Thlasik ni ngang a ni a, chawhnu herah chuan ni chu a lang dul reih a, tlai ni tla tur chuan Lurh tlang pang per, tlak deng lam chu a han chhun a, a lang hnim ruih a. Chu Lurh tlang pangah chuan mawi em emin Tlaizawng a lo par vul chuk a. Patea chuan Thekte khaw lal in atang chuan Lurh tlang bawmtu Tlaizawng par chu a thir vang vang a. Tlaizawng par leh thlasik khawvawt ruih mai chuan a lunglen a kaitho a, a ke vei lamin lal in kaiten chu a rap a, a per dat dat a, a han rum deuh vang vang a, ‘Lal pian hun pangpar a vul leh ta, thinlai mu hnu lunglen a kai tho ve’ tiin Christmas hla chul tawh ngai lo tur chu a phuah chhuak ta a ni.

Ni, thlasik rim a han nam a, Krismas a lo her chhuah dawn meuh chuan a mi deh dan a dang zar thin. Hun kal tawh hnu kan chhui kir a, thenrual te nena hlim taka he hun kan hman ho lai te mitthlaah a lo lang zut zut a, kan hmangaih kal ta te rilruah an lo thar a, kan suangtuahna chuan hla takah min hruai thin. Bethlehem leh ran thlenga nausen Isua ngaia lungleng pawh kan ni chiah lo. Thlasik khaw thiang tak hnuaia leilung lan dan chuan kan lunglen a kai tho a, thlasik khawvawt a reh rualin kan tisa lunglenna leh mangphan ram te chu romeiah a zam ral leh mai thin.

Patea zawng chutiang mi chu a ni ve lo ve. Thlasik ni eng hnuaia khawvel mawina te, tlaizawng par leh tlangsam par te chuan a tisa lunglenna chawk tho bawk mahse, a lunglenna kaithotu ber leh a thlarau nun ram ngaih ber chu Bethlehem leh a chhunga nausen Isua chu a ni tlat mai. A suangtuahna chuan engtik lai mahin Bethlehem tlangpui a kian san ngai lo. A hla chang hnihnaah chuan,

‘Ngaih a na e, Bethlehem tlangpui,

Tlai ni tla eng lenkawl a khum riai e.

Bawng in tlawma ka Lal riangvai tak saw,

A chun riang Mari’n a chawi e’

tiin a rum chhuak vawng vawng mai.

Patea hian a Lal pianna hmun Bethelhem hi a ngai tak zet a, a thlahlel ngawih ngawih a, a thlarau chuan tap chungin chu hmun chu a zawng ruai ruai thin:

Aw, nang Bethlehem kava ngai tak che em!

I tlang chunga hruaitu arsi eng chu,

Tapinka rawn zawng zel ang che,

Ka Lal pianna lei hmun tlawm ber chu’

a ti vang vang mai.Patea hian Bethlehem khua hi vawikhat mah a hmu lo. Mahse, a ngai em em bawk si. Patea’n heti taka Bethlehem a ngai a, a thlahlel hi eng dang vang ni loin, a lal pianna lei hmun tlawm a nih vang chauh a ni. Patea kha a dam lai khan, ‘Hawh teh, khawvela i hmuh chak ber ramah ka hruai ang che, i fang dun teh ang’ ti ta ila, Paris khawpui emaw New York kawtthler a fan chak ka ring lo. Hniak phawi eih loin, ‘Judai ram Betlehem khuaah min hruai rawh’ a tih ka ring thin.Theih nise berampute ruala kal ve tak a nap a nih hi maw le:

‘Ka lal zan chamna hmun aw, kava ngai zual thin em!

Berampu ruala kal ka nuam, Bethlehem tlang chungah’ a ti hial mai.

Patea khan khawi College atang mahin eng degree mah a sual chhuak lo a, chu a hnehin ziak leh chhiar a thiam ngawr ngawr chauh a ni. Mahse, khati chung khan christian te tana Krismas hlut zia hi a va hre thukin, a va hre fuh kher em! Sual vangin Pathian nen kan in mihran a, kan tan Eden khawngkhar chu kharin a lo awm ta. Chu Eden kawngkhar chu hawng leh turin amah Krista ngei chu khawvelah a lo kal a, Bethlehem ran inah, ran thlengah bul a rawn tan a, kan tan Eden kawngkhar chu thihna hmangin a rawn hawng leh ta!

‘Chatuan Salem kawngkhar ropui chu,

Kan tan a rawn hawng leh ta e.

Boralna rama leng tawh hnu kha,

Van khua min chan tir a,

Lawmin i zai ang Lal thar a piang ta.

Lei hi chatuan hla mawiin nghawr vel rawh se.

Ngaihtuah chian chuan Krismas hi kan tan hian a hlu tak mang e aw! ‘Keini zawng kan chan bik hi kan van nei e’ tia hlim a, lam a, zuang tawr tawr tur kan va ni em! Chu a hnehin Krismas denchhenin hlimhlawp kan bawl fo thin a, a buk thlehin kan thelh a ni. Patea duhthawh lutuk chuan khawvela thil nung zawng zawng leh tuifinriata nunna nei zawng zawng hian aw chhuah se, Amah fakna zai ri chuan leilung leh tuifinriat hi luah khat vek se a duh a ni.

‘A fak hla nawn ru,

Van mipui Seraf te’n,

Tuifinriat leh khawvel zawng hi,

Zaiin khat se Haleluiah’

Ngaihtuah chian poh leh a makna hi a zual ting mai a ni. Van lal fapa, Zion roreltu, van mipui te’n an fak nin loh chu mihringte tlan turin khawvelah a lo kal a, a thil siam mihringah a rawn chang a, hmun tlawm ber ran thlengah a lo piang a, thing anchhe dawngah khai kânin a awm a, thil ni thei a ni dawn em ni?

“Lal ber te lal ber

Leh Zion roreltu,

Engtia awm thei nge mihringa’n?

A hmangaih a va mak em!”

Patea thinlung hi tawmpuiin, Patea thirna tlang atang hian han thir ve ta ila, chhamdamtu hi kan fak lo thei dawn em ni?