Party-a ruh tawh vek vek hi chu an ruh thei khawp a, thiante pawh thlauhthlak phah ngam, chhungkhatte pawh do duh hial te pawh an awm thin. UT hunlai atanga inthlan chungchang titi langsar tak, 'Vawkpui pawh nise Mizo Union a nih chuan a vote tho ang," tih hi kan hre fo anga. Mi tam tak chu hetiang rilru pu hi an la ni. Chutihlaiin, thenkhat thung chu thlengtlawr zuan ching, sam lam taka party awmna thlak zung zung thei an ni lawi a. Sorkar tur hre fuh chat chat, inthlan dawna inpe thin pawh sawi tur an awm nual bawk. Party awmnaa nghet tlat, an chhiat ber lai pawha chhuahsan duh miah lo te hi chu pa rinawm tak an ni duh viau a, policy leh thil dang ngaihtuah lem lo a pawng nghet mawl ve tawp pawh an awm tho awm e. Tuna kan dinhmunah hian Mizoram pum huapin party lian zual pahnih a awm a - tualto party MNF leh national party Congress te hian khaw tin leh veng tin an dap chhuak a, a lian ber leh a dawttu an ni zel. Kan ram political history thlir hian kum 1946 atang khan political party engemaw zat a lo ding tawh a. District Council hun lai atanga tun hun thleng hian sorkar siam thei party hi kung zungtang thliah tham lek an la ni. Chung zingah chuan kum 1961 a din party pahnihte hi an ziding chho ta ber rih a ni. Kan politics hun kal tawh atanga thlir hian party Mizoramah hian party lian inbei tawk tak pahnih aia tam hi an awm ngai lo a. Tam tak chuan pawm har kan ti maithei a, tun thleng hian party lian, intiat tawk tak pahnih aia tam an awm thei rih lo chu a nih hi. U.T. kan nih hnuah party ziding ber Mizo Union leh Congress an in merger a (congress-ah an in chhung lut a ni zawk). Congress zawm ve duh lo a, Mizo Union la chhawm nung tawk an awm a, party dang din tawk an awm bawk a. Chutiang karah chuan P.C. party kha a lo ding a, a vung ta em em a, sorkarna pawh an siam zui ta a nih kha. Mahse, national party nge nge chuan fuat an lo nei deuh bawk a, Delhi lama an hotute an hmang tangkai a, mipui duh em em 'Remna leh muanna' auhlaah an hmang a, an tifuh bawk a, 1984 inthlanah sorkar an siam ta hial a. Chuta tang chuan Pu Lalthanhawla hun a intan a, Brig. Thenphunga a pil tan a, a party a zuih te tial tial bawk. Rambuai a lo reh a, vai ram lama zawm nei (national party) Congress leh dan pawn a hnawl tawh hnu tualto party MNF te an inbei tawk chho viau a. Party dangte awm mahse anni pahnih inbeihna karah hian an lian tak tak thei lo. Chu chu vawiin thlenga kan dinhmun a ni. Kum 1998 a CCF in an vawrh chhuah, tualchhung party tenau pahnih MPC leh ZNP te thlawp Dr. H.Lallungmuana MP(LS) atana thlan tlin a ni a. Party lian candidate ni lo MP a thlantlin a ni nawlh mai kha thil chhinchhiah tlak tak a ni. Mahse, state kan nih hnuah hian MLA inthlanah thung chuan MNF leh Congress party hruai sorkar kan hrawn chho zel thung. Kan hun kal tawh atanga lang chiang tak chu party lian pahnih hi khaw tinah an inthlung nghet tawh em a, party tenau zawk tan khin an huphurhawm tak zet a, mipui nawlpui pawh hian an ni pahnih bak hi sorkarna siam thei an awm lo turah an ngai ni maiin a hriat. Chutiang a nih vang chu a ni maithei inthlan dawnah party te zawkten an bel fo a, MPC phei chuan party lian an thawhpui thin bawk a MLA an nei ziah a nih hi. Kum 2013 MLA inthlana thawhpui nei duh lo ZNP hian MLA an nei lo thung. Kum 2008 inthlanah khan