Valentine's day a lo thlena eng emaw min kaptu emaw min mawlh tlattu emaw nei ang mi hi ka ni ve ngai lo a. Mahse, vawiin ka sikul kal tùr chu chutiang chu ka ni ta hauh lo mai! "H#r" si lo hian ka ti deuh hürh a; tisa châkna lam ni si lo hian, ka phûr sûrh mai—Paulina vàng a ni ang!

Sikula ka páwlpui Paulina-i chuan, vawiin ang khaw vâwt hnuaiah hi chuan, kan sikul kawrlum pàwl kha a rawn ha chhuak leh ngei ang a. A mit meng pàwl rám nèn khán màwi kha—a tum rëng vàng pawh ni loin—a chhuah leh poh dáwn chu a ni a le!

A kal hmasa zâwk zâwkin sikul kawmthlanga kan pangpár—a hming pawh kan hriat loh, pár pãwl ria reng mai thlír chung khán kan innghâk leh ang a—sikul tan dár rîk hmain kan thlír dùn leh tlawk tlawk ang. Thlasik ni ëng rawn sáng zêlin chu pangpár chu a chhun paw zual zêl ang a; Paulina chuan, tawng chuang loin a ipte atanga a tui-úm la chhuakin tui a pe leh ang. Amah, Paulina-i angin—chu pangpár chu a pár pàwl máwi lehzual ang.

Paulina nèn hian, tawngkaa inbiak leh thu sawi aia kan thlan zâwk fo chu thiltih hmanga inbiak hi a ni. Ruah súr hnuaia kut inkaih ringawtin thu a sawi hnem theihzia hretute kan ni e! A thu hrimah, mi tawng tam lo leh mi kimki mi ka ni a; Paulina mizia i hre leh zêl duh a nih chuan—min kàwm mai rawh!

Ani nèn chuan ngawi reng mah ila, kan innuih sen sen fo a. tawng teh luam lo mah ila, kan inhmangaih tho a. Thu inhrilh lo mah ila, kan va'n inhre chiang tak!

Chûng chu sikul kal tùra ka insiam laia ka rilrua awm a ni—a bung khatna chu!

II

Phùr hûrha sikul kal tùra chhuah pahin, 'Eng nge ni vei le, Valentine nei lo pawh ka ni bîk hleinêm,' tiin kan pal kianga ka nu rose sen duk tãk mai, buk tha ber leh rimtui êm êm mai chu ka thliak ru zauh a. Bung khatna chhiartu chuan, a dawngtu tùr a chiang ang!

Hlim takin, phûr êm êmin, châk takin, chak fahranin, Paulina sikul thlen khalh hman ngei tumin a tlànin ka tlãn a. Ka tlànna lamah ka rose ken lai hnahte pawh chu an tìl dáwn dáwn mai! A pawi lo! Eng mah pawi a awm lo—Paulina hnên ka thlen dáwn phawt ahnu!

Tlãn hlîrin sikul chu ka va thleng a. Class room-ah ka ip tê ka dah tháwr a. E he—Paulina-i'n min thlen khalh ka ti! A thutna kiangah a ip tê a awm tawh tlat!

Sikul kawmthlang—a thleng hmasa sa ka innghahna hmun, kan pangpar huan pana a tlàna tlân thla lo thei ka ni lo e...

Chu hmunah chuan, chu pangpár pãwl riai kiangah ngei chuan, ka Duati leh he khawvêla ka hmangaih ber, ka Valentine Paulina chuan min lo nghâk ngei dáwn tih ka hria. Ka thlen hun nghâkhlel tak chungin, ri loin a lo phun sep sep ang a, kan pangpár hnênah chuan min ngaih tawh thu te pawh a lo hrilh ang. Ka zuk thlen thlâk hunah chuan, ka rose sen kensak chu ka pe ang a; làwm avàngin a tap hial maithei a ni—ka hre lo le. Hlim takin min lo kuangkuah ang a; chu chuan thu zawng zawng chu a sawi zo vek thei hial ang!

Mahse—a ni lo! A ni lo hulhual! Chu hmun—kan pangpár huanah ngei chuan, a pár tluka pár mawi, Paulina rêng rêng a lo awm lo! Amah Paulina a awm lo a ni mai lo a—kan pangpár, pár pàwl chiai reng pawh chu a awm lo! Thliahin zu awm nia maw le!

III

Paulina zawng chuan class room-ah ka tlàn lut a—a awm lo. Mahse, ka zawng rei lo. Ani chu sikul gate sírah, mipaho Valentine's gift dawngin a lo buai hle chu niin!

Ràl atanga min rawn hmuh rual chuan, kan pangpár, thliah tawh hnu ni chunga la pár pâwl riai chu chhuatah a paih thla a. He ka mit hmuhah ngei mai hian, ka thian tha ber tia ka lo chhàl ve thin, Lalvála vuan pahin, an pahniha bun lai,an naughty boy shoes chuan zuk han rap pherha maw le! An la nui huah huah zui!

