Rev Vanlalbela’n ama chanchin a ziahna, ‘Ka hmaah dawhkan i buatsaih thin’ tih lehkhabu an tlangzarh tumin a u Ramnundanga chuan a pa chanchin a sawi a. “Ka pa chu a tlangval laia ‘tlangval zu in ngam ve lo’ tia an hmuhsit deuh a ni. ‘Zu in mi chawm ka duh lo,’ a ti hmiah mai a, ka pa hriatah zu in ngam chi a ni lo,” a ti.

Pu Bela lehkhabu ka chhiar zui a. Keifang Biak ina kohhranin an rawih laiin Zero point-ah Pu Dozuala’n microphone hmangin thu a sawi ve mauh mai si a. Pu Bela thusawi ngaithlak tuma Biak In khata inkhawmte chuan engmah an hre thei ta lo a. Lehkhathiam lo, mi mawl mai a nih avanga thusawi khum tlak lek nia inngaiin, ‘mi zah kai ve deuh tura Pathian thu zir a châk’ phah ta a. Chu chu hriain Pi Saipari’n a pui ta a. Pawl thum pass chauh, saptawng leh vaitawng hre map lo leh rethei tak an nih avangin vai rama kal ngaihna a awm lo. Mahnia zin chi a ni lo. Pi Saipari chuan hruai a inhuam leh ta zel mai a. Chumi tuma a pa thiltih zui dan ka chhiar chuan ka mittui zuk ti hnam sawk thei a!

“E, chuti taka Pari a inhuam a nih si chuan i kal man tal chu ngaihtuah ve dan zawn a tul a nih si chu,” tiin a bawngpui hnute sawr lai chu a zuar ta mai a nih chu! Chu thu ka chhiar chiah chuan ka mittui zuk hnam sawk a maw le!

An retheih tehlul nen, fapa lehkhathiam lo lehnghal duh zawng leh chak zawng tihlawhtlinsak nana Pa hmangaihna thuk lutuk hian ka kawchhung a fan a, ka thinlung a nghawr che dawt a ni.

Bawnghnute chu an eibel ber a ni. Bawngpui an hralh chuan an chhungkaw dinhmun a danglam dawrh dawn tih a chiang reng. A fapa, a tirh chhuah tur lah chu, vaitawng leh saptawng kawi khat pawh thiam lo lehnghal! A zir hlawhtlin beiseina a pan dawn tehlul nen, a pa chuan an bawngpui a thap ngam ngat nia maw le!

Pa tam tak chuan, “Ti lo mai teh, sum kan nei lo nen, vaitawng i thiam bawk lo nen, min ei cha ringawt ang a, eng ruai i rawn ni leh si lo ang a, retheihna khur thuk zawkah min pawt lut mai mai ang. Hlo thlo la, hawp khawp zawng kan thar kum tin ang. I zuk thi reu reu ang e,” tiin chhungkaw ei bel ber bawngpui chu kan hralh phal hlek lo ang maw le! Mahse, Pu Chawngsaia khan retheih leh harsat huamin a fapa tihchak hlawhtlin theih nan a hralh ngam tlat. A va risk fuh tehlul em! Mizoten Rev. Vanlalbela kan neih phah ta a nih hi!

Tlangval lai pawha zu in ve lo ngam, zu in mi chawm duh hauh lo kha a ni miau a! A fapa thil tum hi an chhungkaw cho rual a nih loh hmel tehlul nen, a fapa lehkha thiam lo vai ram hla lutuk kal tum hi rin ngam a har dawn tehlul nen, a bawngpui a hralh phah ngam tlat. Tih-âtin a awm a ni. Ni lo, tihfinin a awm a ni zawk e! Pu Bela hmaa Pathianin dawhkan a buatsaih thin tur atana hmanraw pawimawh hmasa a ni tlat.

Chhungkaw buai ka hmu fo. Nu leh pa laka lungawi lo, an paten an rin ngam loh avanga an tui zawng an tihsak duh loh avanga tap chunga min rawn pante an awm a. Fate zahkai lo tak nu leh pa pawh ka hmu thin. Chhungkaw enkawl thua che fuh lo fe fe ‘pa’ ka hmu teuh tawh.

Pu Chawngsaia hi chu a che fuh tlat! Pathian tih mi ‘pa’ hi chu an che fuh mai zel. Pu Belate unau hian a pa thu an awih thin hle tih a u thusawiah leh a lehkhabuah a lang. Pate thuawih mai thin fapa tan hian ‘pa’ hi an lo inhuam thui thin hle a lo nih hi. Pate rin ngam leh rintlak ni tura fapa nungchang pawimawhziate ka ngaihtuah chhuah phah a. A fapa Vanlalbela nungchang leh mizia a hmuh sa tawh zawng zawng kha engkim thap ngam a ni tih a pain a hria a ni mai.

Pa hmangaihna hian ka mittui a tihnam sawk a nih kha. Zu in mi chawm duh hauh lo pa hian a risk fuh em asin! Kawhhmuhtu a nei tha a ni ngei ang.

“I kawng zawng zawngah Amah hre reng la, i kawngte chu a kawhhmuh zel ang che.” - Thufingte 3:6