The Final “Phawts”!

Chhantei nèn hian hmabâk ëng tak kan nei niin ka hre ve thìn. Kan la zawh tùr kawng pawh, mám leh phei duai ni ten ka hmu fo a; khàm leh suar dai ngai lo tùr ang hial te’n ka inruat thìn. Kan tán hian thla tin mai hi, Fártuah pàr hun, Vau thla a nih loh vëk paw’n, tlai taka April pár rawn pàr ve chheih chheih hun, tomir thla ang tala hun duhawm ni tùrah riak ka ruat thìn. Mumang fuh tûk tin ang maia zíng dár 8.30 nghâk reng tùra ka inruat ve rîkngawt laiin, ka nun chhúng ril chu rawk a ni ta!
    Chhantei sikul kal loh chhan chu a chhúngte dam loh vàng a ni ngawt lo—tual thih­na vàng a ni zâwk! A pa a tual thi! A thattu chu an chhúngkaw hmélma ni loin a pa hmangaih êm êmtu, a nu—rilru lam buai … maw!?

Ka rilru chu a buai nuai mai. Awm ngaih­na ka hre lo a; awm loh ngawt lah a theih bawk si loh! Ka awm dàn chu thriller movie tàwp lam, buai nuai ang hi ni berin ka hria!

Nimin tlai leh nizàn lama ka hlauhthàwn rûk, eng nge a nih ka hriat chiah si loh chuan nasa lehzualin ka thauah min man tlat a. Ka awm dàn chu “awm loh dàn ngaihtuah” ni berin ka hria! Ni e, bihrûk a ngai dáwn a ang ka ti!

E taka!—a pa hming kha!?

Chu chu ka rilruah a rawn lût zawk. An class room pan mék Gideon-a chu ka va ûm leh. Ka zawh hreh zet zawhna chu ka zâwt ta—‘Chhantei pa hming kha…?’

Gideon-a’n Chhantei pa hming min hrilh rual chuan ka harh zawk—harh lo hlen ila ka duh zâwk tehrëng nèn! A hma zawng khán ka thil hriat chian loh avàngin hlau leh ti duiin ka awm a; tünah chuan chu chuan min ti khùr ta zâwk a!

Class room-ah ka tlän lût a. Bag ka laa ka tlän chhuak leh nghâl. Hmanhmawh zetin two wheeler taxi dinna lam ka pan ding nghâl a.

In ka thlen chuan kan awmpui nula chauh a lo awm hlauh. Ka nu chu office tùrin a chhuak tawh. Ka pindanah tlän lût nghâlin ka pawhdawh mawnga ka phone, tú ma min hriatpui loha ka hlawha ka lei ve liau liau chu ka la chhuak a. Computer nèn ka ti nung rual a. Ka online nghâl.

Ka la thaw hluam hluam thei chu ka läwm letling zâwk! Tùna ka dinhmunah hian ka kum rualpui tam takte hi ding ve ta se, thaw chhama an thih nual ka ring! Hah vànga thaw hluam hluam ka ni lo—hlauh vàng a ni zâwk!

Phone ka tih nun rual chuan Telegram lamah message eng emaw zât a lo awm tawh. A dik e! A dik e! Thi lo se ka tih êm êm chu “amah” ngei a chu a ni e—ring ngam chiah si loa “a ni ang” tih ka hlauh rûk êm êm chu a ni! Ka thiannu pa ni lo se ka tih tak zet nèn aw…

Kan hotupa ber—(hotunu a nih ka ring mah zâwk) chu call ka tum a. A phone a la thi! Kár hnih chhúng vêl reh tawh mah se, Telegram-ah message ka hnutchhiah tho a.

Facebook-a ka account pangngai atanga chhuakin ka account dang—hna thawh nána ka hman ka tih mai thinahchuan ka inthai lût a. A taka anmahni ka hriat loh leh an hmél pawh ka la hmuh miah loh, ka thiante chuan min dàwr thìntu thih thu leh pawi an tih thu min rawn hrilh liam liam hlawm. Chhàn enah pawh ka en lo—tül ti hek lo!

