Tùnlaia film làr zet mai, “12th Fail” hi ka en ve alãwm maw le. Hmuhnawm ka tiin ka rilru a khawih ngang mai. Páwl 12 te kha êkzam nawn leh mai ni loa han fail të tè phawta, rilru leh tih tak zeta han beih nawn leh sak te min ti châk deuh roh nia maw le! Thingtláng naupang, páwl 12 fail, a hnua êkzamnaa a thiante anga en tawn ve duh “tawh” lo, a tumruh êm avànga UPSC exam-a All India Ranking-a 121 nia IPS officer ni ta, Manoj Kumar Sharma chanchin behchhana siam he film hi, vawiina zirlaite hian en ngei se la; an rilru a thara awmin lo danglam zâwk tawh se ka ti tak meuh meuh a ni.

Film ropui chu!

Bollywood film lär leh hlawhtling ber ber, “3 Idiots” (2009), “PK” (2014) te leh “Sanju” (2018) te pawh lo ti chhuak (produce) tawhtu, he film director, writer leh producer ni bawk Vidhu Vinod Chopra hian Anurag Pathak-a lehkhabu ziah, “12th Fail” behchhanin, a lehkhabu hming ang thoin “12th Fail” film hi a siam a. Nikum, 2023 October 27-a tláng zarh a nih atanga chawlhkár hnih chhúng lekin cheng vbc. 26 a la lût hman hem mai a; a film siam nána an sum sèn (budget) chéng vbc. 20 chu kár hnih chhúng lekin a khûm nghâl dèr a nih chu!

“Lemchan pulit” (film critics) lam mit pawh a tlung hle a ni ang, kil tin kil tang atangin “12th Fail” film fakna hi a ri chuah chuah mai a; film tha tehna (ratings) rin tlâk, IMDb chuan point sàwmah point 9.2 a pe hial! (“3 Idiots” kha 8.4/10 a ni) Hollywood film thäwm nei ná—“Spider-Man: Across the Spider-Verse” (8.6/10), “Oppenheimer” (8.4/10), “Godzilla Minus One” (8.4/10) te leh “Barbie”  (6.9/10)-te pawh khüm vektu a nihna hian he film namai lohzia chu a tár lang chiang hle àwm e.

Kum 2023 kum hmáwr të, December 29-ah OTT (“Over-The-Top” tihna a ni a; cable TV leh cinema lama film tih chhuah ni lo, internet kaltlanga smartphones, tablets, smart TV, computer/laptop tea en theih tùra duan, streaming platform hrang hranga an tih chhuah thin sawina)-a tih chhuah a nih atanga ni thum chhúng lekin, kum 2023 chhúnga film en hlawh ber a ni thei hial a ni.

Lemchan phènna hlawhtlinna ropui

He film-a a changtupa, Manoj Kumar Sharma (Vikrant Massey) hi a tak taka Indian Police Service (IPS), kum 2005 Maharashtra cadre a ni. Kum 1975, July 3-a Morena district, Madhya Pradesh-a khaw te tak të Bilgram khuaa piang niin chhúngkaw rethei tak atanga sei lian a ni a. Páwl riat thleng chu tluang angreng takin a zir chho a; páwl kua leh páwl 10 erawh, a thiante ang thoa en tawnin a inziak tling thung! Gwalior, Madhya Pradesh-a Maharani Lakshmi Bai Government College of Excellence-ah higher secondary school a zawm a, páwl 11 pawh a zo mai. Páwl 12 an êkzam dáwnin Sub-Divisional Magistrate chuan an êkzam centre a rawn endik a, an fail dial! DSP Dushyant Singh fuihna vàngin páwl 12 chu en tawn loin a bei leh a, subject zawng zawngah “A” grade a hmu ta vek mai a. DSP Dushyant-a anga “pulit lal” nih duhna chuan a tur na ngang a ni ang, DSP nih ve chu a tum ta bur mai a. Hindi leh History subject-te la-in B.A. a zir zo a ni.

Chutia “pulit lal” nih tuma a beih lai chuan Madhya Pradesh sorkar hnuaia sorkar hna lian lâk thin chu kum thum chhúng an lo ti tàwp lailâwk hlauh mai. DSP nih a tumna pawh chu a thám ral ta! IPS nih tum lehin Manoj-a chuan Union Public Services Commission (UPSC) hnuaia Civil Services Examination (CSE) beih tumin a inzir ta tauh tauh a. Tum thum lai a êkzam hnu, Preliminery Exams (prelims)-a a tlin hnu paw’n a lèrah a hlawhtling thei chuang lo; a bul atang bawka a tan that leh a ngai zêl!

