Thuthang awm sa leh mi thenkhatin an lo rin lawk chu independence day a prime minister Narendra Modi thusawi khan a rawn nemnghet ta a, kum 64 chhung zet India ram hmasawnna tura ruahmanna siamtu, tun dinhmun a thlen theihna tura a kipui ber pakhat Planning Commission chu tihtawp a nih tur thu a puang a. Tunlaia India ram economic kalphung nen a inmil tawh chiah lo a ngaihna a awm avangin khawvel huap economic dinhmun inher danglam zel nena inmil tur institution din a nih tur thu prime minister hian a sawi bawk. Planning commission hi Nehru-a kutchhuak anga ngaih a ni a, Soviet Union (USSR) hmasawnna (Soviet model of development) a tuipui vanga din a ni nghe nghe. Zalenna sual lai kum 1931 a Karachi a Indian National Congress inkhawmpuiah khan ram hmasawnna tura hmalak dan tur an ngaihtuah a, Nehru-a ngaihdan angin thutlukna pawh an siam zui a, chumi hnu kum 1940 khan national congress chuan planning buaipuitu tur leh sorkar inrelbawl dan tur duang chhuak tur sub-committee pahnih an din a. Mahse, zalenna suala an buai avang leh indopui pahnihna a lo chhuah tak thut avangin committee chuan 1948 khan report chu a peih ta chauh a. Independence hma kum 1946 a Nehru-a ho a sokar thar tur lo siam lailawk (interim govt) ah khan Planning Advisory Board din ni ta a. Kum 1950 March khan Planning Advisory Board rawtna chu bawhzuiin cabinet meeting-in Planning Commission chu a din ta a, Prime Minister (Jawaharlal Nehru) chu chairman hmasa ber a ni ta a ni. Planning Commission hi ram hmasawnna tura 'Plan' (Ruahmanna mumal tak) siam tura din a nih ang ngeiin mihring thiamna leh theihna hmang tangkai tur zawng te, leilung hausakna chhawr tangkai tur leh mipui mamawh phuhru tur zawngin ruahmanna a siam thin a. Hmasawnna ruhrel 'Infrastructure' hrang hrang (Power, kawngpui, hriselna lam, zirna lam, inbiak pawhna, etc.,) dinna atan leh mipui mamawh hrang hrang siamchhuahna atana ruahmanna tha tak siam hi a hna pui ber pakhat a ni thin a, a tum ber pakhat chu rualkhai zawka hmasawnna thlentir leh hmun chengker zawkte dinhmun chawikan hi a ni bawk. Chuvangin, ram hmasawnna lam hawi bika sorkar laipui hmalaknaah chuan a kipui ber a ni a, ministry of finance nen hian thuneitu sang ber an ni ve ve a tih theih ang. Independence hlim, 1950 chhoah khan India ram dinhmun hi a tha lo hle a, sorkar thar khan retheihna leh harsatna chi hrang hrang a hmachhawn nghal mawlh mawlh a ni ber a. Chutiang karah chuan ram hmasawnna tura a innghahna pui ber chu Planning Commission hi a ni a, tun dinhmuna India a thlen theihna atan hian a thawhhlawk reng bawk a ni. Inrelbawlna lamah chuan planning commission-ah hian prime minister hi chairman a ni a. Mahse, hmalatu ber leh commission awptu ber chu deputy chairman a ni a, deputy chairman-ah hian mithiam chungchuang leh huhang nei tham deuh, a tul huna politician-te pawh nek thei turte ruat an ni thin a. Sorkar hna an lo thawh tawh dan azirin cabinet minister tlukpui emaw minister of state tlukpuiah emaw dah an ni thin. Chairman leh deputy chairman bakah hian mithiam engemaw zat member an awm bawk. Planning Commission hi India ram kalphung tur duangtu lu ber, National Development Council kaihhruaina hnuaia hnathawk a ni ber a. Sawi tawh angin five year plan leh annual plan