho tho. Phuldungsei PHC-a thianpa Dr. Zawma a awm laiin pa berh ve tak hi a rawn inentir ve a ni awm a. Dr. Zawma chuan a khawngaih khawp mai a. “Lo nghak lawk rawh,” tiin damdawi in atang chuan chhuakin a inah a va tlan phei a, a damdawi ‘sample’ tha a kawlho chu va haisakin cheng tam man tur chu a va la a, chu pa chu a thlawnin a rawn pe a. Chupa chuan a la a, ngawi rengin a tho a, a kal ta mai a. Titha a intih tehlul nen, lawm hmel pu reng reng lo maia a midum hlawh lak hmiah mai chu a ngei ta deuh a. Kawngkaa a chhuak tur chu, “Hei,” a’n ti vak a. Chupa pawh chu a ding chawt a, a rawn hawi let hu a. “I lawm em?” a’n ti ta hram a ni awm e. Lawm nachang hre reng reng lo puih hi a hlimawm famkim lo. Pui theitu dinhmuna ding zawk nih a lawmawm rualin lawmthu an han sawi hnap hi chuan puitu thinlung hi a hlim zual thin. Lawmthu sawi ngaihthlak hi chu a nuam a ni, zep loah chuan! Min tiphur thin alawm. Insawisel hrep zel ai chuan fakna tawngkam khat lek pawh hian mi a fuih nasa zual thei zawk. Lawmthu inhrilh tawn hi ‘fashion’ thar atan nei ila intihlumte hi an tlem deuh mai thei asin! Kan thawhpui te, kan u leh naute, kan thian te, kan fa te leh kan nuna mi pawimawh dangte hi lawmthu hrilh uar thar teh ang u. Phar sawm tihdam zinga lawmthu sawi ve lo pakuate chungchang kha George Buttrick-a chuan, “A hma aia an nun kha a hlim zawk pawh ka ring lo e, lawm nachang hre miah lo nun aia phar hri hlauhawm a awm chuang lo,” zuk ti a! “Pakuate kha khawiah nge?” a tih tuma lawmthu sawia lo kir kha Lal Isuan, “I rinna hian a chhandam ta che a ni,” (tawng danga a inziah dan pakhat) zuk ti a! Taksa damna mai ni lo, thlarau chhandamna a chang ta bik tlat. Kan taksa damna aia kan thlarau damna duhtuin, “Pakuate kha khawiah nge?” tia a zawn zingah kan lo tel ve palh ang e!