Mizo tawng chungchang ziah dik loh leh hawrawp kim lova ziah te, tawng hman dik loh chungchang inzirtir kan ngaih fo chhan hi eng vang nge ni ang le? Khawvel han thlir ila, mahni hnam chin than leh nun phung chawi sâng hmasa a, tawng hlut apiangte hi hnam ding chhuak an ni thin. Keini erawh chuan kan tawng kan ziak kim lo fo va, kan tawng aiah Saptawng kan zep tel fo va, loh theih loha hman ngai chu a awm thin. Tun ang renga kan kal huan eng tikah emaw kan tawng hian hma sâwn aiin boralna lamtluang a zawh zawk thei. A la tlai lo va, nang leh kei hi kan tawng hlut turin kan chak tâwk a, kan kovah a innghat a ni. Kan tawng ziah zawm leh zawm loh chungchang leh thlûkna chungchangahte tun aia nasa zawka kan uluk zual zel hi ram leh hnam humhalh nan thil pawimawh hmasa a ni.

Kan hnam rohlu kan tawng ‘Mizo Tawng’ hi kan humhalh loh chuan a tuar tur chu kan tu leh fate an ni a, Mizo tawng kan ziah dik leh kan hman dik hian ram leh hnam kan chawisâng tihna mai a lo ni. Hnam dang tawng kan zir a, a tha e, zirna avang emaw hna thawhna avanga hnam dang tawng kan hman nasat vang hian, Mizo tawng hi a hma aiin thiam tum zawk ila, kan awm hmun theuhah ram leh hnam kan humhalhna tur tha tak a ni mai dawn a ni. Mahni hnam nun phung tlânsan a, hnam dang nun phung ngaih sânna hian kan hnam hi a ti boral mêk a. Mahni hnam tawng pawh ngai sâng lova, zah loh leh ngai hlu lova, kan tlânsan mekna vantlang rilru hi ‘humhalh ngai khawpa chhe mêk’ pakhat a ni tih kan hriat a tha. 

Mizo tawng hman dik leh uar chungchang hi kan nun hona tam ber khawtlang, kohhran leh chhungkuaah te hian inzirtir tam hi kan mamawh tak zet a, hnam lian zawkte awp beh avanga hnam chîm ral tâk hi khawvelah hian eng zah tak awm ang maw? Humhalh tur ram leh hnam kan nei hi kan vannei tak zet a ni. Mahni hnam zia, hnam tawng chawi nun nachang hriat loh hi hnam boralna kawng a ni tih kan hriat a tha. Lehkhathiam leh zir sâng kan pung zel a, kan tawng hman dan duh khawp lo leh Mizo tawng hmang uar kan pung zel te hi thil lawmawm tak a va ni em. A theihna apianga kan tawng kan hman zel hian kan tawng a ti hausa a, tun aia uar leh zual hi kan tih tur a ni. Kan tawnga ziah leh sawi theih reng, Sap tawnga ziah/sawi kher hi hriat thiam awlsam zâwkah kan ngai fo mai a, kan tzawng hawrawp kan ziak dik leh thei chuang si lo lai tak te hi kan inzirna tur a ni em? Mahni hnam tawng thiam hi changkânna a ni a, hnam dang tawng thiam phei chu changkân leh zualna a ni. 

Mizo Language Development Board Bill chu Vau thla ni 10, 2022 khan Assembly-ah Pass a ni ta a. Mizo tawngin bung thar a kai a, tawng humhalh leh tih hma sâwn zelna kawnga mawh phurhna la tur din a nih hi a lawmawm hle. Kan tawng tih hma sâwnna kawngah hian tan lâk a tul hle mai a, inhnialna a tamin, eng hi nge dik tih hriat a har thin hle a, tawng hman dik lohna hriat tur pawh a tam sâwt hle; hetiang a nih avang hian hma kan sâwnna tur leh kan hman dik loh ṭe inzirtir thar kan mamawh hle a, kan tawng buaipuia, a than zelna tur te, humhalh leh chawi sân te leh Zo hnahthlak hrang hrangte tawng a ral mai lohna tur atân kan zavaia kan tanrual a ngai a, a hmangtu kan pung zel a, kan uar deuh deuh va, kan inzirtir zel a pawimawh a ni. 

Ram danga cheng kan unaute hian ram leh hnam humhalh nân tawng a pawimawh zia an hmuin an hre chiang hle a, a bik takin America rama kan unaute hi an fakawm tak zet. Pianpui tawng hlutzia an man a, kan tawng a boral mai lohna turin an thiamna leh an theihna leh tunlai khawvel hmasâwnna Media hmangin tan an la a. Nau awih hla (Nursery Rhymes) thlengin Mizo tawng ngeiin an phuah a, kan hlut deuh deuh a va ngai em. Keini’n kan hlut loh chuan hnam dangin min hlutsak dawn lo. Tute mai pawh hian kan hnam tâna kan tih theih theuhah hian tan kan lâk thar a, a theihna apianga kan tawng uar zel i tum ang u.

Tawng hi ram leh hnam humhalhna pawimawh tak a ni a, tawng dik kan hmang em? kan ziak dik em? tihte hi ngun taka kan ngaihtuah a tul. Tawng a ral chuan a neitu hnam pawh a ral a ni nghal mai. Kan tawng hi kan hlut a, a hun leh hmun azir ang zela kan insiam rem theih chuan mi changkâng kan ni ang. Kan ram leh hnam kan humhalh zel nân kan tawng hman hi uar zel ila, kan hnam leh kan tawng hian hma a sâwn zel mai dawn a lo ni. Mizo tawng hman i uar zel ang u.