Covid-19 hrileng chuan hun rei tak min tih buai hnuah kan ziaawm chho leh ta deuh a. Chuti chung chuan tunhnai chho ah India ramah a rawn pun belh leh hret niin a lang a, kan state ah pawh kan pung leh hret niin a lang bawk. Chutiang avang chuan inthlahdah a la hun hrih loh ani tih pawh kan mithiamte’n an sawi a, a bik takin mask vuah that a pawimawh reng hrih tih kan hriat tlan a pawimawh hle mai. Covid-19 thlentu Coronavirus hi a mak ang reng khawp mai a, khawvel mithiamte pawhin an zir thar/belh zel a, harsatna a thlen dan hi a in ang lo nuk mai a, hri kai dam leh tawh kan tih zingah pawh insawiselna neih chhunzawm engemaw zah an awm a ni.

    Tun tuma kan sawi tur hi chu Covid-19 hri kai tawh hnua insawiselna nei chhunzawm, a then phei chu hun rei deuh tak pangngai hlei thei lo te an ni hlawm. Chutiang chu Post-Covid symptoms emaw “Long Covid” ti te pawhin an sawi. Covid-19 hri kai zinga a tam ber chu insawiselna nei chhunzawm lovin an dam leh mai a, mahse 10-20% vel chuan he Long Covid hi an nei niin mithiamte chuan an sawi a, chutiang ah pawh chuan a then chu rei lem lo (thla hnih khat) te an insawisel laiin thenkhat erawhchu kum a vei hnu pawha la pangngai hlei thei lo te an ni thung.

    A lan chhuah dan emaw insawisel dan hi a in ang lo nual a, mahse a common zual te chu – chau/zawi ngawih ngawih, tihrawl rawl thum reng mai te, thawhah reh hlei thei lo, khuh reh thei lo, awm na (chest pain) te, khawsik ser ser reng te, rim hriatna emaw thil tui leh tui lo hre hrang thei lo (loss of smell or taste) te, rilru lam effect (thil ngaihtuah hlei thei lo, thil hre rei thei lo, ngaihtuahna buai deuh, zan mut harsat, thlaphang thut thut) te, ek mumal hlei thei lo te an ni hlawm. A then chu reh mang lova a tihbuai laiin thenkhat erawh chu an han ziaawm viau hnua lang chhuak leh thin te an ni hlawm. Heng harsatna te hian an nitin tih tur hna emaw inchhung lam mawhphurhna a ti buai fo bawk a ni.

    Mithiamte sawi zel danah chuan hri kai atanga a kar khat chhunga khuh reh thei lo, aw chhang, lu na, kawtha lo, chaw ei peih lo, thawhah nei te chu Long Covid harsatna hi a let hnih thum velin an nei duh bik niin an sawi a ni. Long Covid harsatna hi thla thum hnua insawiselna reh thei lo te an sawina a ni a. Covid hri kai, symptoms nei te chu an dam fel hun chhung kha thla thum angah ngaih a ni a, thla thum hnuah pawh insawiselna an la neih fo chuan Long Covid nei angah an ngai a ni.

    Kan sawi tak angin tunge he Long Covid symptoms hi nei dawn tih a hriat lawk theih loh a, chuvang chuan hri kai tirh a insawiselna nei em em lo an nih pawhin midang a\anga an kai nawn loh nana invenna lam uluk kha a pawimawh hmasa ber chu a ni. Hei bakah hian ei leh in uluk te, taksa sawizawi that te hi a pawimawh hle. Rilru lam harsatna nei te hi a buaithlak zual hle mai a. Chuvangin hetiang insawiselna nei te chuan Psychiatrist pan thuai thei se a tha hle. Insawiselna dang nei te pawhin Medicine Specialist te hnenah inentir nachang hriat a pawimawh bawk. Kan hriat belh tur erawh hetiang Post Covid symptoms nei te hian midang ah an kaichhawng thei lo thung.