MPC leh ZNP leh pawl dangte United Democratic Alliance (UDA) hming puin an thawkho a, MLA pawh pali an nei nghe nghe  a nih kha Kumin inthlanah hian kum 2008 inthlan ang deuh khan MPC leh ZNP an thawk dun leh ta a, pawl dangte nen inthurualin Zoram Peoples Movement (ZPM) an din a, party mal hming ni loin independent-in an chuh dawn. Kumin inthlanah hian political party tharlam tak PRISM in an chuh dawn a, vairam lama zawmpui nei BJP te, NPP te bakah pawl dang dang hming a chuh tur an awm nual bawk. Inthlanah hian party chakna ringawtin hnehna chan theih a ni ngai lo. MNF leh Congress hian member an ngah ve ve ber anga, voter zawng zawng a 25%-30% vel an nei nei ve ve turah ngai ila. A bak 2%-5% vel hi party dangin insem leh ta se. Sorkar hnathawk te, party-a awmna nei lem lo te, party a tel ve tho mahse nghet bur lo, duh duh vote thei te hi 40% vel zet chu an ni ang. Heng Neutral kan tih mai te hi sorkar siam thintu ber chu an ni zawk. Neutral hawi lam hi hriat a har viau a, hun kal tawh thlir chuan term hnih sorkar ngai hrawn hnuah hi chuan neutral kan tihte hian an ning hman viau thin a. Sorkar a inthlak thin. Chutiang chu kuminah hian a thleng ang em? MPF hmalakna vang te, kohhran leh YMA te hmalakna avangte hian boruak sosang tak awm lem loin kan inthlang thin a. Chuvangin, mipui nawlpui sukthlek leh an vote dan tur (voting behaviour) hriat thiam a har viau rih. Party-ho inbeihna lian tak tak - zu chungchang te, chal hnawihsen chungchang te, kawng chhia te, corruption chungchang te, BJP (hindu party) nena thawhho chungchang te hian neutral tam tak vote thlakna tur a hruai ngeiin a rinawm a. A eng ber hian nge mipui hmin ang tih a hriat rih lo a, eng party emaw chuan an tlin phah ngeiin a rinawm. Inthlan hmaa campaign auhla tam tak hi vote thlak dawn tak tak hian min hruaitu a ni kher em? Entirnan, chal hnawihsen te, zu zawrh te, kawngchhia te hian inthlannaah nghawng a nei tak tak em? Chutihlaiin, kum 2008 leh 2013 inthlanah kha chuan NLUP hian awmzia a nei viau tih erawh a chiang. Pachhunga University College a Economics zirlai (Vth Semester) thenkhatin kum 2013 a MLA inthlan chungchang kha an zir chianna atanga an hmuhchhuah dan chuan NLUP khan awmzia a nei hle a, congress party-in MLA 34 lai a neih phahna chhan lian tak kha niin an hmuchhuak. Kuminah hian SEDP te, NEDP/NLUP te, Sawhthing market te an zuar leh hlawm a. Hengte hian voter-te a kaihhruai ang em? Tlinpui tham khawpin awmzia a nei ang em? Nge ni a, an thil zawrh ni loin an inbeihna langsar tak tak - Zu zawrh, BJP thawhpui, Kawngchhia, etc., hi an chak loh phah zawk ang. Ram tana tha tur tak tak ngaihtuah mi, thil tha tih tum tak tak, mi tak tak, corruption do tak tak ngam tur thlan chhuah tum ta tlat mai ila kan party lian langsarho hi mipui hian an hnawl mai thei. Dai buak leh pal chhiat la nei tlem zawk candidate-te hi an tling mai thei. Mahse, inthlanah hi chuan tam hi a pawimawh a, party lian beh chhan lo tan chuan tlin a har em em a. Dawt bill lo la tawh te, corruption leh thil danga hmingchhe tawh te, an thenawmte leh anmahni hre chiangten an nin em em pawh an tling leh luau thin a nih hi. Engpawhnise, rilru fim tak puin, tling tura rin ni lo, ram hruaitu atana kan duh ber theuh hi thlang thei ila... chutiang thlan tur hre lo tan NOTA a awm tho bawk.