Harsatna te, hrehawmna te, hlauhawm te, lungngaihna, lungawina te, hlimna te hi a tawngtu mihring rilru puthmang azir a ni thui khawp mai. Dinhmun inang rau rauah a thim zawnga thil thir thin chuan lungngaihna tur leh manganna tur an hre thei em em a, ‘He hripui hian engtikah mah min kian san dawn lo a nih hi, kan thi vek dawn a nih hi,’ an ti a, an indawm kun a, an lungngai thin. A êng zawnga thil thir thin erawh chuan, ‘A reh ve leh mai ang, a tha ve leh mai ang’ an ti a, an chaw ei a tui loh phah lo a, an muttui loh phah chuang hek lo. 

Kan thianpa pakhat chuan dose kimin Covid-19 vaccine a la tawh a, a phak ang tawkin a fimkhur bawk a, “Heti chunga Covid hri hi ka kai a, ka thihpui dawn a nih chuan lawm takin ka thi tawh mai ang chu,” a ti a, a rilru puthmang hi a tha khawp mai. Ama lamah chuan a tih theih ang zawng zawng a ti tawh a, chuti chung chunga a tih theih piah lam, a thunun theih piah lama a chunga chhiatna a lo thleng a nih chuan lawm taka dawngsawng thei turin a rilru a buatsaih lawk thlap tihna a ni. 

Rilru dik chuan mi tam tak lungawi lohna turah hian lawmna tur an hmu zel mai bawk. Pa pakhat pawhin sakhi thang a kam a, a lo per thelh hlauh mai a, chu pa chuan, “Ka lawm ta em em a,” a ti a, a thianpa, a bula lo awm ve reng chuan, “Sakhi awh tumin thang i kam a, a per thelh a, lawm viauna tur a awm em ni?” a ti a. Chutah thang kamtu chuan, “Sakhi thirna atangin ka thir a, ka lawm em a ni,” a ti ta daih a. Hepa hian, “Ka thang han per thelh kher kher chu a va pawi em! Sakhi pachal han paw haw zan zan ila, a chek hang a tui dawn vei nen,” ti vang vang se a awm lo miah lo. Mahse, a êng zawnga thil thir thin chuan a uiawmna lam thlir kânin sakhi thirna atangin a thir hlauh a, a lawm ta em em mai a ni. Mi tam tak kan lungngaihnaah te, kan lawm lohnaah te, kan ipik mup mupnaah te hian a êng zawnga thil thir thin chuan lawmna tur an lo hmu zel a lo ni. Rilru puthmang hi a lo pawimawh mang e.

Tlangval pahnih pawh hian nupui an nei a, fa an nei ve ve a, an fa sen chu an pawm dun a, an tuilian khang bung sep hluau hluau a. Pakhat zawk chuan, “Bawihte, i lo thang lian ang a, khawvel hrehawmziate i rawn hre chho ang a, hna lah a vâng tawlh tawlh mai si a, hna thawh tur i hmuh mai loh phei chuan i rilrute a la rawn han ang a, ka va khawngaih lawk che em! Ani lawm ni thianpa,” tiin a thianpa chu a han be rawn pah a. Chutah a thianpa chuan, “Chutiang mai mai ka ngaihtuah peih lo. An rawn thang lian ang a, thingthupui tuiziate an rawn hre chho ang a, zawngtah leh bekang tuizia te an rawn hria ang a, chawlhni tuka vawksa hmeh man hla bik ziate an rawn hri ang a, Manchester United fan an nih phei chuan kar tawp an nghakhlel zek zek mai ang,” a ti ta daih a, a thianpa chu a chhang dang der a sin. A thim zawnga thil thlir thin chuan thil tha lo lam a suangtuah vak vak a, tul miah loah a rilru a tihah phah thin.  

Hlauhawm tam tak pawh hi a tawngtu mihring rilru puthmang azir a ni thui khawp mai. Thil tawn inang rau rauah, dinhmun inang rau rauah mi dawihzepte an khurh zawih zawihnaah hian mi huaisente chu an danglam vak tlat lo, an taw a sai mang tlat lo. Xerxes-a sipai sing rualin Spartan pasaltha 300-te an dang kawlawk a, inpe mai turin an thlem a, nasa takin an vau bawk a. “Kan thal kan thlah chuan kan thal mu ringawt pawhin ni a hliah thim thei hial ang. Kan chimih vek tho ang che u. Inpe mai rawh u,” tiin an thlem a. Chutiang vauna karah chuan Spartan pasalthate chu an zam eih lo. “In thal fangin ni a hliah chuan daihlimah kan inbei dawn tihna a ni mai alawm,” an ti mai. Keini ni ila hniak pherh vungin kan tlanchhe mai awm asin. A nih loh vek pawhin puan var zar kan rawt chul mai thei. Hlauhawm a hnaih pauh leh mi huaisen chu an paukhauh zual ting mai a ni. Eng vang nge? An rilru put hmang vang a ni. 

Rilru put hmang dik leh dik lo hian chatuan nunna thlengin a nghawng thei dawn a lo ni. Isua bula an khenbeh mi pahnih kha misual an ni a, thi mai tur an ni tawh. Pakhat zawk chu a phunnawi a, Isua a hau a. Pakhat zawk erawh chuan a sualna a pawm thlap a, “Hrem zia reng kan ni e. Isu, i ram i thlen thlengin min hre reng ang che aw,” tiin inngaitlawm takin ngaihdam a dil dek dek a, Isua’n a ngaidam a, chhandamin a awm daih asin. Sual dan inang rau rauah, Pathian tana tangkaina nei thei thei tawh lo rau rauah, thi mai tur rau rauah pakhat thiam loh changa a awm laiin pakhat zawk chu chhandamin a awm daih asin. Eng vang nge? An rilru put hmang inan loh vang a ni.