Modi sorkar hi a huaisen khawp mai, kalphung nghet sa thlak danglam leh thil thar tihchhuah langsar tak tak a awm ta nual mai. Tun hnai lawk, September thla mai pawh khan RBI Governor kaihhruai tur member 6 awmna monetary policy committee din a ni a, member atan RBI pawn lam mi 3 ruat tel an ni nghe nghe. Monetary policy hi RBI governor thuneihna pumhlum a ni thin a, mahse tunah chuan thutlukna siamnaah MPC thu hi ngaihchan a ni dawn tawh a, RBI thuneihna huang chhunga sorkar ruat mi dang an tel ve ta hi inflation venna atana tangkai riaua ring an awm laiin sawiseltu pawh an awm nual a, NDA sorkar hmasa a finance minister Yashwant Sinha pawh a sawiseltu zingah a tel nghe nghe. Tun hnaia Rs 100 leh Rs 500 note tihthih leh takah pawh hian thutlukna lian siam ngam ministry an la ni zel tih a lang chiang awm e. Kum 1971 khan black money chungchang zir chiangtu Wanchoo committee din a lo ni tawh a, an report-ah bank note lian zual tihthih rawtna hi a tel nghe nghe a. Chumi hnu 1978 january 18 khan Janata party kaihhruai sorkar chuan Rs 1000, Rs 5000 leh Rs 10000 note an tithi thut a. Tichuan kum 38 hnuah black money tihtawpna atan BJP kaihhruai sorkarin pawisa note tlang lian Rs 500 leh Rs 1000 chu zan khat thilthuah an tithi leh ta thut a nih hi. He hmalakna hi pawisa lem leh pawisa bal (black money-kuttling lo a lak luh, chheprelh) tihtawpna tura hmalakna piah lamah pawisa phek hmang lo a indawrtawnna (paperless economy) atana hmalakna a ni tel. Tunhma leh tunlai dinhmun hi a inang lo hle a, chuvangin, pawisa tihthih hmasa zawk leh tun tuma mi hi mipui a nghawng dan pawh a dang khawp ang. Kum 1970 chhoah kha chuan Rs 500 hi hlu tak mai a la ni a, tunah chuan ar pum lian deuh man chauh a ni tawh, chhungkaw harsa ve tak pawhin Rs 500 hi chu an kawl vek awm e. February 1972 khan India rama Cheng 1000 note awm zat chu 392867 chauh a ni a, tun thla tir (November 2016) mai khan Cheng 1000 lengvel zat hi tluklehdingawn 6.3 (6.3 billion) a tling thung. Chuvangin, buai phili an tam hi a mawh lo. Mahse, information technology & media a tha tawh a, a puanzar lamah tan an la a, mipui chiai pawh an hmet mit thuai niin a lang. PM Modi hian black money leh pawisa lem leng tam lutuk hi a vei khawp mai, tihtawp tuma hma an lak tur thu pawh a sawi thin a. Tunah hian hmalakna lian tham tak an nei ta a, an sawi anga fimkhur leh ngaihtuah ngun tak chunga hma an lakna hi mithiamte pawhin an fak viau a, politician thenkhat atira na taka sawisel nghal ngawt (Mamata Banerjee, etc.) pawhin thu an zuk leh tawh. Chutihlaiin, mithiam zingah an beisei anga a hlawhtlin ring leh ring lo an inzat thual awm e. Hlawhtling viau pawh nise kum 10 hnuah chuan awmzia a nei zui kher lo maithei a ni. Pawisa note (Rs 1000 & Rs 500) an tihthih hun hi vaiho tan chuan a fuh hmel viau, an puja zawh hlim, diwali bazar zawh chiah, vaiho pawisa hman tlem lai vel an hisap a nih hmel. Mahse, keini Krismas bazar tura inpuahchah mek tan chuan a hun hi a fuh lo khawp thung. Mizote min nghawng dan leh min nghawng zel dan tur rinthu telin han sawi ila. # Banking habit kan la nei tha tawk lo a, bank dawr a buaithlak bawk a, thingtlangah phei chuan bank a la tam tawk lo si a pawisa faia kawl an tam a. Pawisa thi thut hian mi tam tak a tichiai a, harsatna tawk pawh an awm nual. # Sumdawngte Krismas bazar atan an inpuahchah tan a, thenkhat chu phai lamah leh ram pawnah thawmhnaw la in an kal tan tawh a, pawisa tlang lian lo khawlten harsatna an tawk nualin a rinawm. # The economic times in a ziah danin Chennai a innei tur pakhat chu pawisa an mamawh ang an thleng theih loh vangin an thulh tawp a. Mizoramah pawh October leh November thla hi innei tam thla a ni a, harsatna tawk an awm nual maithei. # Sorkar thupek a Rs 500 leh Rs 1000 sumdawnna hman theih a nih tak loh avangin sumdawnna lamah nghawng hrang hrang a nei nual. Dawrkai tam tak chuan nilaini atang khan an dawng duh lo nghal a, thenkhat chuan a thleng theih tho avangin an dawng zel thung a. Mipui chiaiin Rs 500 & Rs 1000 hman ral duh (panic buying) vangin thil an lei nasa a, dawrkai zingah hlawkpui leh hlawkpui lo an awm nawk. Mahse, pawisa kir tur neih tam loh vanga tum anga hlawkpui ta lo erawh an tam ang. # Pawisa note la hman theih Rs 100 hnuai lam hmang phal lo a kawl tlat an tam ang tih a hlauhawm, Rs 1000 leh Rs 500 bo duak dawn avangin sum lengvel a tlem duak dawn a. Chu chuan kawng hrang hrangin nghawng a nei lo thei lo a, mahse, rei lo teah thil a nih dan pangngaiin a awm leh thuai dawn tho a. Chiai loh hi a tha ber. # Tui bill, electric bill, etc., pek a buai phah mahse, rei lo teah a fel maiin a rinawm. # Pawisa thleng buaithlak vang te, ATM khar vang te, pawisa kawl sa hman ui vangte hian ni rei vak lo chhung chu buai phah tawk an awm ang. Nimin thleng khan Aizawl a ATM tam ber chu hawn a la ni lo a, buai phah an awm nual. Lehlam zawnga ngaihtuah chuan rei lo te chhung sum renchem zawk pawh hi a thatna a awmin a rinawm. # Bank leh post office a thawkte an buai dawn hle, mipui rawngbawl an ni tih inhriaa an thawh loh chuan harsatna tawk an tam dawn. Bank lian (e.g SBI main branch, etc) te phei chu a hma aia dawr nuam zawk tura inbuatsaih ni ta se. Pawisa hlui dawng thei tura tih petrol pump, sorkara bill pekna, etc., te pawhin thupek an awih a ngai ang. Petrol pump pakhat chuan Nov. 14 thleng chauh pawisa hlui (Rs 500 & Rs 1000) an dawn theih thu an tar ve ngawt a. Sorkar thupek pawisa lo an awm a nih chuan thuneituten chhui se a tha awm e. # Online shopping (e-commerce) lam pawh a nghawng viau, COD a thilchah an phal rih loh hlawm avangin harsatna tawk an awm nual mai thei. # Mizo zingah hian eiru hausa, kuttling lo a sum la lut an tam a, chungho chuan tuna sorkar laipui hmalakna leh a dawta hmalak leh zelna turah hian harsatna an tawk ve turah ngai ila. Mahse, vaiho angin talbuai erawh an tam loin a rinawm.