Patling nawi si hi kan chhiatpui ni ta berin ka hria, kei zawng!

Hmeichhia hi ka khawngaih thin. Nu leh pa duat lai kha palai tir meuhin an bulaizawl atangin kan va sawm chhuak a. “Hmangaih a, enkawl a, rawngbawlsak” intiamin a hmaa an chenna aia nuam zawk hauh loah kan luhpui ve khat khat a. Vawi khat pawh chaw la barh lotu kha an lo luh zan atanga ‘ka nu, ka pa’ an tih theih nghal loh chuan chum zawt kan inpeih leh si! An la hmuh than ngai hauh loh lam hla deuh ami thlengin chhungte ang chiaha en turin kan han beisei nghal a. An tih theih loh vaih chuan ‘mo sual’ hming kan pe thuai bawk si. A harsat ka rin thin tehlul nen, anni lah hian an thei nghal zel mai bawk a. Hmeichhia hi an fakawm asin!

An innghahna ber, an thlamuanna tur ber an pasalte chu an thutiama an din phawt chuan hmeichhia hian hmachhawn ngam loh an nei lo a ni ber. Pasal tha hi an mamawh ber a ni tawp mai. Chutiang pasal tha, innghahna tlak, hmangaih a, enkawl a, rawngbawlsaktu an neih phawt chuan rethei deuh pawhin, ei tur tha mumal awm lo pawhin, kekawrte mawng tet leh elastic rul deuh ha chung pawhin hlim takin an awm thei nia! A pasal ber awmah thlamuang taka a bei theih chuan ‘mother in law syndrome’ te hi chu an paltlang thei zel nia!!

Mahse nupui nei ve ngam ngat zingah hian patling nawi fe fe hi kan lo tam em a. Nupui neihin a ken tel mawhphurhna hre hauh lo, zir thar tum chuang lo, hriat sa pawh nun pui peih chuang lo, a hminga ‘pa’ ni satliahho hian hmeichhe rilru tha hi kan tichhe fo a, an nulat laia hlim thei em emte khan tap chungin rilru daktawr an pan phah thin a nih chu!

Chanchin pahnih lek kan tilang ang e aw, hmeichhe rilru hah chhan hriat nan.

Case 1: Nu pakhat, kum 8 zet an inngaihzawn hnua thla 6 vel chauh la innei chuan a pasal chu then a tum leh mek der tawh. A pasal in zu a in thin bakah a thlavang a hauh lo a, an hma hun tur lah a sawipui theih si loh. A pasal chuan zing atanga zan thlengin, chaw thlah thakin, khum betin kar khatte zu an in mai thin a nia!! A kulcho a, a nghei a, a fit deuh a, a in leh a. Chuti ringawt chu a ni, a pasal nun cycle chu!! An inneih tukah pawh a rui nileng maw le! Chaw ei rual tum a awm thei lo a, an mu rual ngai meuh lo a, mi nupa anga khumlaizawla nupa titi a awm thei hek lo. A pasal chu TV room-ah zu in chungin a tawm tlat a, a riak nghal fo bawk.
Hna a ngaihtuah duh bawk si lo, thawhchhuah a tum lo. Anin a ngaihtuah chhun, an tih dun theih lah a sawi pui duh bawk si lo a. A pasal chhungte atangin pressure a awm ve reng bawk nen! A hah a ni. Mo thar ta chu, theihtawpin inchhung serek khawihin a hah nileng a; mahse, hriatsak a hlawh lo a, zahderna a dawng lo a, lawmthu sawi a awm hek lo. A pasala nu lah engkimah lo inrawlh ve bawk si! Eng emaw fel lo hlekah chhungkua zawng zawngin ama thiam lohah an puh titih zel mai si! A pasal lah chuan a thlavang a hauh ngai der si lo!
Pasal a neih huna a nun ni tura a lo suangtuah thin nen khan a tak ram chu a va inang lo em! Huatnain a khat a, a rilru a na a, a tawt up up a, a hlim thei lo. A pasal a hmangaihna chuan inthen a la hrehtir a, a la pawt bet der der a. Mahse a nun ruak, ipik leh hlim lo chuan a nawr hla tial tial si! A mang a va ang tak em! A nun hlim lo chuan a nawr hla tial tial bawk si!

Case 2: Fa 1 nei tawh, inpui nghak, pasala farnu pasal sun lo kir leh a fate nena awmho an ni. Theihtawpin amah chuan chawhmehte zuarin ei a zawng a, a thawk chhuak tam mawh hle si. Chutih laiin a pasal chuan engmah thawk loin phone games a atchilh a, sawisel a haw bawk si a. Eng emaw chen a uar ve rih deuhah ngaiin dawhthei takin a nghak a, a sim zui ve mai a rin laiin a game buaipui chu a zual tawlh tawlh mai si. Zan tin a chhuak a, thiante bulah a zankhua fo mai a. Ina a awm pawhin tlaivar deuhthawin phone chu a khawih tlat a. An bula a awm ve pawhin a biak ngam mang loh a, a thinchhe hlur mai a, an naute lo dam tha thei si lo nen, a mangang takzet a ni.
Khitiang khi a ni, kan rama hmeichhe tam tak dinhmun chu. Hei aia nupa nun buai zawk leh manganthlak zawk, kut inthlak leh thisen inchhuah hial thawnthu rapthlak zawkte hi a tam asin!
Engvangin nge mipain nupui kan neih? Chhungkaw thar din zel hi Pathian remruat a nih miau avangin remruattu remruat chhan hre chiang mang lo pawh hian nupui neih nachang hi kan hre riau a ni. Original chhungkua atanga inla hranga chhungkaw thar din a, chhungkaw thar din leh zel thei tura thlah nei chhawng leh zel tur kan ni. Nupui fanau chawm a, ngaihsak a, an hlimna zawn a, an thlavang hauh a, venhim a, an taksa leh rilru leh thlarau mamawh phuhruk hi patling mawhphurhna a ni. Chu chu nupui kan neih chhan chu a ni.
Pumruaah chuan puitling ve si, mipat hmeichhiatna thua thiam thui ve zek si, nupui neih nachang hre fu zingah hian mahni mawhphurhna hre lo, patling nawi tak tak hi kan tam awm mang e ka ti!
Nupuite thlavang hauh ngam leh si lo tur te, nupui fanau chawm tura kut zungte pakhat pawh phut euh peih leh si lo tura thatchhia te, zu leh ruihhlo dang baka phone thlenga nupuite addict san leh tur si te, hmeichhia leh naupang takngial pawh control zo loa kaihruai leh thiam lo tur si te, Biak in leh Pathian hnen hruai thleng zo lo leh tur si te, hmeichhia leh naupang tithlabar tawk leka inti mipa ve satliah te, chhungkaw tak tak, tupawh an zalen a, an hlim a, hma an sawn vek theihna tur chhungkua din thiam lo leh si turte hi chuan nupui hi neih loh tawp tur a ni.
Pasal nihnain a ken mawhphurhna keng tlang ngam tur chauh hian nupui nei ila, chhungkua din ila, kan ram hian hma kan sawn chauh ang. Ram leh hnam thu hi chhungkuaah bawk bul tan a ngai thin si a.
Patling nawi si hi kan chhiatpui ni ta berin ka hria, kei zawng!