Hman deuha sorkar laipuiin sairang thleng a rel kawng siam a tum thu an puan tirh khan mi tam takin an thlawp a, an thlawp mai ni loin an phurpui nghal em em a nih kha. Keini thianzaho kha chu Mizoram chhung rila rel a lo luh duh lo pawlah kan tang a, hma an rawn la vut vut anga, rei lo teah rel a lo lut mai ang tih hlauin theih ang tawk tawkin chanchinbuah te kan ziak a, a dodal ngam awm chhun (?) khatih laia MZP hmalaknaah te khan kan tel ve zak zak nghe nghe a ni. Mi thenkhat, pa rawnkai tling tak takten rel kawng siam dodaltute chu hmasawnna dodalah min puh a, facebook lamah pawh engkim hlau a min puh tawk te, sorkar hmalakna hrim hrim sawisel ching anga min puhna te hmuh tur a awm kur nguai a ni. Chutiang anga min ngai chu tun thleng pawhin an la tam ang. Rel lo luh hun nghakhlel tak takte kha an vai chuan ka dem lo, kan thil thlir dan a inang lo mai niin ka hria. Keiniho kha chuan tuna kan ram dinhmunah hi chuan vai tam tak, rei lo te a min chim ral thei turte awlsam taka an lo luh theihna tur kawng hawn kha kan ngam lo a ni ber. Rel kawng avanga inchim ral awlsam zia te kan ngaihtuahin kan la zuam ve lo a, kan inhawn zau hma hian thil pawimawh tih hmasak tur a awm tlatin kan hria a ni. Chu chu sorkar inrelbawlna tha (Good governance) hi a ni. Kan hruaitute hian kan hnam himna hi thupui berah nei se la, chim ral tham lek kan la ni tih hriain hnam dang lo lut ruih ruih turte lo dang thei dawn se la chuan tuman rel kawng siam hi an do lo ang. Hnam lian zawkte kianga awm hnam tlem zawkte hi sumdawnna leh hmasawnna hmingpu thil chi hrang hrang hmanga nekchep a, chim pil an tam tawh khawp mai, kan kiang lawk a cheng hnam hrang hrangte pawh hi an ramah mikhual chan an chang tawh hlawm a nih hi. An thatchhiat vang ni loin inven nachang an hriat loh vang te, a hun laia an fimkhur loh vang te, sum leh pai an duh vang te, an hruaitute an corrupt em avang te leh thil dang avangin rei lo teah mikhualin an chim pil a lo ni. Chuvangin, sorkar tha tak kan neih phawt a, chimralna laka kan hnam venghim thei tura inrelbawlna tha kan neih hma hi chuan hmasawnna hmingpu thil tam takte hi kan hnawl ngam rih a ngai ang. Sorkarin zu khapna dan hlip a dan thar siam a tum mek duh lotu tam tak pawh hian a chunga kan sawi ang tho hian zu phalrai hma a sorkarin a tih hmasak tur a awmin an ngai niin a lang. Dan khauh tak hlih thut hian nghawng na tak a nei thei a, khawtlang nun a tibuai vak thei. Zu khapna dan khauh tak hlih tuk lawk a zu zawrhna dawr hawn nghal a nih chuan mi tam takin an tuar maithei. Zu phalraina hmun apiangah mihring nun a him lo, Aizawl leh a chhehvelah pawh hian zu zuar an tamna hmunah buaina a chhuak tam a, tharum thawhna, tualthihna, accident leh chhiatna dang pawh a thleng ngun bik a ni. Chutiang chu a nih avangin ram changkang apiangah zurui an chep a, zu in mite khuahkhirhna pawh a na bawk. Kan ramah hi chuan inkhel enna hmunah te, chapchar kut hmannaah te leh mipui fuankhawmna hmun leh puipunna hmun hrang hrangah zu rui an zalen khawp mai. Zu khapna leh zu in khuahkhirhna dan khauh zet mai MLTP Act sorkarin a lekkawh reng chung pawh a zu vanga tharum thawhna, tualthahna leh accident heti khawpa a tam thei a nih chuan an phalrai thut a nih chuan a huphurhawm viau long maw? Kan ram hruaitu lu ber atanga mi naran thleng a zu in mite khauh taka (dan hmanga) khuahkhirh thei sorkar kan neih loh