Dr Ka Zawhna

SARS-CoV-2 (Severe Acute Respiratory Syndrome-Coronavirus 2) engtin nge kan hmachhawn zel dawn?

Dr. Chawnglungmuana - May 02, 2021

Sorkar pawhin inrenchem policy ruahman se | Kan mamawh leh a tel lova kan awm theih loh tih bak lo chu sum senna titlem se | Hma la hmasatuah tang ngei se | Mipui lam pawhin phur takin kan support thei ngei ang. 

Kum khat chuang lai SARS-CoV-2 (Severe Acute Respiratory Syndrome-Coronavirus 2) in khawvel a tih buai a, keini ram kilkhawr thleng pawha kan inkharkhip a, Covid-19 hri leng vanga thihna hial kan han tawn ve tak malh malh hnuah hian enge he hri leng hian min zirtir a, kan hma lam hun zel atan kan nunphung leh khawsak dan tihdanglam ngai kan neihte kan inen let a hun ta hle mai. Eng chen nge he hrileng hian min chenchilh dawn kan sawi thei lo; kumin chhung a ni mai thei, a aia rei deuh pawh a la ni mahna. Kan lo dawnsawn dan te en let a, a tha lai leh chhe lai emaw, duthusam loh laite kan hriat reng a, hei aia hri leng hlauhawm a lo thleng leh a nih pawha kan lo inbuatsaih theih nana kan hman thiam a tha hle mai.

Wuhan, China rama he hri an hmuh chhuah khan khawvel la hmelhriat ngai loh tak mai hrik a ni a; mahse, a hrik awm dan leh nihphungte Chinese mi thiamten khawvel medical science lama thiamna sangte banphak turin rang takin an chhawp chhuak a. A enkawlna damdawi emaw invenna tur vaccine lama hmalakna chak tak an kalpui nghal thei kha a ni a. A tihdamna tak damdawi la hmu chhuak lo mah se, enkawl dan tha zawk tam tak an hre hman a ni. Vaccine siam chhuak tur pawhin hetiang khawpa rang hian hrileng venna vaccine siam chhuah kawngah hian khawvel thiamna a la thawk chak ngai awm lo ve.

India ram bik kan en chuan hri venna vaccine siam chhuah kawnga thawh hlawk ber pawl ram kan ni a. Mihring tamna ber ram pahnihna kan ni a, ram mipui nawlpui vaccine laktir tur chuan a hautakzia kan hrethiam awm e. Chuti chung chuan vaccine kan han siam ta cheng a, kan politician, a bikin kan prime minister-te khawvela thang that tum luatah kan ram mipui mamawh zat pawh kan la siam chhuah hmain ram dangah a han sem chhuak ta pek a, vawiinah chuan dem a hlawh lian ta hle anih hi. He hrileng (pandemic) hi health disaster a ni a, medical science lama thiamna nena uluk taka hmachhawn a tul laiin bengchheng siama umbo theih ni awm ang maite’n ram mipui min bawl thul. Kan chhangchhe hle mai.

TB natna hi khawvelin a control tawh emaw a tih laiin a hrik hi inseam danglamin a aia enkawl khirh zawk Multi-Drug resistant TB (MDR-TB) chu kan buaipui chho leh mek a ni a. HIV lah nise vawiin thlengin a tihdamna damdawi a awm lo va, a hri inthlahpung chak tur venna antiretroviral drugs erawh tha tak tak a awm thung. Khawvelin a control tan emaw a intih laiin ram changkang US a West Virginia-ah te outbreak an awm thar leh bawk a. A dang pawh sawi tur tam tak a awm awm e. Heng ka han tar lan atang hian hri leng hi kan palzam mai tur a ni lo va, a lo hmachhawn kawngah pawh inthlahdul a pawi thei a ni.

Covid-19 hri leng hi kan control a, kan ziaawm tawh emaw tiin kan inthlahdul a, India ram state lian thenkhatah inthlan an puang a, political party-ten election rally turu tak tak an buatsaih a. Sakhuana lamah lah a nuai tel an fuan khawmna Kumbh Mela te an han buatsaih leh bawk a, hrileng hi kan zuam sual chiang hle a ni tih a hriat. India ram, Covid vaccine ram dang tanpui nana sem chhuak thei, intihtheihnan a hmang hial kha vawiinah chuan ram dangin min puih let an tum mek a, India mi an rama zin an khap leh chuah chuah tawh a nih hi. Keini state tereuh teah pawh lockdown avanga kan economy-in a tuar chung pawhin kan pun belh zel si a, kan inkharkhip leh lo thei ta lo a ni ber.

Hriselna hi a hlu em em a, hrisel turin kan khawsak kawngah pawh kan inuluk a ngai tih kan hriat a tul e. Damloh hre mang lo tan chuan damloh inenkawlna senso hautakziate hi kan hrethiam kher lo vang. Damlote pawh duat taka chhungte enkawl theitu an la neite hi a hlutzia kan hrethiam lo fo ang. Covid-19 hri leng erawh chuan inenkawl dan kawng a rawn thlak danglam hlawk mai a, naupang leh tar lam thlengin duat taka inbuaipui ngam a ni ta lo. Kan innghahna chu healthcare worker-te an ni ta ber anih hi. Sum neih viauin awmzia a nei meuh lo va, rangkachak leh bank account full khawpa sum neih aiin oxygen nei an intithei titih ta ber chu a ni e.

India ram hi healthcare lama kan budget dah tlem pawl tak kan ni a, kan thenawm Bangladesh, Sri Lanka leh Pakistan te pawh kan tluk lo niin an sawi. Indo thlawhna man to, Dassault Rafale kan neihte chuan min thlamuan zo lo va, a ram pumin oxygen leh ventilator, ICU bed kan inchuh ta luih luih anih hi. Keini state kilkhawr tak pawh hi engtin zel nge kan awm dawn chu hre mai lo mah ila tuna India rama buaina hi kan hmachhawn thei reng a ni. Kan sum dinhmun a chau hle a, chuti chung chuan kan neih ang ang hi healthcare atana kan reserve a hun ta hle.

He hri leng hian engchen nge min chamchilh dawn a hriat loh. India ramah May thla laihawl velah Covid-19 infection hi a san lai ber (peak) kan thleng chho dawn niin mi thiam thenkhat chuan an chhut. Chuti anih chuan May thla chawhnu lam leh June chho thleng hian keini state ah pawh hian fimkhur taka kan kal chhoh a, kan inbuatsaih a ngai hle ang. Hri leng laka kan him phawt hi a pawimawh a, chutih rual chuan kan economy hi engtiang chiahin nge a nghawng zel dawn hriatthiam a har a, a huphurhawm hle mai. Naupang zirna lam pawh hi department lamin hri leng dinhmun mila an ruahman thiam a pawimawh khawp ang. 

Engpawh nise, kan nunphung leh tihdan thinte a him zawnga thlak danglam chhoh zel hi chu kan tih makmawh a ni dawn a. Chhiat ni that ni kan hman dan te, biakin inkhawm leh program kan buatsaih dante thleng hian hotu lamin ruahmanna him an siam thiam a pawimawh hle ang. Kan sorkar hi dinhmun khirh takah a ding a, khawtlang leh kohhran pawhin theihtawp a kan support a tul hle dawn a ni. Chutih rualin kan sorkar pawhin inrenchem policy ruahman se, kan mamawh leh a tel lova kan awm theih loh tih bak lo chu sum senna titlem se, hma la hmasatuah tang ngei se; tichuan, mipui lam pawhin phur takin kan support thei ngei ang.