Telegram lama kan group-ah chuan ka tána fímkhur a ngaih thu leh, in lama tawm bò a that rih thu min rawn chah sup mai. A tam berin ka Fb account chu deactivate mai ni loa delete vat tùra min duh thu an rawn sawi bawk. Kei chuan chutianga ka account lem delete kher chu tùlin ka hre ve tlat pek lo! Thil tih sual ka nei a nih chuan, mi dawihzep anga tlän chhe tùr ka ni lo; ka hma chhawn ngam tùr a ni, ka ti ve tlat.

Keima lam chu ka inngaihtuah thei ang. Ka thiannu, a nu tual thah avànga a pa sún mék, ka thian tha ber Chhantei chu ngaihtuah a ngai hle. A hmélma ka nihzia a la hre lo lehnghâl a! Hre ta se, a pa chunga ka thil tih thin zawng zawngte nèn khán; engtin tak min ti ang maw! A tán chuan he khawvêl ram zauah hian kei aia mi tenawm hi an awm thei lo ang! Ama’n min that hreh a nih paw’n min ti hlumtu tùr tal a ruai duh ang!

Tih vak ngaihna awm hek lo, ka tawngtai ringawt a. Buaina min lâk kiansak tùr erawh chuan Pathian ka díl lo; huaisen taka ka harsatna tawh hmachhawn ngam tùrin chakna ka díl zâwk a ni. Chu chuan min ti thla muangin ka thaw hlawp hlawp pawh chu a ti zia huai mai.

Chhantei min hrilh—“law” pakhat ka hre chhuak zawk—“Kidlin’s Law” a sawi kha. ‘Harsatna eng pawh tâwk ila, mihring tak paw’n a chin fel ve theih—“Kidlin’s Law” hmangin. Kan harsatna chu chipchiar deuha ziah chhuah dap tùr a ni. A intan dàn, mawhphurtu, nghawng a neih mék, nakin zêla a nghawng tùr, tùna ka chin fel theih, tih ang chi te … kan hmachhawn dàn tùr thlenga ziah chhuah vek tùr a ni. Chutia kan ziah vek chuan, kan harsatna zâtve kan ching fel dêr tawh tihna a ni,’ tia min hrilh kha.

Chu chu ka zawm a ngai. Ka inphih harh a. Ka inti thawveng lui a. Computer-ah YouTube ka hawng a. EDM Official videos-a “Weightless” hla ka zaitír a. Khuma mu diai diai chungin ka ngaithla a… 

A hnuah pen leh paper ka la a. Thaw ka la leh të tè a. Muang fán raihin ka harsatna tawh mék chu, a chìn chhuakin ka ziak chhuak ta vek a—ka hmachhawn dàn tùr thlengin. Ka thaw huai mai. A ni tak tak—ka dam siai siai a ni!

    ~~

Chhantei te in kawta thutthlêngah chuan ka thu vàng mai. Amah erawh ka hmu lo. A pa ruang post mortem-na lamah a kal a nih ka ring. Rei ka thut hmain sikul lama Chhantei class-a mite hmél ka hmu tan tak tak a. Sikul bàn a hun daih tawh hi a lo ni a.

Gideon-a ka hmuh rual chuan ka tho hluai a. Zaizirin ka ko hrang a. Chhantei te in thlanga garage sírah chuan kan ding a. Chhantei pa chanchin—truck a khalh thin thu te, Mizoram leh Vai ram hmun hrang hranga a zin reng thu te, hmeichhe inzuar a buaipui thin thu leh chu chu a nu’n a hriat chhuah thute chu a sawi melh melh a—zawi të të-in.

‘Sex workers ti ila, hacker-ten an bum a ni àwm a… Chéng sïng chuang fé a hmang ral tawh,’ Gideon-a chuan a ti ta a.

Hre lo àwm deuhin, ‘Engtin? Khawi atangin? KS maw!?’ ka ti hú a.