Tuang ka ti chhah lui ngat a. Ka nu rose pár sen, ka nu pangpár zínga rimtui ber chu lek chhuakin, 'Happy Valentine's day, Paulina,' ka va ti ngat a. A lo dawng ve mai. Mahse, ka thianpa, a bialpa thar, ka best friend Lal Vala chu a'n pe chhàwng a. Chutah, Lal Vala chuan, a hmaa "kan pangpar" a chêksawlh ang bawk khán, chhuat chára paihin a'n rap hrual leh a nih chu! Chu pangpár rimtui, ka hmangaihna rim nam chék chêk chuan hlutna a nei ta lo ... a ni mai lo a, chêksawlh leh dîriamin a awm ta! Na khaih khaih tak a ni!

Sikul atang chuan ka tlãn hàw a. Sikul­ah chuan ka leng ve lo, tih ve tùr nei ni paw'n ka inhre lo. Pindanah ka inkalh hnan a. Thih êm chu ka tum lo; mahse, thih ngamin ka dam si lo! Ei tùr te chu min pe thìn a ni awm a—ei tùr awm lo pa hi. A mut te pawh ka mu ve—hìl lo leh nghar mutin. Ka mut ve chhunah mumang, a episode ang zawngte ka hmu a. A tàwp rualin min ti phu dut a, thlanin min lo bual zawr vek zêl a. Inbual dáwn ila, tui ka hlau a. Ka ute zu kulcho awm ang chiah ka ni e.

A tàwi záwngin, ka muhìl vang vang chu ka harh hlawl a. Banga calendar intár chuan March thla a ni tawh min hrilh. Ri chek chek ri ka hria—ICU ah ka awm tih ka inhre leh.

Tú dan rual lohin ka tho a. Nurse mang­ang chuan min mut behtír tumin tan a khawh a, ka va ti beidawng chiang tak! À ruai mah ilat hei hi ka hria— "Ka dam leh dawn Lalpa vàngin,

Ka tho leh dáwn Krista vangin..." tih hla sa chungin, a dana dan rual lohin damdawi in chu ka chhuahsan ta a nih kha!

IV

Tunah chuan ka khawvêl a danglam ta! Ni e, ka nihna hi ka sawi lo a. Mi tam tak thian siamna leh an mualphona—IG leh Fb pian hnua piang ve mai, mipa ni chunga pangpár ngaina tùr rënga rawn piang ve ka ni e. 

Tûnah chuan zíng ni chhuah tum han inphan tiap te hi an máwi thar a, tlai ni tla tùr te hi ka làwm thar ta riau mai a, a zùn hian rau a pai riau hian ka hria a. Hrilhfâka sawi fiah thiam mi ni min châktír tûk tin zan tin thin. 

Thiante chuan tlai ni tlâk dáwn ruaiahte hian an pic (thlalak) khawlo pui pui phone-a rawn dah te hi nuam an ti ang roh a! Chûng an pic leh social media kalsana phone tel loa khuarèl màwina chen hi, ka khawvêlpui châk ta zâwk a. Ka nu saron pár intlar thap mai tui pêk te hi ka tuipui letling ta!

Han sawi nawn leh ila—ka nu Saron pár intlar dal mI tui ka pêk tawh hi chuan, "Rawh!" tel loa thawk ka ni tawh a, a nuam bîk asin! An kiangah te hian ka chám reng fo a—tui an hìp kang hun nghah pah te hian, ka ziak loh puan leh ka kawlawm nèn an sawi "Zalènna Ram" chu pana hnaih ve tial tial ni ten ka inhre rum rum thin.

Chu hman atang chuan, sáwta mite saw ka va hmu "heta mi" zo zêl a—an nun ka tàwmpui ve ngawt zêl—an phalna la hawt si lo hian! Engti tùra inkawp nge an niha, eng ram nge an thlen dáwn le—chu chu ka thu thu! Chu tlang atang chuan mi tin mai hi ka hmu "khutah" zo vek fo a; a cháng leh ka hmu "khítah" zo fo bawk a; a hmutu kei ber min hlat ahnu ka thu thu tho!

Ka nu pangpár tui pêk paha khua ka chùan tawh hu chuan, thil hi ka ti thei ber a! Khuuua khu-a scooty-a inphur mi pahnihte pawh khu ka thu hnuai a awm an ni—duh leh ka ti ramvâk ang a, duh leh ka ti rál tlãn tlan bo ang a, duh leh kuhva tlan bopui agen ka nihtír ang—a thiang vek! Kawmthlanga páwl hnih páwl li zirlai rual pawh ka hmu Messi-in ka hmu Ronaldo thiang vek alãwm maw le!

Mite chuan, 'I va'n hman tak!' te pawh min ti fo. Hun ãwl insiam loin tuin nge Zalènna ram thleng ngai. Chu ram chu tum luiha thlen rúal mi a ni lo a, a thênga thàwnga thawkte hnenah chauh Zalènna ram chu inhawng thin a ni miai si a.