duangtu a ni a, state hrang hrang annual plan pawh a buaipui thin bawk. Heng bakah hian plan programmes, projects leh schemes hrang hrangte a vil zui bawk. Chutiang khawpa ram hmasawnna tura pawimawh ni mahse, rin ai takin uitu erawh an tam lo niin a lang. Prime minister-in, "A chang chuan in hlui chei that hi a tulna lai a awm mahse, sum tam tak sen a ngai a, duh ang taka chei that erawh a har thin a. In thar diai sak mai hi tha kan ti zawk a. Chuvangin, Planning Commission hi kan thiat anga, a thlaktu tur thil thar kan din ang," a tih hian planning commission dinhmun tlak hniam tawh zia a tarlang pawh a ni maithei. A tirah khan sorkar (cabinet) thutlukna (Executive order) hmanga din mai a nih avangin awlsam taka thiah theih mai a nih hmel a, Parliament rorelna kal tlang kher pawh a ngai lo ang. Enge thiah a nih chhan? A chhe zawnga sawi duh tan chuan planning commission hi sorkar laipui ministry hrang hrangte lakah pawh a inluling fo thin a, state sorkarte hi a thuhnuaiah an kun vek zawk a tih theih hial ang. A chang chuan sorkar laipui hian state sorkar thenkhat hrekna leh thununna hmanrua atan a hmang ang hial pawhin a ngaih theih awm e. Chumai a ni lo a, state thenkhat a duhsak bik leh a laka tlatlum bik an awm anga sawi te pawh a awm fo a, plan sum semtu ber a nih avangin state sorkar tan biak chhiat ngam an ni lo a, a nihna takah chuan an duhsak zawng nih hi a manhla thin viau a ni. Plan siamtu leh plan fund semtu a nih bakah hian harsatna siamtu a nihna lai a tam tho mai a. Chungte chu Gujarat Chief Minister hlui, tuna Prime Minister hian a hre chiang tawk viauin a rinawm a, chu rilru atanga tihtawp tum ta pawh a nih hmel viau a ni. Mahse, hetia tun hnaia a chhe lama planning commission an sawisel luai luai lai hian state pachhe zawkte leh sum thawh chhuah nei mang lo hmarchhak state hrang hrangte tan hi chuan a hlu khawp mai. Zep thu a awm lo a, state annual plan siam chungchangah te leh chumi atana sum mamawh dil chang hian planning commission hian (a bikin) hmarchhak state hrang hrangte hi a duhsak thin viau a. Kum tina Mizoram annual plan pun chhoh dan atang pawh hian chu chu a hriat theih awm e. A tawpna atan chuan sorkar laipui hetiang a thlen takah chuan state sorkara planning board pawh hi thiah ve mai chi a ni ang em? Mizoram a Planning Board kalphung te, an hmalakna te, a inrelbawl dan te hi ngun takin han en ta ila, sorkar hmalakna hrang hrangah hian pawimawhna tak tak a nei meuh em, a nih tur ang hi a ni phak meuh em? MNF sorkar lai atanga tuna congress sorkar thleng hian planning board hian meeting an neih kan hre ngai lem lo a. Tunah hian chairman leh vice chairman bakah member-secretary pahnih an awm a, member an awm lo thung. Tunhma phei chuan member-secretary hi an awm ngai lo a, chief secretary-in member-secretary hna a thawk mai thin. Cabinet rank member-secretary pahnih neih hi sum tihektu mai a ni zawk lo maw? Chubakah tunhmaa planning board hnathawh thin tam ber kha planning secretariat lamin an chang tawh a, plan sum hmanga hnathawh te endik (monitoring, evaluation and appraisal of projects, programmes) hi an hna pui ber a ni lek tawh a. Hengte ngaihtuah vang vang hian state planning board hi kan mamawh rei ang em? tih hi zawhna awm thei tak a ni ta.