Kar khata vawi khat, Pathian ni chawhmaah na na na hi chuan khawi kohhranah pawh inkhawm kan thahnem thei viau zel. Kar tluana inkhawm ngai lem lo leh Kohhrana inhmang lutuk lo te pawh hian kar khata vawi khat, Pathian ni chawhma inkhawm tal hi chu kan ngai pawimawh tlang a, hei vang tak hian Pathian ni chawhma inkhawmah hian mipui kan tam thin reng a, Biak in kan khat deuh thup thin. Pathian ni chawhma leh zelah pawh inkhawm ngai lo te hi chu kum tluana inkhawm ngai lo law law, Biak in chhung hmu ngai mang lo te an ni duh khawp mai.

Mi thenkhat chuan mipui nawlpuiin Pathian ni chawhma inkhawm kan ngaih pawimawh chhan hi Sunday School kai kim hmingthat leh kai kim lawmman beiseina vangah an ngai deuh thin a, a dikna chen pawh a awm mai thei. Ngaihbel tur tingin Pathian ni chawhmaa Sunday school neih dawn loh tum leh Sunday School hming lam dawn loh tum chuan inkhawm hi kan phai deuh tlat thin. Kan inkhawm chhan chu eng pawh nise, kohhran mipui nawlpuiin Pathian ni chawhma inkhawm tal kan la ngai pawimawh hi thil lawmawm tak chu a ni hrim hrim. Khawvel hmun danga kan kristian pui, kumtluana inkhawm ngai tawh mang lo te ai chuan kan la ziaawm hrim hrim e.

Hetih rual hian mipui nawlpui kan inkhawm hun, kohhran member inkhawm kan tam lai ber Pathian ni chawhmaa Sunday school kan kalpui dan hi chu a pamhmai ka ti deuh thin. Amah KL Liana (L) tawngkam takin school bang nei loah zirtirtu sawmhnih sawmthum rualin min zirtir a, pawn lam atanga lo ngaithlatu tan phei chuan khuai rau thawm ang maiin a rikin a ri mem mem mai a ni. Zirtu tan lah khawi ber nge ngaihthlak tur tih hriat harsa khawpin zirtirtu aw a insaikalh nuaih nuaih a, hmalama mi ngaihthlak tumin beng han dawh ila, hnunglama miin a aia ringa a key a rawn lak chuan ngaihtuahna a buai zo a, enge kan zir ber pawh hre mang lo hian mi tam tak hian Sunday school hi kan tling tla fo ta ve ang.

Chuvangin kan hlawk tlan zawk theih nan Sunday school-ah hian mi hrang hrangin zirtirna pe a, pawl la nuaih nuaih lo hian mi pakhatin pulpit atangin emaw lectern atangin felfai takin min zirtirin, zirlai khaikhawm thin ta mai se tun ai chuan mipui nawlpui hian Sunday school hi kan hlawk pui zawk ngei ang. Tin, zirtirtu atan pawh mi tam tak ruat loin, Pastor leh kohhran upa ordained te hian chawlhni tin a tahtawlin khaikhawm mai thin se, kohhran upa pakhatin kum khatah vawi li emaw vawi nga bak an zirtir hman kher lo ang. Chutiang anih chuan an hun a chhuah changa zirtirna pek kha an tan thil hautak leh phurrit a ni hauh lo ang.

A lehlamah chuan kohhran hnarkaitu leh roreltute hian sunday school zirtirtu inruat duah hi rawngbawlna semzainaah an ngai a ni mai thei. Sunday school zirtirtu bakah Sunday school tantu, Nilai zan thupui hawngtu, Inrinni zan leh Pathianni chawhnu inkhawm thuhriltu tur mi tam fe an ruat bawk thin. Anni bakah hian thalai hruaitu, kohhran hmeichhe hruaitu, Pavalai pawl hruaitu, Ramthar Committee, Social Front Committee etc. an lo awm hran leh a, chutianga nihna leh chanvo chelhtu te zawng zawng chu ‘rawngbawltu’ tih hming kan put tir vek a, kohhran pakhatah hian nihna leh chanvo engmaw tak chelh tura ruat, rawngbawltu kan tih chin ringawt hi khaw te run tham zet an awm thin. Heti zawng hian kohhran rawngbawlna hi kan sem zai a, kohhran mipui nawlpuiin kan hlawkpuina lam pawh ngaihtuah loin rawngbawlna sem zai chu kalphung tha berah kan ngai a, mitdel nau awi ang maiin sukna ngaiah hian kan su bel hun mai a nih hi.

Pulpit rawngbawlna hi a zahawm a, a pawimawh bawk a. Hun puma rawngbawl tura inpe, a zira zir chhuak Pastor leh Kohhran upa te chauh hian pulpit rawngbawlna hi chelh se tun ai hian kohhran inkhawm hi mi nawlpui hian kan hlawk pui zawkin a rinawm. Pastor te phei chu a lo berah kum li tal tap Pathian thu zir an ni a, kohhran mipui tana zirtirna him leh him lo te pawh an hre ber ang a, kan hun tawn ang mil zela tisa leh thlaraua kan sawttlanna tur zirtirna min pe thei tu tur ber te an ni bawk. Kan damloh pawhin a zira zir chhuak doctor te kan pan a, kan fate school zirtirtu tur pawhin a zira zir chhuak mai piah lamah, Thangkura tawngkam takin a tre-a training chhuak te kher kan duh thin. Pathian thu pawh hi a zira zir chhuak Pastor te hian sawi ber se, kohhran mipui nawlpui erawh thu ngaithlatu leh zawmtuah tan tum mai ila kan tha tlang zawk ang.

Thuhril rawngbawlna kan sem zai chiam thin avang leh Pathian thu sawi thei a pui kan tam thin em avang hi a ni mahna, heti taka kohhran pawl hrang hrang a tam tak ni. Kan ramah hian sual thuah te, rinna chungchang leh chhandamna thuah te, kum sang rorel leh sakawlh chungchang thuah te hian zirtirna insaikalh pui pui a leng nuaih nuaih a, vanram kai tum theuh theuh Pathian thu kan pawm dan leh kan rin dan a inang lo thluah a, pawl hrang hrangah kan awm phah a, hei hian kan hnam inpumkhatna thlengin a nghawng pha hial mai. Mipui nawlpui kan hlawk tlan theihna tur leh zaikhata kan luan za theihna tur lam ngaihtuahah kan sakhaw biak dan kalphung pawh kan her rem chhoh a tul mai thei e.