Dr Hrekima Titi

“PATHIAN HI KA BE PEIH VAK TAWH LO”

Dr. C. Lalhrekima - Sep 05, 2021

Kan dil ve vak vak ang chu, mahse thuneitu thuneihna pawm sa zanin aw niang!

Nula pakhat nen kan inkawm a, “Pathian hi a awm ngei ang. Amah pawh ka ring. Mahse, tih duh loh hi a nei tlat zel a, ka be peih vak tawh lo!” a ti tlat. A rilru put dante hi ka lawm reuh riau pek alawm! 

An chhungkaw dinhmun a khirh em avangin nasa takin Pathian a au thin a. Tun hma lama a lo tawn tawh atangin Pathian a awm tih a ring a, thil a tithei tih pawh a pawm. Mahse, tun tum chu a ngawihsan tlat a, a thil dil hi a tihsak duh lo ni berin a hria a. Pathian ropui leh engkimtithei a ni tih a pawm si a, hrilhfiahna dang a awm thei lo, ‘tih duh loh a nei tlat’ tih bak chu! Han auh leh thin a, han biak leh thin kha sawt a ti lo deuh tlat tawh a, a be tha peih vak tawh lo mai a ni. Pathian a rinna a nep chuang lo lai hi ka duh reuh tlat alawm!

Hmanah kei pawhin ka be tha peih lo ve tawh alawm! Ama duh dan tê chauha thil ti zel tho nia ka hriat avang khan duhzawng lo han sawi ve thin kha sawt paw’n ka hre lem lo a. Thil thleng apiang kha, ‘a rorel a ni,’ tia lawm taka pawm mai ka tum a ni. Mangan niah erawh pan tur dang ka hre ta thin si lo a, ka au leh ta nge nge a. Ka be zui ta zel a. Ka dil leh thlen apiang chu ka duh ang takin min tihsak chuang lem hlei lo a. Mahse, ka tawngtai khan ka hahdam zawk ve tlat zel thung. 

Ka thenawmnu, rilru tha leh ngainatawm tak, a fate tana nu nih tlin tak, chhungkhat lainate ngainat em em mai chu Sept ni 3, 2021 khan raichehin a thi ringawt mai a. Fanu pathum an neih hnuah an awh em em mipa fa a hring ve ta cheng a, a tap ri pawh hre mumal hman loin, a tang nemah pawh lungsi taka kuah hman loin, hmangaihna mita inen dun kar chunga hnute pawh inpe hman loin mual a liamsan leh ta daih si a nih chu! 

Thisen unit 27 zet pek a nih lai khan, Pray for Remi tia inchahin, a damna dilin van lamah tawnntaina a chho chur chur mai kha a nia. Pathian rorelna lo thleng, chhanna kan hmuh chu thihna a ni leh tho si. A dam nan asin maw kan dil le! A fanu naupang tete pathum leh a fapa piang hlimte hian an la mamawh hian kan hre ve a! Ka vui ruk lek lek laiin Pathian an rinna nghing ngai lo a chhungte chuan Pathian rorelna chu an lo pawm thiam em em zawk daih thung si. 

Nulain, “Tih duh loh a nei tlat a, ka be peih vak tawh lo,” a tih kha ka hre chhuak leh a. Kan duh ang chhanna hmuh loh apianga Pathian dem a, “A awm tak tak lo a niang,” ti ve mai lo a, “A thu em a, tih duh a nei a, tih duh loh, tul tih loh a nei a ni,” tih pawm mai hi Pathian Rinna chu a lo ni. A thu ber a, a Lal ber a, a fing ber a, a hre ber a, thil a tithei ber a, a ngaihtuah kim ber a, chatuan atana tha ber tur pawh a hria a, min hmangaih ber a ni tih pawm mai hi rinna chu a lo ni. 

Chhan nei zelin thil a ti a, chhan nei bawkin ‘a ti duh lo’ leh thin a niang. A tih chhan leh tih duh loh bik chhan erawh mi fing mihrinna hian a ngaihtuah chhuak zo ve dawn lo a nih hi. A rorel dan hi, a ril em mai! 

Thuhriltuin, “Thil awmzia tak chu, hla tak, thûk tak, thûk em em a lo ni a (7:24),” a tih daih tawh kha. A hma ata chhuah hmanhmawh suh la, thil tha lo tilui suh, a duh duha ti thin a ni si a. Lal thu chu thutawp a nih avangin tu nge a hnenah, “Eng nge i tih ni?” ti thei ang? (Thuhriltu 8: 3 - 4)

Amah berin tawngtaia kan duh apiang dil turin min ti miau a. Kan dil ve vak vak reng tho ang chu le! Be peih vak lo tan pawh, thui taka biak kher a ngai lo, duah taka chham chiam a ngai lo, tawi tê tal pawhin kan au buai ve tur a ni. Dil kha a phut tlat. Mahse thuneitu thuneihna pawm sa thlapin aw niang! Amah Isua ber pawn, “Keima thu ni loin  nangma thu thu ni zawk rawh se,” a tih kha maw! A hahdamthlak ber mai zel a nia.

Share now