Zawhna: Mipa kum 50 mi ka ni a, zunthlum ka vei. Tunlai hian ka serh hi a bal ang deuh hian a chhung lam leh a liklu a khawk vak thin a, damdawi Azithtromycin leh Amoxicilin ka ei a, thla khat a dam deuh a, a awm leh thin a, inpawlin a zual bawk. Doctor pan ka hreh bawk si a, min pui hram teh.

Chhanna: Zunthlum natna hi a mak dangdai khawp a, taksa bung hrang leh peng kilkhawr ber thleng hian harsatna a thlen thei. Zunthlum (Diabetes)-ah hian thisena chini (sugar) awm kha a lo sang ta lutuk thin a, chu chuan taksa peng hnathawh a tibuai a, taksa tuihnang lamte thlengin a insiam dan leh composition a tibuai thei a. Thisen timur (blood cells) hnathawhte a tichak lo va, pem kan neih a, kan thisen timurten an tihil leh mai thin ang hi a tibuai a, pemte hi a dam har phah fo thin a ni. Chutiang avang chuan zai (surgery) ngai, zunthlum nei reng reng chu an zai hmain blood sugar control tha turin advice an pe hmasa thin a ni; a chhan pawh zaina hmuamhma a dam chak loh vang leh, thisen put a reh har thin vang a ni.
Mipa chu kan sazu hmawr liklu (Glans penis) lai hi a fai that a pawimawh hle mai a. A chhan pawh bawlhhlawh a inkhawl hma vang a ni pakhat a. Tun hmaa vai an zuna thu chunga an zun hnuah an sazu an silfai leh thin kha kan lo nuihzat thin a, a lo hygienic hle a ni tih hriat a tha. Mizo mipa tam zawk hi chu mingo leh midum thenkhat ang lovin kan sazu hmawr liklu tuamtu vun hian a khuh deuh zel a. Kan zun laia sazu kan lik loh chuan zun fep a chambang fo thin. Hei bakah hian baw a lo chhuah a silfai leh loh chuan liklu-ah hian a bet thei a, sazu lik hnua silfai a pawimawh hle a ni. Sex hman hnu phei chuan silfai ngei ngei a pawimawh a ni.

Sawi tak angin zunthlumah chuan vunro a awm hma zual a, liklu lai pawh hi a ro hma duh khawp mai; chumi avang chuan sex hman hian a pem awlsam bik a ni. Nangmah bikah hian i blood sugar control a tha tawk lo a nih duh hmel viau mai a. Sex atanga natna kai theih, sexually transmitted infections (STI) nei ni ta la, i damdawi eite hian a hrik chu a thah a rinawm viau. Mahse, Syphilis i lo nei palh a nih chuan Penicillin emaw, a chi dang emaw pawh i ei belh a ngaih a rinawm; chumi hre tur chuan VDRL test pawh lo ti thei la a tha hle mai. I zunthlum atan hian treatment chu i lak ngei a rinawm a; mahse, i in-monitor that chu a ngaih hmel. I damdawi eiin a control that loh chuan i treatment pawh tihdanglam a ngai thei ang.

I insawiselna bikah hi chuan damdawi hnawih lam chi aiin sazu hmawr enkawl fai a pawimawh hle ang. Sazu tihfai chungchangah erawh fimkhur a ngai viau. Tihpem emaw, tihpilh emaw a awl a, towel emaw, puan emaw-a hruk chi a ni lo va, sil zawhah pawh puan nema deh ro a tha ber. Ro tha se, zun zawhah leh sex hman zawh apiangin tui faia silfai uluk a pawimawh. Zunthlumah hian fungal infection a awm hma viau mai a, enchian loh chuan damdawi han chawh ngawt che pawh a fuh ber lo. Chuvang tak chuan hreh hle mah la doctor, a bikin Skin Doctor lo entir ngei thei la, i harsatna hi an puih theih che ka beisei.