Venghlui kan tih mai hi hun hmasa lamah chuan Rahsi Venghlui tih a ni awm a. Bawrhsap hmasa lamin he hmunah hian, a hnathawh awlsam zawk nan tiin (Bawrhsap bangla atanga a hnaih a vangin) a Rahsi (Chaprahsi/Peon) ho a dah a ni awm a. Chutih lai chuan han inkohna hmanrua, telephone ilo a awm miah si lo a.

Nimahsela, an ni sawrkhar hnathawk an lo nih si avangin, silai an lei ta fer fur mai a, chutih lai chuan heng College veng, ITI leh Bethlehem vengte hi ngaw durpui, Chhura rual an tih ang mai hi niin, ramsa (RAMSA leh RAN hi thliar thiam lo kan tam. Ramsa chu wild animal RAN (ransa ni loin) chu domestic animal- mi tamtakin RANSA tiin an ziak leh thin) Sa an kap thei riau emaw ni tehreng ni, zanah tlaivar dawn dawnin an sa lu hawn chu, zu nen an lam ta thin a. Thawm dim miah loa, “Tlang ka tlir,” te an tih avang chuan Bawrhsap chu an ning leh ta si a, chuvang chuan tuna Thakthing veng kan tihtakah sawn a sawn ta vek a ni.

Saw Thakthing veng kan tih saw hmanlai chuan Rahsi Veng tih a ni a, an pem chhuahsan tak chu Rahsi Venghlui tih niin, thangthar hian Rahsi bânin VENGHLUI kan ti ta mai ni awm a ni. Ka hriat ve phakah pawh khi Venghlui khi Pu Makthanga, Lusei Clerk pensioner-in a awp a. Chu Pu Makthanga chu Sikulpui Head Master thin, Pu Hrawva U kha a ni. Tuna Venghluia Pu Liantlinga te awmna tak pawh khi Pu Makthanga in thin chu a ni. Vanduaithlak taka fa pawh an neih loh avangin a nau Hrawva chuan a rochung ta ni tur a ni. Kei pawh hian naupangtein Pu Makthanga chu ka hmu ve phak.

Venghlui atanga an va insawn takna hmun chu a tir chuan Rahsi Veng tih a ni thin a, a thlang deuh Mualpui lam dep a veng khu Rahsi Venghnuai tih a ni thin. Heng hi kei pawh hian ka hre phak ve ngei a. Engtizia emaw ni, Thakthing veng tiin tun thleng hian thlak a ni ta a, Rahsi Venghnuai tih thin pawh sawn Rahsi bânin Venghnuai hming a pu hlun ta mai a nih hi.

Pu Lalbuaia min hrilh dan chuan Thakthing Veng hming a putna chhan chu, hman deuh laiin, veng lu lamah hian Thakthing kung lianpui a awm thinin a sawi. Hmanlai chuan Thangthing mual laiah sawn Zawlbuk pawh a awm thin a, mihringin sak rual loin venglai takah chhak lam a hawi ngoh mai nia. Thawk khat lai phei kha chuan naupang sikulahte pawh hmangin ka hria. Aizawlah chuan Zawlbuk nei rei ber veng an ni awm e.