Mizoram pawna thi, Mizorama ruang lo lut buaipui a ngai fo dawn a. Covid-19 vanga thi rawn thawn haw hun a awm thei a, natna dang vanga thi an rawn inhawn zel dawn bawk. Mi mal thahnemngaihna leh rawtna ka’n titipui mai mai teh ang. Persia dan a ni lo a nia!

Covid-19-a thite chu uluk taka rawn sawngbawl sa vek tur a ni ngei dawn a. Mitthi dang nen lo dawnsawn dan tur a danglam a ngai lo ang. An chhungten an rawn zui thei kher lo mai thei a, hri kai lo tih chiangte erawh an lo kal tel mai thei e.

Minung lo haw tur aiin ruang lo haw tur hi a hlauhawm lo zawk. An khuh dawn lo a, an hahchhiau dawn hek lo. Droplet an thlauh dawn lo a, an vun atangin hri a chhuak dawn bawk lo. Kan hriat lar tak viau, ‘full PPE,’ lu atanga ke ler thlenga invenna thuam famkima inkhuh phui zûtna nena lo dawnsawn a tul lem lo e.

Ambulance-a lo thleng tur hi Mizoram an lo luh chiaha ambulance an inthlak loh chuan a khalhtute lakah lo fimkhur tur a ni. An riltam ve theih avangin ei tur fun fel sa (packed) diam lo nei ta ila, chu chu an motor-ah an ei thei. A nih loh chuan pindan ruakah eitirin chawlh hahdamtir ila. Motor atanga an chhuk dawn chuan hmai tuam se, hmai tuam vekin lo dawngsawng ila, kut tihthianghlimna (hand sanitizer) tam tawkin an kut lo phuhsak a tha ang. Feet 6 aia hnaiah awm lo ila a tawk hle. Hla tak atanga hah taka lo kalte an nih avangin an lakah hawihhawmna lo lantir zel a tha hle. An haw leh hnuah an thutna leh chettlatna chu tithianghlim mai tur a ni.

Ramri an rawn kan hlimah RAgT hmangin, motor khalhtute leh ruang zuitute endik vek ni se. An lo positive hlauh chuan, dahhran nghal erawh an tul ang. Chutiang a nih palh thut taka tihdan tur ruahman sa (back up plan) neih a tul ve bawk.

Thlawhnain emaw, motor-in emaw ruang a lo thlen hunah, kuang la thla tur ten kutkawr bunin hmai tuam mai tur a ni. Ambulance atanga lakthlak dawnah leh kuang khawih laiin kan taksa leh thawmhnawin engmah tawk lo turin fimkhur erawh a tha e. Motor chhung chep takah harsa dawna kan hriat chuan rain coat emaw ha zawk ila, phelha suk nghal mai tur a ni (Ambulance bang vel nek palh kan hlauh chuan).

Kuanga khung fel sa vek hi inchhungah lak luh a hlauhawm lem lo. Amaherawhchu, motor atanga lak thlak hlimah emaw, lak thlak hma pawhin emaw, in chhungah zawn luh a nih hmain 1% sodium hypochlorite hmangin emaw, sanitizer-in emaw kuang chu hneh takin hmun remchangah tihfai ni se. Tihthianghlim zawhah kutkawr thar bunin (tihfai hmaa khawihna kutkawr kha thlak tur a ni) in chhungah lakluh ni se.

Thil pakhat khawih zawhah kutkawr bun chungin (phelh hmain) sanitizer-in kut kha tihfai zel tur a ni a. Phelh dawnah kutkawr chhung lam atanga zenin pawh lehlin pawp tur a ni a. Uluk takin, bawm bikah paih zel tur a ni. Kutkawr hman hnu paihna tur hi thlanmualah pawh ken tur a ni a. Paih darh hauh loh tur a ni.

Mitthi chu a rim a chhiat loh chuan kuang hi hawn theih a ni. Mitthi taksa erawh tuman khawih loh tur a ni. Mitthi kuah leh fawhte hi tih loh tur a ni.

Mitthi hlauhawm vang ni loin, mipui punkhawm chhung a rei loh nan, ruang lo thlen atanga a rei lo thei ang berah invui a tha a. Mahse, thihna hi a nat em avangin mitthi chhungte lungawi tawk fang ngaihtuah tel a tha hle.

Mitthi vuitu pastor emaw upa emaw chuan hmai tuam mai a tawk. Kutkawr bun a ngai ve lo. Phungthluk nana inchibai hi tih hauh loh tur a ni. Mitthi chhungte pawhin, min lainattu lo kalte chungah lawm hle mah ila, tumah chibai loh tur a ni. Mizoram sawrkarin mitthi vuinaah mi 50 aia tam kal loh tur a ti. Mizo tan thil harsa tak a nih avangin a tlem thei ang ber kal tura infuih zel a tul a.

Mitthi vuinaa kal tur chuan hmai tuam vek tur a ni a, inhlat tur a ni tih hi khauh deuha kenkawh a tha ang. LTF or YMA intihthu hle a tul thung. Hming ziahna chhawp a, mitthi vuinaa kalte hmingpum leh phone number chhinchhiah vek tur a ni. Mipuiin a takin he thu hi zawm tur a ni bawk.

Kuang thlalakpui hi tih tam loh a tha. Thlalatu hian mitthi vuia lo kalte hawl kim thei ang berin thla lo la kual sa vek se. A tawpa kuang thlalakpui tul chin a awm lo thei lo. Thu hrang thap sa kha, thlalak dawnah kan inhnaih leh vek zel a, hmai tuam ema thlalak kan hreh bawk si. Thlalak ngai hi group tê thei ang berin insiam ila. Thlalak lai pawhin indin hnaih chuang lo turin, tam deuh tur chu tum hnih tum thuma lak turin inthen sawm mai tur a ni.

Thlanmuala kal pawh tam loh a tha. Kuang zawntuten hmai tuam a, kutkawr bun tur a ni. Thlan kotlanga inhnaihchilh taka din ho ai hian, thlanmual hmun zawl zau remchang laiah, mihring inhlat deuha din khawm theihna hmuna invui dan zawn a tha hle. Vui zawhah thlanah zawn phei a, indah luh mai ni se.

Mitthi vuina hmunah hian phai atanga ruang zuitute an awm duh chuan mi dang hnaih loin, hmai tuamin an tel thei ang a. Mitthi vui zawhah an inkhunghrang tur a ni ang. Chhung leh khatte nena han inkuah a, tah hawm hawm châkawm hle mah se, fimkhur a tha zawk.

Mitthi chhungte pawhin kan khawvel dinhmun mek hrethiamin, muang leia kan tih dan diak diak anga khawtlangin min sawngbawl lo ta deuh a nih pawhin, lung loah lak bik loh tur a ni.

Thihna hi chu a tawp em a, a na em a, indim tlang ila. Tupawh hian zahawm taka thih leh inthlahliam kan phu e.