‘Facebook atangin. Hmeichhia anga account lem hmang ten an bum a. A hnuah a video tih leak out-saka Chhantei nu thawnah te an vau thìn a ni àwm e. Pawisa a nei daih…’ A sawi zêl a; ka ngaithla reng a. Min hrilh lo mah se ka hre vek tho a—chiang takin! A tàwp lamah, ‘Nizàn khán a nu hi damdawi in atangin a chhuak ru a. A pasal phone be lai a chhuhsak thut a. A lo ä lo nasa mai a ni àwm a. Chem a la lawk a…’ Ngaihthlâk chu ka ngaithla zo lui hräm. Ka sawi chhäwng ngam lo thung!

Epilogue

Zirtàwpni tlai a ni a. A pa thih atanga a kár thumna leh ni khatna chiah a ni, Chhantei nèn chuan kan thutthlêngah kan thu ngawi reng a. Kan vêlah chuan nui khêk uar uar tùr tù mah an awm lo. Thereng leh rannung hräm rî leh sava chiap rî tih mai loh chu thäwm hriat tùr a tam lo. A reh … tih lëmah thliin hnah a rawn chhém ri leh seng seng thìn. ‘I tha zêl em?’ tih bâk, ka ká atanga chhuak tùr “thu” ka pai hlawl lo!

Chhantei chuan hnuai lam bih ngur chungin, ‘tha zêl e. Puia, kan chhúngkaw chanchin ka hrilh duh ngai lo che a. Tünah a chhe ber i hre ta vek si a!’ a rawn ti ta a.

‘A ho e!’ ka ti ringawt! A hoh loh nèn! Ka ngawih det hnuah, ‘A! Tùte paw’n chanchin sawi nuam lo kan nei vek aläwm,’ tih nacháng ka hre leh hlauh! 

‘Chhante, ka dam leh theih nán tün tum chiah hi chance min pe la, min ngaidam hräm rawh aw,’ ka ti zui a. Min chháng lo mah se, Chhantei hnênah chuan zêp leh thup nei loin ka thu rûk thuhrûk chu ka sawi chhuak ta vek a. ‘Min ngaidam thei lo mah la … ka dem lo ang che,’ tiin ka tàwp a ni.

Chiang khel khawl tak hian Chhantei chuan, ‘Ka ngaihdam tùr i ni em tih pawh ka hre chiah lo,’ a rawn ti! A ngaihna ka hre lo ngei mai! ‘I thil sawi zawng zawng kha ka hre vek tawh aläwm. Mi dang anga táng ve tùr i nih laiin ka sawi felsak tawh che! Puia, min ngaidam zâwk rawh aw…’

‘Eng a!? Eng vàng … in!?’ Chu chu hawrawppuiin ka sawi niin ka inhria! Tin, engtin nge a hriat vek theih!? Chu kher chu ka zâwt ngam lo!

‘Inchhïra sima A lam hawitute chu Pathianin a ngaidam leh thei a nih ngai chuan, ngaihdamna chu ka chang ang. Mahse, mihring ka ni si a…’

‘Chûng sawi kual chu a hun lo! Eng nge a awmzia!?’

Ngawi rengin phone a phawrh a. Ka en reng a. Telegram-a “Mr. x17” tia a save-in message a rawn thawn chu a hawng. ‘E! Ka hmu chiah!’ a ti a. Ka zu bih ve zawk. E khai le!

Chhantei pa thih thu ka hriat ní-a ka call tlang theih loh, Telegram-a message ka thawn—kan hotupa emaw ka tih khân ka message chu a hmu chiah a, a chhiar ta a nih hi!

Kan ngawih reng hnu chuan, SMS chauha inbiak duh thìn Chhantei chuan, ‘Kan duh rëng vànga tel ve kan ni chiah em? Keini meuh pawh kan lo inhre miah lo a nia…’ a rawn ti chhuak a. A zawhna chu ka chháng thei lo!

Chhantei nèn chuan “thil engkim” kan sawi dùn ve ta a! Kan thu hlen dáwn ta emaw tih hial tùr khawpa rei kan thutthlènga kan thut hnuah, engtikah nge ka hmuh leh dáwn tih pawh ka hriat loh, naktûka a Ní-te khaw lama min awm bosan tawh tùr ka thiannu chu, two wheeler taxi dinna lam ka panpui ta a. Khua chu a thim ruai tawh si a…

—A tàwp ta.—