A kha tih lai, 2000 hnu hreta a làr chhoh lai, a ke chheh zawng zawng nên khan, a rualpui keini pawn kan pindan chhungrilah kê kha kan chhep ve chiang alâwm. Sailova flu, khawsik emaw natna emaw min thlen hlek si lo a, a cassette rewind nân mask a ngai lo a, thianghlim takin kan herh lêt zut zut mai a. A thlî kha namên loin a tleh chiang alâwm.

Kawr sen kha—kei paw’n ka nei ve rîn ràn a. A sam tih dân angin, hmun 13-ah ka then spike ve thak maw le! Mahse, ka zak ve det. Ka farnuten min hau fo. Ka classmate te nên lam lam. An hriatin ka sam kha hmun 13-a ka then kha ka tîm ta dui a. ‘I la in-Sailova êm mai’ min tih kha ka hlau ve a… A lâm dân style zawng zawng pawh ka by-heart bel ve. Aizâwla a rawn lâr hnu lawkah Zaia @Joseph Zaihmingthanga lâm dân style zawng zawng nên a rawn lârpui ve leh a. A hnuah Robert-a. E khai! An va’n super chiang tak!

Dik tak chuan, Zoram khawvêl kha, Pachuau fa hrin, PC Vanlalsailova kha… a va’n Sailo lal lèn thin tak! Zoram rimawi khawvêl kha a ngam chiang alâwm—‘Hmeltha’ leh ‘Zoram |ang Fan Fan’ ringawt hmang pawh khan. Chuvânga Sailova Sailo-na ka tih ni.

Tûn hnu, a pianthar hnu, evangelist a nih hnu hian ka chîk zui zêl a—he pa hi a tlo tlat. Tunlai Mizo zai satliah hi ka fate entir ka phal (duh) lo a; Sailova zai chu ka phal. Amah ngau ngau hi lyricist a ni a, composer leh musician nih a fàwm a, mi duhtui leh mi invawng a nihna hi ka ngaihsânna a ni ve. Ka fapa hian chhûn se ka ti ngawt mai—ngai sâng satliah ringawt lo hian.

Piangthar rau rauah a piangthar chiang bîk hian ka hre leh zêl a. Sêlna leh tawngkam dêngkhâwng tak tak a dawn sawn thiam dân atang ringawt pawh hian, ‘pa’ la ni hawt lo ka thianpa, tlangvâl Sailova pianthar dân hi a fair thlap. A thu dawn lah a tan mai ni loa Lalpan talent a pêk hmanga mite hnêna theh darh a tum leh zêl dân te hi—mi tam takin kan theih loh tûr a ni. Amah sawisêltute tawngkâte hi chu, thîkna aw-kâ chhuakah ka ngai mai.

Kum 2000 hnu lamah tu nge Mizo Music history-a mi lian ber tih inzâwt ta ila; ani lo chu kawh tûr an vâng viau mai thei a nia.

Ka duh aiin a piang thar hma a! ‘Duh thu lêng sâm châng nî zawngte hian…’ la ti ngawih ngawih atâna ka’n ît nên, Isua neih kha a thlang ta tlat pek a! A huvâng natzia chu—love song-a tuihâla awm Zofaten harhna kan han chang thar ta thut a; a hnuah ‘khawih thlûk power’ kan chang zui zat a. Love song singer zawng zawng (tih theih deuh thâw) khan pian thar kha an intih hmuh emaw tih tûr khawp khan kan piang thar ta sup sup mai bawk si a.

Mahse, Sailova chu, ama style-in, gospel-ah pawh, ama dânin, a duh dân tê-in a kal lui ngat a. A zawh ngaiah—a love song sak dân angin, a gospeltalised vek mai a. Heti hian nupui neih pawh tinzâwn lo hial khawpin a la ‘Go gospel’ ta zêl a nih hi!

A ti alâwm, amah ngeiin, ‘…an tam alâwm! Kawr sen ha zawng zawng kha ngaizâwng lêt duh ni ila chuan… Mahse, Pathianin min vêng a. Hei, Gabriel-a (a fapa) Pathianin min pê a; kum 12 mi a ni ve ta a, Pathian hnênah hian ka lâwm hle,’ a ti êt!

Love song a sak lai khan lâr namên lohin a lâr a. Zoram khawvêla kawr sen min hâktîra, kan hair cut zawng zawng min sawi danglamsaktu chu amah Sailova tho kha a ni. Hmeichhiaiin an ngaihzàwn rawn a; mipa pawh kan bâng lo (a rûkin)! ‘A Derna Anka’ leh a ‘Hmel tha’ te leh Chapchar Kût ti-kûttu ber, ‘Zoram |ang Fan Fan’ te thleng khan maw…

Mahse, a duh thu lêng sâm châng nî min thlenpui hmain a piang thar ta a.

‘Love song khawvêlah chuan ka duh chin tâwk (limit) thlengin ka inhre ve tawh a. Lalpa min kohna lam rêng rêng ka lo hawi ngai lo a. Hêng sum leh pai zawng zawng ai hian “Isua Neih Ka Duh Zâwk” tia A lam pan bâk hi hma bâk ka nei ta lo. A hmaa ka nunah kha chuan, thlaphânna te, khawharnate ka nei nasa thin a. Pathiana ka engkim ka hlan hnuah chuan a bo vek a ni. Thlamuanna ka nei tawh tlat mai a…’ titu Sailova thu sawi hi ka awih zâwng tak a ni.