Zawhna: Zalen chanchinbua thu i rawn ziak hi ka lo chhiar thin a, thil kan zawt ve lawk che. Pakhatna, Diabetes avanga serh fuk tha thei lo hi siam that leh dan a awm em? Pahnihna, heng mipatna e.g Penegra  te hian a natural a ti chhe thei em? Side effect engtenge a neih theih? Min chhan theih chuan ka lawm khawp ang.

Chhanna: Zunthlum (Diabetes) natna hi khawvela natna common tak, India ramah phei chuan thahnem takin an neih a ni a, Mizote zingah pawh kan lifestyle inthlak, awm awl leh ei tui, taksa chet tlem, zuk leh hmuam te leh zu leh ruihtheih dang tih nasat vangte pawha zunthlum nei hi an kat nuk ta mai. Inthlahchhawn awl tak natna a ni a, chuvangin nu emaw pa zunthlum nei te chu an fate’n zunthlum an neih ve theihna (risk) a sang hle. Chutiang avang chuan zunthlum nei lo tur hian kan in uluk a ngai hle.

Zunthlum natna hian taksaa thlum insem darh tur leh tangkai taka a hmang tur kha a ti buai a, chu chuan thisen zâm te (blood vessels), thazâm te (nerve) leh, tihrawl te a khawih buai a, an hnathawh dan tur angin a thawk tha thei lo va, harsatna hrang hrang a thlen ta thin a ni. Zunthlum hian taksa peng khawih buai theih loh a nei meuh lo va, kan taksa hnathawh nana pawimawh hormones hrang hrang te pawh a tibuai tel thei vek a ni.

Mi thiamte sawi danah chuan mipa zunthlum nei 35-75% lai mai hian sazu fuk tha thei lo harsatna (Erectile Dysfunction – ED tiin kan sawi zel tawh ang) hi an nei thei niin an ngai a. Kum a lo tam hian tisa châkna a lo tlakhniam ve tial tial avangin mipa hrisel pangngaiah pawh ED hi a awm thei tehmeuh mai a; mahse, zunthlum nei mipate hian a nei ve lote aiin ED hi kum 10-15 dawn laiin an nei hma thei niin an chhut bawk. Kum 50 chung lamah phei chuan a risk hi a sang tial tial bawk a ni.

Zunthlum natna hian sazu tihrawl hnathawh dan te, thisen zâm awm dan te, sazu chawmtu thazâmte a tibuai thei a, a bik takin zunthlum control tha lo te hian an nei duh zual hle. Zunthlum enkawlna atana damdawi an chawh hrang hrangte pawh hian ED hi a thlen ve thei bawk (side effect angin). Tin, thisen sang te, thin tha lo (liver dysfunction) an nei tel a nih phei chuan ED risk hi a sang zual sauh bawk. Zunthlum control tha lo rei tawhin thazâm leh thisen zâm a tihbuai hian fel thei tawh lo (permanent damage) a thlen thei a, chutiangah chuan a buaithlak zual hle. Chuvang tak chuan zunthlum nei tan inenkawl uluk a pawimawh em em a, zunthlum control that hian tam tak chu ED harsatna hian a kiansan ve leh fo mai.

ED enkawlna atan hian nunphung thlak danglam a pawimawh hle. Thau luat laka inven a pawimawh a, chumi atan exercise regular taka lak te, ei leh in uluk te, zan mut that te a pawimawh hle. Zu leh meizial hian harsatna a tizual duh khawp mai a, insum theih a tha hle. Damdawi zawng chuan i zawhna pahnihna Penegra ang chi hi an chawh thin tlangpui chu a ni. Heng lo pawh hi damdawi dangte pawh a la awm ang a. An damdawi ei lai side effect a nih palh chuan a damdawi ei laia chu thlak danglamte pawh a ngai ang. Chumi tur chuan a doctor inentir nawn lehte pawh a tha hle. Damdawi bakah hian sazua inchiu chi damdawi te, hmanraw hmang chi (vacuum erection device, venous constriction device etc) te pawh an chawh ve bawk thin.

Penegra (Sildenafil) hi ED tihdamna damdawi a ni lo va, tisa châkna tisosang thei damdawi a ni hek lo. Tisa châkna a lo awm a, sazu tifuk tura puitu mai zawk a ni. Damdawi a nih angin side effect a nei tehmeuh mai a, lu na, kawthalo, pum thip, sa hut hut, mut harsat, hnar ping, tihrawl na emaw kham te a thlen thei a, a nasa zualah phei chuan khaw hmuhte a tibuai thei a, ri hriatna (hearing) te pawh a tibuai a, thaw kham lote a thlen thei bawk. Chutih rualin side effect a lan lem loh a, doctor-te chawh ang thlapa hman a nih chuan damdawi him ang reng tak a ni thung. Sazu fuk hi natural taka mipain kan neih a ni a, sawi tak angin penegra hian he natural hi a zuk effect lo va, châkna a awm avanga sazu fuk tur kha a pui mai zawk a ni.