Kamchhuak

School tha kan tehna hi?

K. Lalrinchhana - Jun 06, 2021

... Matric result a tha tial tial a, kum tinin distinction-a pass ringawtpawh a za tel an ni ta zel | Central Service leh All India Service exam-ah erawh Mizote kan lang ngai ta mang lo | Exam result kan neih that viau lai hian kan zirna quality hi a tak takah chuan a lo la hniam fu a ni mai lo’ng maw?

Nilaini khan HSLC exam result, 2021 chu MBSE-in a tichhuak a, zirlai exam hi an vaiin 18,012 an ni a, heta tang hian mi 14,847-in an pass a, pass percentage hi 82.43% a ni. Distinction-a pass hi 2,904 zet an tling bawk. Kan hriat angin nikum chhung zawng khan Covid-19 hri leng vangin zirlaiten mumalin class an kal thei lo a, hei vang hian kumina HSLC exam zawhna hi kum dang ai chuan a awl deuh niin a lang a, hei hi kumina HSLC exam result that chhan pawh niin a lang bawk.

Tun hma, district council kan nih laia North East pum pui Assam Board hnuaia kan awm lai khan matric pass kha a har viau mai a, khatih laia first division-a matric pass chin ngatte chu IAS tling tura ngaih an ni deuh tawp mai a, rin ang ngei ngeiin an tling mai reng bawk a. Manipur Chief Secretary hlui, Pu PC Lawmkunga leh Mizoram Chief Secretary hlui, Pu M Lalmanzuala te hi Assam Board hnuaia second division-a matric pass an ni a, IAS erawh an vawi khat exam-naah an tling ve ve a ni. Anni ang bawk hi Zofate zingah mi dang pawh an awm nual mai thei. 

Tunah erawh matric result a tha tial tial a, kum tinin distinction-a pass ringawt pawh a za tel an ni ta zel a, central service leh all India service exam-ah erawh Mizote kan lang ngai ta mang lo. Exam result kan neih that viau lai hian kan zirna quality hi a tak takah chuan a lo la hniam fu a ni mai lo’ng maw? Tin, exam result, a bikin board exam result ngawr ngawr hi school tha tehna atana kan hmang lutuk te, exam-naa tihthat tum (exam oriented) lutuka kan inzirtirte hi a hnu zelah kan sawngnawipui zawk niin a lang.

Kan fate school kalna tur kan dappui laia nu leh pa rilrua zawhna lian ber chu, board exam-naah an result a tha em? Top ten-ah an lang pha em? Distinction-ah engzat nge pass tihte hi a ni. Hei hi nu leh pate rilru a nih avangin private school-te chuan board exam-naa tihthat kha an tum bulpui ber a lo ni ta a, board exam-naah an tihthat phawt chuan zirlai tam tak an hip ang a, zirlai an ngah pauh leh an hlawk dawn tih kha ‘ka vaibel’ tih tlukin an chiang tlat a ni. 

Private school pakhat hriat chian ka nei a, chu school chuan board exam-naah an titha thin khawp mai. Zirlai pawh an ngah a, hlawk pawh an hlawk bawk. Chu school-ah chuan kum tir atang phatin zirlaitechu board exam hawi (exam oriented)-in an zirtir nghal char char a, zirtirtute chuan kum nga chhunga board exam question chu uluk takin an chik a, exam-naa pawimawh turte chu uluk takin an thlang chhuak a, note tha takin an siamsak a, chu chu zirlaite chuan an bye-heart ta tlauh tlauh mai a ni. Amaherawhchu, exam-naa pawimawh tur chauh zira division sang taka pass hian thiamna tak tak erawh min neihtir hauh lo. Entir nan, Indopui I-na (First World War) chanchin lo zir ta ila, exam-naah a pawimawh lo tih vang ngawtin Indopui I-na lo awm chhan (causes) te, indo laia thil thleng pawimawh (course of events) te zir kânin indonain a nghawng chhuah (results/effects) chauh zir ta ila, Indopui chanchin chu a chinchhuakin ka hre dawn tawp lo tihna  a ni. Hei hi tunlaia school tam takinzirtir dan kalphung, belh chian dawl si lo chu a ni.

By-heart system-a a pawimawh lai chauh zir lawr den den hian ram ropui min thlen ngai dawn lo a ni. Chu ai chuan a text book hi chhiar tam ila, chhiar nasa ila, syllabus-ina min zirtir a tum, thiamna min pek tum hi kan varpawh phak ngat chuan third division-ah pawh pass ila, nakin zelah kan tangkaipui zawk tho tho ang. Kan mi hmasate pawh khan by-heart system hi an thlawp lo khawp mai. Pu Manzuala chuan, “Lehkha kan zirin by-heart zawnga kan kal chuan reilo teah kan theihnghilh leh mai a. Zirlaibu a bul atanga uluk taka kan zir a, kan hriatthiamna erawh chuan thiamna leh hriatna nghet tak min neihtir a, chutiang thiamna chu kan theihnghilh leh mai ngai tawh lo,” a ti a. Pu Liankunga (L) pawh khan, “Pawl 7 ka zirlai atangin by-heart system-in ka kal ngai lo a, high school leh college-ah pawh by-heart thinte aiin mark ka hmuh tlem phah thin. UPSC exam-ah erawh chuan a lo tangkai fu mai a, chuvang chu a ni ta ve ang, BA-a kei aia mark hmu sang zawkte leh MA-a first class-a pass te nen IAS kan exam ho a, anni chu an tling ta lo,” a tibawk. Board exam-naa pass tha tur ringawtin nge, nakin zela kan chhawr tangkai theih tur thiamna tak nei turin kan inkaihruai tawh zawk dawn?

Sawi leh sawi hnu, board exam result ringawt school tha tehna (parameter) bera kan hmang hi a fuh chiah lo a ni. India ram pumah hian College leh University zawng zawngte endik a, tehna hrang hrang hmanga an that dan aziraaccredidation/ranking pe thintu, NAAC (National Assessment and Accreditation Council) a awm a, NAAC chuan College leh University te hi kum 5 danah a endik ziah thin. Endikna hmachhawn ngam lo chu accredited college/university an ni lo tihna a ni mai a, institution tha tehna atang chuan an tla vang vang mai thin a ni. Chuvangin, NAAC accredidation-a an grade hmuhkha college/university thalehtha lo hriatnaawlsamberchu a ni. 

NAAC ina College a endikhian academic performance (exam result) chuah kha innghah nan a hmangber lo a, kha institution atangazirchhuakzirlaitekhaengzatinngehnahmu, engzatnge UPSC, SSC leh State Public Service Exam ah in ziaktling? Engzatinnge technical course zirchhunzawm a, engzat percentage in nge placement hmu ta tih kha an tehfung pawimawh tak a ni a, document an ngaih pawimawh em avangin dawt a sawi theih loh. SSR (Self Study Report)-ah zirlai kal chhuak hna hmu zat kan tar lan pawhin an appointment order min dil tel thlap thin. Hetiang deuh hian Mizorama school tha kan tihte hi board exam result atang ngawt hian teh ta lo ila, kum chhung chhunga kha school atanga zir chhuakte khan eng nge an tih tak? Engzatin nge hna hmu a, engzat nge competitive exam-ah in ziak tling? Engzatin nge doctor/engineer zir chhuak? Hengte hi school tha teh nan hmang tel ila, kan zirna kalpui dan hi a tidanglam deuhin a rinawm.

Share now