chuan mipui mimir nun a him lo zual ang. MLTP Act hnuaiah pawh khawlaia zu rui au bengchheng leh insual buai tawk an awm fo a, rui chunga lirthei khalh pawh kan en liam mai mai a, mi lianho thilti khawm pawhin inthlahrung miah loin zu tha chi an thli sen zuai zuai thin. Chutiang a nih lai chuan zu khapna dan hi hlih nise, sorkar hian zu rui leh zu inte hi dan hmangin a khuahkhirh theiin kan ring em? Sorkar tha tak neiin dan bawhchhiate hrem ngam leh dan pawisa tak thuneitute nei ta ila chuan zu khapna hlih hi a hlauhawm vak lo ang. Mahse, tuna kan dinhmun han en hian chutiang chu beisei thei dinhmunah kan la ding chiah bawk si lo hi a huphurhawm lai tak chu a ni. Tunhnaiah kan hriat angin Aizawl Municipal Council member thenkhatin an awmna party leh anmahni thlangtu mipui kalsanin ruling party thlazar hnuai an bel a, hetianga mipui thlan lalte a ruala anmahni party an chhuahsan hi kan ram politics-ah hian a lo thleng zauh zauh tawh a, mipui lam hi chuan kan politician-te hi mahni a principle nghet tak nei, party-ah pawh rinawm em em ni vek se an duhin a rinawm. AMC vek hian tunhnaiah Municipal area chhungah Property tax khawn a tum thu kan hmu a, september thla atanga khawn tan nghal an tum a ni awm e. Tunhma atangin sorkar hian chhiah pe tha turin mipui min fuih fo thin a, khua leh tui tha ni tur chuan chhiah pek that hi kan tih tur pawh a ni reng a ni. Sorkar pawh hian mipui sum kawltu an ni tih inhriain renchem tak leh dik takin a hmang tur a ni ve tho. Sum harsatna tawh lai phei chuan sum hman danah an inhrek ve tur a ni a, nuamsa taka khawsa tura thlan lal an ni lo a, mipui hamthatna tura hnathawk tur an ni tih pawh an inhre tur a ni ve tho. Chutiang thoin hmun dangah pawh an la vek tih changchawi a mipui phur rit tura chhiah thar lak ngawt pawh hi a fuh ber lo ang. MSU chuan tuna kan ram dinhmun thlirin property tax lak hma hian dan hman hmasak tur a awm niin an sawi a, mi rethei leh harsa zawkte venhimna tur dan hman tur awm sa reng hmang hmasa phawt turin an phut a. Hei hi a dik chiah reng a ni. Aizawlah hian mi inluah chhungkaw tam tak an awm a, chung zingah chuan rethei tak tak te leh zirlai engemaw zat an awm. Property tax lak vanga inluah man leh dawr luah man a pun phah lohna turin zirlai pawl hian tunhma a dan awm tawh sa 'The Mizoram Urban Areas Rent Control Act 1974' chu a nihna tur ang taka hmang hmasa phawt turin an nawr ta a ni. MSU tan chhan hi a dik chiah a, chhiah pung hi in leh lo neih hlut zawng azir a pek tur a nih avangin a neitu tak tak ni lo, a luah hawhtu zawkin chhiah an pek lohna turin AMC leh Mizoram sorkar hian hma la phawt se a fuh berin a rinawm. Sorkar hian ngaihtuahna zau taka a neih loh chuan a hnuah buaina a thlen duh thin a, chhiah lak thar leh chhiah awm sa tihpun dawn phei chuan a hnu a a tuar nasa ber tur te dinhmun tur pawh ngaihtuah tel a ngai thin. A tawpna atan chuan MLTP Act hlih duh lo te, chhiah thar lak duh lotute, minister-te car thar lei sawseltute leh sorkar hmalakna thenkhat sawiseltute hian a pawnga puiin sorkar an sawiselin an do niin ka hre lo, an sawi hi 'Good Governance' zawk a ni. Inrelbawlna tha (Good governance) hi awm se la, dan rorelna tha tak awm se le, kan khawtlang leh kan ram leh hnam hi him dawn se la chuan ram hruaitute lakah rinna kan nghat ngam zual anga, sorkar hmalakna pawhin mipui thlawp a hlawh ngei ang. - Lalthlamuana Ralte