Central YMA chuan kum thum zet ruihhlo do a chawlhsan hnuah ruihhlo do kawnga hma latu tur CADS (Central Anti-Drugs Squad) a din thar leh ta a, ruihhlo do kawngah beihpui a thlak leh dawn ta. Kan rama ruihhlo hluar nasat dan ngaihtuah chuan YMA in ruihhlo do kawnga beihpui a thlak hi a tul viau reng a ni. Tunhma lama CYMA in ruihhlo a do lai khan a hmalak danah sawisel kai lo leh fel famkim a ni bik hauh lo a; Amaherawhchu, YMA in thapui thawha ruihhlo a do lai khan erawh a sawt viau a ni. YMA in ruihhlo a do laia ruihhlo man zawng zawng kha cheng vaibelchhe 30 chuang man hu zuk ni a! Kha zat ruihhlo kha man lohin awm ta se, thalai nunna engzat tak suat ang maw, ngaihtuah ngam pawh a ni lo ve.

Kan ramah heti taka ruihhlo a hluar chhan hi eng dang vang mah a ni lo, ruihhlo mamawh thalai kan tam vang a ni mai. Demand awmlohnaah supply a awm thei lo. Tunah hian rescue home hrang hrangah ruihhlo ngawlvei enkawl lai thalai IR battalion thum daih zet an awm mek a, kan ram hi ruihhloin min run mek a ni. 

Ruihhlo do leh ruihhlo ngaite chhanchhuak tura tan lak hi thil tul tak a ni a, hei ai maha pawimawh chu ruihhloin a la tihbuai loh thalai leh naupang zawk te ruihhlo laka venhim hi a ni. Pawl pakhat, Foundation for Drug-Free Mizoram hian thalai te ruihhlo laka an him theih nan theihtawp chhuahin hma a la a, a lawmawm khawp mai. School leh zirna in hrang hrangah leh Sunday school-ah te kal kualin, Drug Awareness Campaign an nei thin a, thalai leh rawlthar te hnenah drug hlauhawm zia an tlangaupui thin. An kalna apiangah thu ziak leh tawngkain ruihhlo laka fihlim tura intiamkamna an neih pui thin bawk a, an hnathawh hian rah tha a chhuah ngei ang tih a rinawm. District thenkhatah thalai tlawmngai intelkhawmin, zirin in hrang hrangah awareness campaign an nei thin bawk a, thil tih awm tak a ni.

Ruihhlo do kawnga tlawmngai pawl te an pen chhuak mek lai hian ruihhlo do tanna tur hmun pawimawh ber chu chhungkua a ni tih kan hriat thar leh a tul khawp mai. Kan fate hi an tet lai atangin ruihhlo hlauhawm zia kan hrilh mawlh mawlh a tul a ni. Ruihhlo ti thin leh ngawivei tam zawk hi chhungkuaa zirtirna tha dawng mumal lo an ni duh khawp mai. An tel lai atanga an rilruah ruihhlo hlauhawm zia kan tuh ngheh chuan kawngro a su ngei ang. Pathian thu pawin, “Naupang chu a kalna awm kawngah chuan zirtir ula, a puitlin hnuah pawh a thlah lo ang” a ti a nih kha. Ruihhlo hlauhawm zia leh taksa a khawih chhiat nasat theih zia hi a  lem (picture) nen entirin hrihfiah thin ila, an rilru a hneh bik khawp mai. 

Tin, nu leh pa te pawh kan fate entawn tlaka kan awm ve a ngai bawk. Drug laka fihlim loin a fa chu drug laka fihlim turin a fuih thei bik lo ang. Fuih mahse a sawt chuang lo ang. Chutiang bawkin kan fate hi zuk leh hmuam laka fihlim tura kan duh chuan nu leh pate hi zuk leh hmuam lakah kan fihlim hmasa tur a ni. Mei zu khu hluah hluah chunga mei zuk hlauhawm zia kan fate kan hrilh chuan an bengrawngah a lut mawh khawp ang. Chakai nufa kal dan inzirtir ang chauh kan ni mai ang. Mi tam takin zuk leh hmuam hi thil te thamah kan ngai a, sualah pawh kan ngai chiah lo. Kan fate hmuha mei zuk te, sadah leh khaini, tuibur hmuam te pawh kan inthlahrung lem lo. Amaherawhchu, drug leh ruihtheihthil ti thin te hi zuk leh hmuam laka fihlim lo an ni tlangpui. Chingal leh saum ang deuh hian zuk leh hmuam leh ruihhlo hi a inhne rem bik riau a ni. Zuk leh hmuam ti miah lo zu ngawl vei, zuk leh hmuam ti miah lo drug ngawl vei sawi tur an awm mang lo. An awm a nih pawhin an tlem khawp ang. Chuvangin, thil ho tea kan ngaih zuk leh hmuam lakah hian nu leh pate hi kan fate entawntlaka kan fihlim a tul a ni. 

Tin, chhungkua hi kan inpawh loh a, chhungkaw boruak a nawm loh a, nupa kan hlim loh chuan kan fate hian nuam an ti lo a, an vak chhuak a, pawn lamah hlimna an zawng a, inchhung aia pawn lama an tlei tawh chinah chuan thunun an harsa tawh thin. Chuvangin, chhungkua hi kan inpawh tur a ni a, nupa kan inkawmngeih ang a, chhungkaw nun nuam nei turin nu leh pa te hian tan kan lak a tul a ni. Chhungkaw inpawh lo tak, nupa inhau fo mai, innghirngho fo thin leh chhungkaw kehchhia atanga chawr chhuak naupang te hi an vanduai a, an thanlen hnuah pawh sual lam an awn sam nge nge thin.

Chhungkua kan hlim a, kan fate himna tur a nih phawt chuan nu leh pate pawhin kohhran leh khawtlanga kan chanvo mawhphurhna te hi tlansan ngam ila, kan sum lakluh a lo tlem phah ta deuh a nih pawhin kan fate kan uap tam a, chhungkua kan hlim a, kan fate himna tur a nih phawt chuan chu tluka hlu chu awm chuang dawn em ni? Khawtlang leh kohhrana kan inhman nasat avang te, kan sum duh luat vanga kan enkawl hman loh kan fate tluka hlu hi a awm chuang lo. Khawtlang hruaitu zahawm, kohhrana a kul ataia inhmang thin leh ram hruaitu langsar tak pawh ni mah ila, chhungkaw khawsak kan rel fel si loh chuan mi hlawhchham kan ni tho.  

Ruihhlo do kawnga tlawmngai pawl leh kohhran hmalakna hi a ropui e, ruihhlo do dan tha ber erawh chhungkuaa bul tan a ni. Chhungkaw tha din ila, ruihhlo a kiam a ni mai.