Covid-19 hri leng vangin India ram hmun hrang hrang atangin Mizo thalai tam tak, a sing tel deuh thaw an rawn haw khawm a, hawng ve lo pawh tam tak an awm ang. India ram hmun hrang hrangah, foreign ram thleng pawhin Mizo thalai te kan in zar pharh nasa ve ta hle mai. Phaia awm thalai rual tam zawk hi zirlai an nih hmel a, mi dang te erawh hnathawk a awm an nih hmel.

Kan ramah hian technical course chi hrang hrang zirna institute changtlung tak te, engineering college leh medical college chhuanawm tak te, college tha tak te nei thluah mai ila, ram pawn atangin hnam dang zirlai tam takin rawn pan ruih ruih mai se a va lawmawm dawn em! Mahse, tunah rih chuan keini zawk hi thiamna pur chawa kan in kah chhuah a ngai tlat si. Kan rama zir theih ve rengah pawh a thei fa chuan phai kan pan hram hram a, zirna sensoa ram pawna kan sum luangral zo zai hi uiawm tham a ni. Ram dang pan ngai lovin kan ram, Mizoramah ngei hian zirna tha leh changtlung neih hlan a va nghahhleh awm em! A kawng erawh a la thui hmel viau bawk si.

Zirlai ni lo thalai tam tak State dang leh ram pawna an vah chhuah chhan chu ‘hna’ a ni. Kan ramah hna a vang a, mahni ram berah hna thawh tur a vân miau chuan a awmna lam lam an pan mai nak lohah. Dik chauh chuan kan rama hna tha awm chhun chu ‘sawrkar hna’ a ni deuh mai a, mi vannei fal leh tihpuitu tha nei tan lo chuan sawrkar hna hmuh mai mai theih a ni ta mang lo. Kan State population nena khaikhin phei chuan sawrkar hnathawk hrim hrim hi an tam lu hrat a ni. Kan state budget atanga 80% deuh thawh hi sawrkar hnathawk hlawh leh inrelbawlna (revenue expenditure)-ah hman a ngai a, hmasawnna hna thawhna tur, mipui chanpual hi a tlem lu hret a ni. Chuvangin, sawrkar hnathawk lak belh zawng leh post siam belh zawnga hmalak hi tih loh a tha khawp mai.

Hman deuh khan ram hruaitu pakhat chuan, ‘Sawrkar hnathawk zahve dawn hi bâng pawh nise, sawrkar hna hian chuti takin a tuar lo ang’ tih lam hawiin a sawi tawh a. Chutiangte a nih chuan engati nge a inrenchem zawng leh sawrkar hnathawk titlem zawnga kan kal loh le? Zonet TV sawihonaa Pu PC Lawmkunga sawi ang deuh khan sawrkar hna tam tak, a loa awm theih tho ang chi hi mi thiam ten zir chiang se, a post chelhtu pension rualin a post chawpin nuai bo (abolish) nghauh nghauh mai se, sawrkar hnathawk hlawha kan sen ral tam tak hi kan hum thei dawn a ni.

Tin, sawrkar hna thawk indaih lo kan tih fo pawh hi huaisen taka siam rem hna (rationalization) kan kal pui hleih theih loh vang mai niin a lang. Entir nan, thingtlangah zirtirtu an indaih lo em em a, khawpuiah an buk em em lawi si. Hengte hi siam rem nise, a thar lak ngai miah loin kan indaih lohna tam zawk hi kan phuhruk nghal theiin a rinawm. Mahse, sawrkar berin a hnathawkte a thunun theih loh a, khawih chet ngam loh khawpuiah an kuh tul chhung chu engtikah mah sawrkar hnathawk indaih tih ni a awm kher lo ang. Kohhran hnuaia pastor leh missionary-te hi term neiin hmun hrang hrangah an insawn kual thin a, an insawn hun a lo thlen chuan puanthuah telin i he lovin an kal nal nal mai thin. Kohhranin a hnuaia hnathawkte a thunun theih anga sawrkarin a ti ve thei lo tlat mai hi a buaithlak lai chu a ni.

Kan rama sawrkar ni lo hna siamtu agency pawimawh takte chu - private school leh kohhran hi a ni. Thalai lehkha thiam tam tak private school-ah an inhnangfak mek a, hnemhnan tham hlawh an hmu leh si lo. Han bânsan dawn se hna dang thawh mai tur a awm bawk si lo. An khawngaihthlak ngawt mai. Kohhran hian thalai tam tak missionary, pastor leh pro pastor-ah te a ruai mek bawk a, mi tam tak tan eizawnna a siamsak a ni. Kum tin thalai tam tak, lak sen loh khawpa tamin missionary hna an dil a, a lawmawm rualin a lungchhiatthlak lek lek mai.

Enga ti nge he kan ram, thlai tinrengin a ngeih, ruahtui dawng tha em em, mi nuai 10 awrh chauh chennaah hian hna a vân em em a, kut hnathawkte an din chhuah hleih theih loh le? Ram nise luah sen lohin a la ruak dei duai a, kilometer khat bial chhungah mihring 52 chauh cheng ang kan la ni a. Hetih lai hian Singapore-ah chuan kilometer khat bial chhungah mihring 8,358 an cheng mek a, tawt mep mep tak an ni. Mahse, he Singapore ram te reuh tê, ram awl nei lo khawpa mihring bitnaah hian thawh tur a tam a ni ang, kan thalaite pawhin an pan sung sung mai. Singapore thalai rual hi ram dangah hna zawngin an chhuak sup sup lo mai thei.

Ram neih that ringawt te, resource neih that ringawt te hi hmasawnna a ni ngawt lo. Kalphung (system) dik hnuaiah kan resource te kan hman tangkai theih chuan kan ram chhungah ngei hian kan inhnangfakna khawp a awm a awm ngei ang. Sipai rorelna khirh tak hnuaia an kun lai chuan kan Burma unaute pawh khawvel hmun hrang hrangah hna thawh tur zawngin an vak darh a, kalphung dik hnuaiah hmasawnna kawl a en meuh meuh chuan an ramah an hawng leh ta chum chum mai. Khawvel ram danga pur chawk ngai lo hian, he kan ramah ngei hian mi tin kan inhnangfak theih hun a va nghahhlelh awm em! Raltiang ram ngaia kan tah khua a sei ta e.