Naktukah hian thangkhat lian dawn eizawnna kawng khat ka lo zawhpui tawh, History department-a ka thawhpui ni bawk, Pu RL Chhuanawma chuan super annuation pension-in min lo chhuahsan dawn ta a, amah thlahna nipahfawmin a chanchin tlangpui ka han ziak teh ang.

Mi chhuanawm chhungkua an ni: Mizo upain ‘Kawi pawh a kawm a that chuan a rah pawh a tha’ an lo ti a, Pu RL Chhuanawma nu leh pa, Upa R Lalthianga leh Pi Khawngaihi te hi mi fel tak chu an ni phawt mai. An fate reng an felin an puitling hlawm mai. Pu RL Chhunawma te unau hi mi fel tak leh mi chhunawm tak an ni nawk a, an unau zinga mi hriat hlawh zual deuhte chu - tuna Synod Moderator ni mek Rev. R Lalchangliana te, Durtlang doctor fel tak Dr. RL Sanghluna te, Baptist Kohhran lama an khaipa berte zinga mi Prof. RL Hnuni te hi an ni a. An unau dangte pawh mi fel tak tak, an lawina kohhran-a Kohhran Upa leh khawtlang tana inhmang tak takte an ni nawk mai.

Mi tha ziktluak a ni: Pu RL Chhuanawma hi mi tha zik tluak, tleirawl sual pawh lo, englai maha ruihtheih thil ti ngai lo a ni. Tum khat pawh a tleirawl chhuah tirhin college-a kalpui a thiante nen an leng chhuak a, a thiante chuan zu an in a, ani chu intir ve an tum ngial na a, a in duh tlat lo. An thian pakhat chuan, “I in duh loh pawhin i nam ve reng reng tur a ni,” tih pahin zu chu a kawrah a leih a, zu rim a nam ve ta vung vung mai. Zu rim nam vung vung chung chuan nula an rim ta a, an nula rim lah chu an chhung hnaivai a lo ni si. Chutia zu rim nam ve ta vung vung chu zu a in ve a ngaiin a nu leh pate a lo hrilh a, a nu leh pate pawhin an hauh phah hial a ni awm e. Chu chu Pu RLa’n zu a hnimhniah ber tum a ni.

Ren tin daih a ni: Pu RL Chhunawma hi rual pawl tak, a tha lamah chuan mi tih ang a piang ti ve thei zel mi a ni a. Infiamna lamah pawh a rualpawl tawkin heng-football, volleyball, badminton leh a dang te pawh a ti thei zel mai. Tum khat pawh kum 1988 khan Inter College Sports, Shillong-ah zirlai te a hruai a, St. Joseph College, Nagaland nen an inkhelh tumin a tang lutuk chuan zirlai pakhat chu a ko chhuak lawk a, field chhungah chuan a tlan lut ve hmiah mai a ni.

Zaite hi a thiam leh zel a, Jim Reeves ang maia aw tha a ni a, All India Radio-ah hian B High Artist niin hla pawh 30 chuang zet a thun (record) tawh bawk. Kum1997 khan Rev Vanlalnghaka hoin zaia rawngbawlin England, USA leh Canada ramte an suar tluan tawh bawk a, hemi kum hian ‘The Mizo Messengers’ tih hming puin an thianhoin audio album-te pawh an lo tichhuak tawh bawk a ni.

Rawngbawlna lamah Kohhran Upa a ni a, khawtlang rawngbawlnaah pawh phak ang tawka inhmangin Sub Headquarters YMA-ah hian term hnih (kum 4) chhung President nihna a chelh tawh bawk a, tunah hian Branch YMA-ah President a ni leh mek bawk.

Mi rilru tha, mi tluangtlam a ni: Pu RLA hian mi han hauh mai te, mi han vin khur khur te hi a ching leh zauh thin. Amah hrechiang lo chuan pa thinchhe tak leh buluk tak ang pawhin an ngai mai thei. Mahse, a rilru a tha a, a tluangtlam a ni. A thinrim ângte hi a chil pel a hul rualin a thinrim a reh a, ruah mual liam ang maiin a thinrimna pawh a dai sam a, tu chungah mah rilru chhia a pu zui ngai lo.

Tum khat pawh NAAC-in min endik dawn tumin Peer Team lo dawnsawn dan turah kan thu a inhmu lo va, kan inhnial a.A tukah an chenna inah ngaihdam dil turin ka kal a, an nupain an lo awm a, inthlahrung takin ngaihdam dilna thu ka han sawi dek dek a, chutah Pu RLA pek chuan, “Chu, kan lo inhau a ni maw? Ka lo hre tawh hlei nem,” a ti ta mai a, a ho zo ta vek mai. Chutiang vel chu a ni, Pu RLA thinrim chu. Mi huatna rilru a pu zui ve ngai lo.

Mi taima a ni: Pu RLA miziaa entawntlak tak mai chu a taimakna hi a ni. Tum khat pawh amah hian, “Ka upa tawlh tawlh a, ka taima tawlh tawlh,” a ti roh a. A ei zawnna, zirtir hna (teaching profession)-ah hian a inthlahdah ngai lo. Semester System-a kan kal hnu hian semester khatah Internal Exam vawi thum conduct a ngai thin a, a chang chuan Internal Exam-a zirlaite chhanna zawng zawng hi a lo endik vek a, record buah a lo enter fel leh thuam thin. Mahni eizawnna hna thawk tha peih lo, ning ngawih ngawih thin, bansan phal bawk si lote hian Pu RLA nun atang hian zir tur an ngah ngawt mai.

Kohhran Upa a ni a, thuhrilna hun a chan dawn tum chuan taima takin a inbuatsaih thin. A sermon atangin a inbuatsaih nasatzia a lang thin. Tin, phawsawlh hmel puia a lan lai hian thil pawimawh chhinchhiah a peih em em mai a, ziakin a vawng tha thlip thlap thin. Kohhrana thil thleng pawimawh deuh deuh te, sunday sikul kaikim te, a zawna kum nga, kum sawm kai kim tawh, medal dawng turte hi a lo chhinchhiah thlip thlep a, Kohhran pawhin thu lak nan ber an hmang fo thin.

Born Teacher a ni: Pu RLA ka hrilhfiah dan ni fo chu ‘zirtirtu tura piang, born teacher’ a ni tih hi. Zirnaah a tui a, naupang zirtir nuam a ti a, a hna hi a ning ve ngai lo. Zirlai huikhawp a peih a, zirlaite pawhin an nel em em zel mai. Mi hming a hre thei em em a, kar hnih khat lekah zirlai tam tak hi an hmingin a ko zung zung thei tlat zel. An hming mai ni lo, an family background pawh a lo hre viau zel mai. Chumi venga awm, chumi khami fa chu a ti zung zung thei zel. Zirlaite pawhin an nel ber leh an fiam bawrh bawrh ngam ber a ni thin.

Mi nelawm, mi rilru zau, mi tanpui peih tak, mi rilru tha leh pa tlawmngai tak nena kum 14 zet kan thawk dun thei hi ka lawm a, ani pawh a hun kal zel turah duhsakna ka hlan bawk e.