Pu Bùla Rilru: Pu Bùla chuan chokaa thingpui paw thlum in pahin an véng YMA chanchinbu a chhiar a; Bourbon bisikút a hmeh bawk. LLTF-ten an thâ ti chak tûra tanpuina sum fai an dawn chu a belh thlâksak diat diat a, ‘Hêng sum zozai hi eng atân chuan hmang hlawm tak ang maw? A dawn hna thawka ni lênga thü taka thut ve hmün te chu ka thiam ve záwng tak. A hman chhuahna tár lang leh ngam chuang bawk si lo!’ a ti vei nuah nuah a—a rilruin. An vénga thlai thar rawn petu an ziah lanna thupui a chhiar lai chuan, ‘Keini chu sem kân tùr number one!’ a ti rilru leh tho. Mahse, a chhiar chhuak dap; tih tùr dang nei hek lo le.

Dik tak chuan Pu Bùla rilru chu a lãwm zân lo… pawh a ni lo, a vui a ni mah zâwk. Chanchinbu a chhiar lai chuan an kawtah bike a rawn rüm vak a; a phu uih. Bike rùm rin tluk zetin, ‘Tute nge a? An va mãwl ve!’ a ti ve tuar a. A fate chuan Task Force duty an nih thu an hrilh rualin, ‘Anni lah hi, hman lutuk hlawm mai. Páwn chhuah châk thlâk lutuk!’ a ti leh hlur a.

A thingpui in zo chuan calendar a thlír vung vung a, ‘Va’n rei tawh tak!’ a ti hmuk a, vawk chaw pêk tùr a siam zui a. Chaw thing leh ningnáwi pêk pawlh tùr an neih avàng leh vawk chawa chhum tùr ration buhfai, card hring hmanga an lâk theih avàng pawh chuan a lãwm chuang lo, ‘Retailer lah hi, buhfai sem khát lutuk!’ a ti chhuak hial. Chutih lai tak chuan tlángau chuan ration buhfai a lâk theih thu a rawn puang hlauh—a lài ve det! A fate chu vawk chaw lo pe tùrin a hrilh a; ani chu a second hand scooty thar nên card hring kengin ration semna lam chu a pan ta a.

Kutzungpui nem tùra a intlar lai chuan a Redmi Note 10 phone chu a bih a. WhatsApp lama sawrkar thu chhuah, dàwr leh in neituten an dàwr leh in luah man tih tlèmsak tùra ngenna chauh chuan a rilru a ti làwm; a hnu lawkah a ti lâwm lo leh: ‘Min tlàwm ve àwm lo êm mai! Sum duh chhúngkaw lutuk te khuan…’ a ti rilru leh bui bui a, Pu Bùla chuan. A phone chu a bih leh a. An vénga Covid test hma chhawnte negative results aiin a kai thar mi pali awmte chuan a rilru a luah zâwk. A rilru bawkin, ‘Vah cheh man, lèn hrât man leh bawk!’ a tihsak leh hmiah duh nia!

Kutzungpui a nem hnuah vui bùl bùl chungin Pu Bùla chuan in lam a pan a. An chokâ leh ration semna inkárah chuan làwmna tùr a hmu zo lo!

Pu Hmùa thil hmuh ve thung!: Zíng thawh hlima thingpui sen háng dawm pahin Pu Hmùa chuan, ‘Mami, i nu chaw ei tùr kha chhumsak la, dâl chhum nèn a inei puar ve thei mai ang chu tiraw?’ tiin Pu Hmùa chuan a fanu ei rawng báwl tùr chu a’n zâwt a. Banga calendar intár chu a thlír vang vang a. A rilruin, ‘Thla a tàwp têp tawh hi maw… Thla tharah chuan in luah man leh ration buhfai leina tùr chu ka hlawh chhuak ve leh thei mai ang chu,’ a ti a. 

Chanchinbu an lâk ve loh avàngin hri vei thar zâtin Pu Hmùa rilru a kam thei lo a; dâl chhum hàn bâk chawhmeh an neih loh avàngin a vui ngai hek lo. ‘Dâl chu chhùm loa kan ve mai àwm,’ in ti a ni maithei; tél leh purun chu nei ve se an kang ve bawk ang chù! Chûng kârah chuan Pu Hmùa chuan mi hmuh loh a hmuh avàngin a hnual ngai lo a, a lungngai ve ngai hek lo.

Miten LLTF atanga tanpuina an dawng tih a hriatin Pu Hmùa chuan a lawmpui êm êm thin a; dawn ve a beisei kher loh avàngin thîkna rilru a pu ngai lo. Hri vei an pung zêl tih a hriat avànga indawm kun ngawt ai chuan, ‘Negative an tam zâwk daih!’ tih chuan a rilru a thlamuan thin! Hri kai theihna chance a neih sànzia a hriat rualin, a kai ve loh teh mial avàngin làwmnain a khat thin a; hri kai lai tak hriat theih a nih loh avàngin a kai ve hun tùr chu, ‘Vawiin!’ tiin rilru a siam a; mahse, zànah hri a kai ve loh avànga làwm thu sawi chungin a mu leh thin. An neituten in luah man àwl emaw tlàwm emaw chu an bat a nih lohzia a hria a, in luah tùr an la neih ve avàngin a lãwm zâwk thin. A nupuiin hri a vei ve avàngin sawrkar leh tlàwmngai páwl, LLTF te hmalâkna chu ropui a ti a; an hna thawh dàn a taka hmutu a nih avàngin, mi lo felzia te, mi hriat loha an lo tlàwmngaihzia te a hre thar a; Mizoa a piang chu a lãwm thar leh thin. A nupui hri kài vàngin a rilru a hnual lo a; hri veite dinhmun a hriat chian phah avàngin a tawngtai tam phah hlauh thung a; Pathian tel loa mihring nun derthàwnzia hriat chian phah hlein a inhre bawk a ni.

Pu Hmùa chuan a neih loh leh a dawn loh thlír loa a la neih chhuna làwmna a hmuh thiamna chu a chakna a ni a; vuivàina leh lunghnùrna aiin, thihna kawr ruamah pawh làwmnaa khat rilru thianghlim put a tum fan fan thin. Tuma tawngtai tam na nâ na chuan a hmu rêng thin bawk a ni.

Kan ram hian Pu Bùla leh Pu Hmùa te ang hi, mi eng emaw zât kan kawl mêk. Tu zâwk ang zâwk hi nge kan nih le?