Kum kua vel liam ta 2004 khan Aizawl nula pakhat rawng taka thah a ni a, a thattu a puh vai pahnihte inpuanna chu khatih laia kartin chanchinbu Zozam-ah khan KAN chhuah a. Chutia court-in thutlukna a siam hma leh police pawhin an la chhuichhuah hma hauha pawikhawiha puhte inpuanna (tunlai a lar em em statement kan tih ang hi) tlangzarh a lo ni ta chu police lam ngaihdan a ni lo hle a, Zozam enkawltute pawh min koh hial an tum a ni. Kum 2007 pawh khan Zozam chanchinbu a kan thawh lai bawkin SRS kuta awm laia thi pakhat chu RTI Act hmangin a ruang endikna (post-mortem report) police hnenah kan dil a. Min pe phal lawk lo a, mahse a tawpah chuan hreh tak chungin min pe ta hram a, an uizia kha ka la hre reng. Tun hnai lawk thleng khan chutiang chu Mizoram police-te rilru put hmang a ni. Police hnen atanga thubuai kal lai mek leh an thil chhui lai document neih a harsat zia leh an hmalakna chin pawh puanzar an hreh thinzia hi chanchinbua inhmang chuan an hre vek awm e. Mizoram sorkar hnathawk zingah police tluka document/file ui an awm lo ang tih hial a ni thin. Kum 2003 MLA inthlana Suangpuilawn biala candidate pathum rukbo chungchanga inquiry report pawh kha kum li vel liam hnuah Zozam chanchinbu bawk hian Home department-ah RTI Act hmangin kan dil a, chu pawh chu pek chhuah harsa an ti khawp mai. Tunlai khawvelah hi chuan thil inthup hi a awm thei tak tak tawh lo a ni ber, sorkar kalphungah pawh hian engkim mai hi a langtlang zawnga kalpui a ni tan mek a. Hmun dangah chuan tualthahna leh pawikhawihna lian tham mipui ngaihven tur chi a thlen changin police-ten an hmalakna chin media kal tlangin an puangzar fo thin a, a bikin post-mortem report te phei hi chu an thup vak lem lo. Mizoram police erawh an dang bik tlat thin, pawn lam thilin an hmalakna a tihbuai an hlauh vang pawh a ni anga, thubuai kal lai leh an chhui mek lai a nih chuan an puangzar mawh thin khawp mai. Mahse, tun hnai lawk atang khan police kalphungah thil a inthlak danglam nasa hle tih hai rual a ni lo. EVM tichingpena inpuhna thu kal zelah police hmaa mi thenkhat inpuanna TV leh chanchinbu lamah kim chang taka puanzar a ni ta fo mai a, a mak khawp mai. Chu aia mak zawk mah chu political party-ten police hnena mi inpuanna (statement) a copy siam punga an sem darh leh zel hi a ni, social media - facebook, whatsapp, etc., ah te nasa zawkin a darh chuai chuai thin a nih kha. Thilsual ti a puhte leh suahsualna thila inhnamhnawiha rinhlelhte hi police-in an man thin a, court-in an chungthu a rel felsak hma chuan thiam loh chang an la ni bik lo a. Police hmaa an inpuanna pawh hi court-ah an pha leh thei bawk. Thu tawp a la ni lo a, a hnuah an la thlak danglam leh thei tho. Chungte a nih avang chuan police lam hian an mi mante inpuanna hi an tlangzarh mai mai ngai lo thin a, an thil chhui lai nena inkaihhnawih thil dang a awm theih avangin mipui hriata an puanzar chang pawhin a vai vaiin an puang ngai meuh lo thin. EVM tichingpen a inpuhna hi a thubuai a lian tham tih a chiang a, inpuhnaa hming lang chin ho pawh an hraw tlang khawp mai. Chuvang chu a ni maithei kan police-ten an kalphung pangngai pel rawk a an mi mante inpuanna an tlangzarh chiam chiam thin ni. Mahse, chu chu ngaihtuah chianin police tan a pawi thei a, mipui tan a tha lo a, sorkar tan pawh a him bik lo thei ang. Hetiang a nih te chuan misual an mante pawh hi (an inpuanna a ngai ngaia a darh chhuak dawn a nih chuan) an inpuang tha duh tawh lo mai ang tih a hlauhawm. Ngaihtuah chian a ngai khawp mai. Tunhma atanga kan police-ten an tlakchham fo thin chu media nen a an inkar siamthat hi a ni. Buaina lian tham deuh a lo chhuah chang phei chuan media kal tlangin mipuiin police hmalakna kan lo chang thup thin a. Mahse, police lam hian engmah tak tak hi an puangzar ngai lem lo a, court thutlukna chauh hi mipui hriat turah an ngai ni berin a lang. Chu lah chu hun a duh rei viau bawk si. Chuvang chu ania, pawikhawihna leh a kaihhnawih thil, mipui ngaihven zawng a lo thlen chang hian ngaihdan mak pui pui a tam em em thin ni. Police hian an thil chhui lai pawhin mipui ngaihdan kal sual nasa lutuk tur ven hi an tum tel tur a ni a, media kal tlanga a awm tawk puanzar thin hi an tih tur pawimawh tak niin a lang. Hman deuh khan Mizoram DGP pakhat chuan police leh media inkarah harsatna a awm fo chhan chu a tul chin mipui hriat puangzar tur PRO (Public relations officer) an neih loh vang niin a sawi. A dik ngeiin a rinawm. Tun hnaia home minister-in an mi man pakhat inpuanna chipchiar taka a lo puang ve ngawt mai leh a hma deuh a chief minister-in press conference a sawi chhuah atang ngawt pawh khan DGP hlui thusawi pawimawh zia hi a chiang viau a ni. Home minister hian party mite hmaa sawi loin police hotu lawkte nen ngun takin sawiho phawt se, chumi hnuah thuthar theh darhtute kawm zawk ta se a kalphung a dik zawkin a rinawm. Chanchinbu mite pawhin zawh belh tur an nei ngei ngei ang a, mipui pawh an hmin zawk ang. A tawpna atan chuan a chunga tarlan police kuta awm mek mi thenkhat statement puanzar thin chungchangah hian police hotute a pawng a puia dem erawh a fuh lo maithei. Hetianga an tih chhan hi chung lam atanga nawrna vang a nih a rinawm zawk mah. Mi tam tak chuan hengte hi police thuchhuak ni loin ministry thuchhuak a nih an ring zawk hial a ni. Chuvangin, thil pawimawh tak mai lo lang ta chu, politician-te inbeihna tawngkam takin Mizoram police hi an 'kut phuar sak' ni lo se, zalen tak leh fim takin kal zel se, tih hi a ni. Tun hma pawh khan an hmalaknaa ministry a inrawlh ni a a lan chiah hian rinhlelhna a lo piang duh khawp mai. Pawi lian tham an chhui chang hian mipui chiai tur leh mipui ngaihdan kal sual tur erawh ven nachang hre deuh deuh ta bawk se. Chumi atan chuan media kal tlanga mipui hriat tura puanzar chin tur te pawh thliar thiam a tul viau awm e. — Lalthlamuana Ralte