Fur khaw dul riai karah, hnawm chip chepin Lehkhabu dah khawmna hmun chu ka thleng a, chhiartu neilo khawhar taka an pindan luahtu keutu leh bihtu neilo Lehkhabu chi hrang hrang te chu riang takin an lo inrem thap a. Chu Lehkhabu dah khawmna pindan chu hriau pawh tla se, a ri a hriat theih ang tih hial khawpin a reh a, Lehkhabu ngainatu tan chu bâk a, hmun nuam chu he khawvel ah hian a awm kher ang em aw ti a, ka in ngaihtuah lai chuan, ka Lehkhabu chhiar tur zawn pahin, dawhkan kil khata ngawi renga lo thu Nula a hmelhmang atang pawha, a chhiar laia rilru pe tak mai chu ka lehkhabu chhiar tur nen ka va pan a, a bulah kher ka va pan hi tlawh tu neilo Lehkhabu dah khawmna, hlut tu a nih vang a ni.

Ka kal chhan Lehkhabu chhiar pawh ngaihsak hman lovin, pindan reh tak kar a,a Lehkhabu phek keu ri chuan ka suangtuahna leh ka rilru a keu dawrh ta mai!. A lehkhabu chhiar tui ti tak mai chu hmuhnawm ka tih em avangin chhiar tura kal khan zawhna ka nei a, titi tura kal ka nih loh zia inhre tho chungin lehkhabu chhiar phawt ka rilruk a, ka duh ang ka chhiar zawh hnuah, titi pui ka châk em avangin leh a nun awhawm tak, ka keu chak lûat avangin ka rilru a ka vei zawng sawiin ka phun ka phun a, chu lehkhabu chhiarna pindan atang chuan lehkhabu chhiar pahin langtlang nun kan keu tan ta.

Harsatna hian nun a ti hlu a, thil awmzia min hriat fiah tir a, nunkawng tha zawk kan zawh theih nân kan paltlang a ngai fo thin. Thil hlutna hre tur chuan, pangngai rengin a awm theih loh a, harsatna in min tlakbuak chinah chiah hian a hlutna kan man phak thin. Kan dai chin atang ringawt pawh hian han ngaihtuah let ila, harsat avangin beih kan ngai a, kan beih phawt chuan a tawpah hmuingilna a awm thin. Thil reng reng vang tak te hi a awmchhun chu kan hlut in kan ui hle ang. Awlsam taka neih mai theih a nih loh avangin. Thil hmuh leh neih mai mai theih loh, te chauh hi mi kan hlut le?

Awlsam taka neih mai theih, a dang a la awm alawm tih rilru kan put vang em ni, eng pawh hi kan ngaih nep a, kan lak nep viau thin chhan? tiin hluttu neilo Lehkhabu dah khawm naah chuan kan rilru suangtuah te hmangin kan tlakhniam tâk em em Lehkhabu chhiar hlutna chu am takin kan sawi dun zel a. Chuai hun nei par te chu an til thin a, Lehkhabu erawh chul thei mahse tuaihnum theih a ni a, kangmei vangin a ral thei tih mai chauh a ni. Kan khawharna hnemtu ber thu leh hla chuan kan nun hi a hruai tha in a hruai sual thei a. 

Amaherawhchu hriatna nghet leh tlo, fai sa ring ang maia ziaktuten Lehkhabu tha tak tak min hnutchhiah hi, daifem kawm kar a, luah loh run chan changin chhiartu leh hluttu a va tlachham ta em. Pindan reh leh riang tak atang chuan, hringnun chu a kam kan keu det det a, kan keu zel a, thuhmahruai ah ringawt pawh kan va tui si em. A chhungah thu tam tak leh tha tak tak a awm ang chiah hian, hringnun thu lai mu kan hmuhdan chu, kan keu tan ta.

Thuhmahruai phek ringawt chuan hringnun lai mu a teh zo lo, a kawm atanga en ringawt chuan chhûngril kan hmu phâk silo. Khawvel cham chhunga hlutna nei kha, piallei a zalh a nih khan a hlutna lak kianin a awm a, par angin a chuai mai thin. Lehkhabu erawh hring chan chhungin a awm reng anga, kan tichhia a nih ngawt loh chuan, Pathian thu Bible ngei pawh a thawk khum, Finna Bu a ni a. Hring mi te hian kan nunkawng hruaitu atan kan rin ber a ni. Bible tak ngial pawh chhiar peih lo, phei chuan Lehkhabu chhiar chu kan hlat hle tih a hriat. Chhiar tam chuan hriatna a ti pung a, Pathian thu ngeiah pawh Pathian lokal hma zawng lehkhabu chhiar kan uar zel tur thu hi chiang takin a inziak reng a ni :-I Timothea 4:13 Ka lo kal hma loh zawng chhiar te, thu hrilh te, zirtir te bei uar rawh tih ziak ang khan khawvel kan cham chhung hian thu chhiar te, thuzir te hi kan tih makmawh a va ni em. 

A thu kan chhiar chuan, Finna tam tak a awm tih kan hria a, hre reng chungin kan hlutzia hi kan hrethiam silo. A thu pawh kan chhiar peihlo laia Lehkhabu chhiar tura in zirtir chu har tak a ni ngei ang. Pathian thu hlutna man pha tu chuan a thilsiam leh a din hringmi Lehkhabu siam chu Pathian atanga chhuak, thiamna leh theihna Pathian atanga a dawn a ni tih hriat sakin, a hlutna a man fiah thin. Hriatna leh finna neih belh tum a, Lehkhabu dahkhawmna in tlawh fo tu chuan, hriatzauna mai nilo finna tam tak a chhar chhuak ngei ang. Pindan riang leh reh tak chuan khawharna hnem tura pan thin tu te chu nghakhlel takin a lo hmuak thin ngei awm si a.

Bung thar keu zelin, a tlângkawmna keu meuh chuan hringnun inthlak kual leh inher zel chu keu lanin a awm a, tehkhinna ngai bawkin in a zawm zat a, Lehkhabu bung chhiar zawh chu keu in, a lan dan pangngai reng leh bung tharah min hruai lut thin a. Lehkhabu leh Hringnun hi inzawm ang maiin nunhlui ah min kai let thei a, a en let theih miau si a lawm le, hringnun ah erawh bung thar kai nan a beih a beih tak meuh meuha beih a ngai a, Lehkhabu chhiar pawh a changin kan lungngai a, fuihtu emaw thu hlimawm, a chhiar tu te rilru sukthlek  ti danglam dawrh thei a ni bawk a. Nun nen a inzawm tlat reng a ni, a ngainatute tan a thlah mai mai har a lo ni reng a nih hi maw. 

Chu Pindan riang, finna leh hriatna dahkhawmna, hlut nachang kan hriatloh tlawh tu nei mumal lo, a hlut thiam te ti tleitu, fur khaw dul reih ruih kara ka va leng lut chuan ka rilru suangtuahna a keu danglam kher mai, hluttu a neih mang loh zia ka hriat chuan, chona min siam nghetin a aia uar zawka Pathian thu a inziak ang ngei pawh a, Lehkhabu chhiar bei uar tur kan nih zia min hrilhfiah chiang kher mai...