Dr Ka Zawhna

Serh dinhmun tha tawk lo tan STC 30?

Dr. Chawnglungmuana - Jan 23, 2023

Serh/sazu fuk thei lo hi kan ziak fo tawh thin a, mipa tan chuan thil nuam lo tak ani awm e. Kum upa lam tawh te pawh hian min zawt fo mai. A enkawlna damdawi kan hman common ber chu Sildenafil hi ani a, a trade name chu chi hrang hrang a awm a, a lar zual chu Penegra, Dr Fixit tih te hi ani

Zawhna: Ka pu, tunlai hian serh fuk tha theilo tan STC 30 hi a tha viau in an sawi a, thudik ani ang em? Enge i hmuh dan?

Chhanna: I damdawi rawn sawi hi ka lo la hriat ngai miah loh ani a. Ka doctor thiante ka han zawt hlawm a, anni pawh hian an hre hlawm vak lo anih hmel. Ka rin danin doctor chawh lem lovin an lo ei thin anih hmel. A chinchang internet lamah ka han en a, Superlife Total Care (STC 30) tihin a lo awm a, damdawi chah chi angin an zuar anih hmel a. Damdawi dawr ah an zuar em tih erawh ka hre lo thung. 

A literature lama a lan dan chuan a hmanna a tam hmel khawp mai a. Stem Cell (kan timur hrang hrang siamtu timur special bik) ah hna a thawk niin an sawi a, chumi kaltlang chuan timur (cell) chhe tawh a siam tha leh thei niin an ziak bawk. Eng ang chiah a rintlak nge anih erawh sawi a har viau mai. Hlawk pui an lo awm anih chuan a tha ah ngai ta ila, mahse damdawi tha chin reng reng hi chuan side effect an nei tlangpui a, kan senior doctor sawi fiam ang deuhin damdawi side effect nei lo chuan effect pawh a nei lo tlangpui a tih ang deuh te pawh a ni thei bawk.

Serh/sazu fuk thei lo hi kan ziak fo tawh thin a, mipa tan chuan thil nuam lo tak ani awm e. Kum upa lam tawh te pawh hian min zawt fo mai. A enkawlna damdawi kan hman common ber chu Sildenafil hi ani a, a trade name chu chi hrang hrang a awm a, a lar zual chu Penegra, Dr Fixit tih te hi ani a. 50 mg leh 100 mg in an zuar tlangpui. He damdawi hi a tha phian a, a him ang reng viau a, mahse lung tha lo nei (cardiovascular disease) te ah erawh chuan hman fimkhur a ngai thung.

Sazu fuk thei lo emaw fuk tha thei lo hi Erectile Dysfunction (ED) tiin kan sawi mai thin a. A chhan hrang hrang a awm thei a, chhan hriat loh pawh a tam. A chhan common tak tak zingah zunthlum, thisen sang te hi ani awm e. Psychological lam a common viau bawk a, chuvangin Psychiatrist emaw Clinical Psychologist te enkawl chi te pawh ani fo thin. Sawi tak angin a enkawlna damdawi te hi fimkhur ngai an ni hlawm a, chuvangin doctor rawn hmasa lo chuan mahni thu a ei mai loh a finthlak ang.

Share now