Chutih lai chuan thian tha tak, a hnua a bialnu leh a nupui ni zui ta a chhar hlauh. Chu nu chu Uttarakhand Public Service Commission (UKPSC)-a inziah tlin ngei tuma bei mék Shraddha Joshi (Medha Shankar) a ni. Shraddha-i hian a hmangaih a, a hma khua a ngaihpui tak zet a, nasa takin Manoj-a chu a fuih thìn. A êkzam beih theih hun tàwp ber, a tum li-na, kum 2005-a a êkzam tumin Manoj-a chu a inziak tling ve ta. Mains êkzam leh interview te a paltlang ta vek a ni. A thiannu Shraddha pawh IRS-ah a inziak tling ve bawk a—Deputy Collectors atán lâk a ni ve bawk.

Manoj Kumar Sharma hian Central Industrial Security Force (CISF) hnuaia Deputy Inspector General (DIG) hna a thawh hnuin, tûnah hian  Mumbai Police hnuaiah Additional Commissioner hna a thawk mék a; hel páwl lian Naxals beihna kawnga a thawhnaah fak a hlawh hle.

Lemchan phèna zirlai ropui

Film ti hmuhnawm tùr leh rilru la thei tùrin Manoj-a nun tak tak behchhan tho siin a behbàwm, a “masala” an pawlh fuh bawk a, ei duak duak awl tak a ni! Film siamtu (producer, director) Vidhu Vinod Chopra hian zirna lam hawi film a lo siam tawh, Chetan Bhagat -a thawnthu bu (novel) “Five Point Someone” behchhana siam, “3 Idiots” ang deuh thoin “12th Fail” film hi mi pakhat, Monoj-a thianpa, Pritam Pandey-a sawi chhàwn (narrate) a ni a. A tìra an chhúngkaw retheih dàn êm êm te leh páwl 12 pass ve uai si, UPSC exams pawh hre lo khawpa  an han dah mäwl êm êm mai te hian a film hi a ti “tak tak” riau a. A film kal chhoh dàn hrim hrim hi a inlaláwn fuh a, zun ram thiara thutna thawhsanna hun pawh min pe phal lék lo khawpin a inpha-man chho tha a, tang mar rengin thlírtu min siam tluan zak thei a ni.

Film tam tak hi chu a tàwp dàn tùr hriatsa hi chuan mittui tlâkna tùr àwmah pawh hian a tla mawh khawp thìn. Mahse, he film hi chutiang chu zu ni ve hauh lo a! Manoj-a hi a tàwpah IPS officer a ni dáwn tih kan hre lâwk vek; mahse, a ni ta chiah a maw … rawmawl phawrh loh chu har ve tak a ni!

Thawnthu ruangám (plot) ropui tak a ni hauh lo; thawnthu ngaihtuah zui ngai tùra han buai deuh nuai te, han chingchi-vêt kual vêl (plot twist) leh min han dek deuh zawr tùr thil thleng danglam deuh pawh a awm hran lo; mahse, a tìr atanga a tàwp thlengin thutna thawhsan a har fu lawi si!

Hlawhtlinna hi, sum hmanga a hlawha hlawh chhuah chi a ni lo a, tha leh zung hmanga a thawha thawh chhuah chi a nih zâwkzia hriattíra kan awm nawn leh theih nán, he film hi zirlaite hian en se ka duh tak zet a ni.

Zirna kawngah mai ni lo, hring nun thawntuah pawh hian, thawnthu tluang purh hi chu a ngaihnawm ngai loh. Harsatna namén lo tuar chhuak a, suar leh buar táwn tlangtute hring nun thawnthu hi, mihring fate thawnthu ngaihnawm tih ber, lemchan tualzáwla hmuhnawm ber leh zirlai pawimawh ber a la ni ta fan a. Hlawhchhamnain a tih hnual zawh ve loh, hlawhtlinna tláng chhîp làwn chhuah tuma a bul atang bawka tan tha leh tùr hian tlàwmna sai-ip puan sin ngam a ngai fo. Chûng mite chu “mi huaisen” an ni a; an thuam inbel pawh, khawvêl hian máwi a ti tàwp ngai lo ang!