Mizoram roreltuten thlasik thutkhawm an nei mek a, a tir lamah budget pharh a ni a, hun awl nei deuh tan chuan kan thlan lal MLA rualte thupui hlapui vai vel hi a hmuhnawmin a bengvar thlak khawp mai a, zawhna leh chhanna te, private resolution sawihona te pawh a ngaihnawm viau thin. Ram hruaitute hian an che vel hi mipuiin an thlir thup tih an hre chiang tawh viauin a lang a, chet sual palh hlek leh tawngkam chheh sual palh zauh pawh a mualphothlak thei a ni tih pawh an haiin a rinawm loh. Assembly session laia MLA ten ‘Ka bial’ tih an lam thin hi an bial mipui tan chuan a lawmawm duh viau a; mahse, thenkhat chuan an lam zing mah mah deuh thin. U.S. President hlui John Quincy Adams kha pa dangdai tak, ram hmangaih em em mai a ni a. Massachusetts atanga senator a thlan a ni a, a chet dan phung kha a dangdai khawp a, ram tana tha tur nia a ngaihah chuan an party leh midang ngaihdan tur dawn loin a kal tawp mai a. Ani ngaihdan chuan a bial aiin ram pum huap U.S. Senator a nihna a pawimawh zawk a, amah thlangtu Massachusetts mipuite lawm zawng aiin ram pum tana tha tur a ngaihtuah zawk avangin Senate-in dan an siam tumin an duh loh lam a tan tlat mai a, rei lo teah a tlak phah ta nghe nghe a. Lansarh duhna leh lal leh tlin zel duhna hrim hrim rilru pu ni se a bial mipuite duh dan a ngai pawimawh ber ang; mahse, chu ai chuan U.S. senator a nihna a dah pawimawh zawk a, a tlak phah ngam a ni. Hun a lo kal zel a, ram hmangaihtu tak tak a ni tih an hria a, President hial a ni leh ta tho a, vawiin thlengin ram dang nena inkungkaihna lama thawhhlawk ber zinga ngaih a ni a, ram hmangaih ber pawla sawi a ni bawk. Kan MLA rualte hian an bial nge Mizoram pumpui an dah pawimawh zawk ang? Ram hmasawnna vei tho si hian an bial bil chei a, an dinhmun insawhngheh zel hi an ngai pawimawh ber a nih chuan an nihna an hai a ni ang. Bial pakhat MLA an ni lo a, Mizoram MLA an ni. Chutiang rilru an put loh chuan ruling MLA nei lo bial apiang an ro mai dawn a ni. Tunhma khan ruling MLA neih leh neih loh a inthlau tih a ni thin a, tunah pawh hian a la ni tho maithei. Hman atang tawhin sorkarin ruahmanna pawimawh a siam hian CM bial te, minister bialte hian duhsak an hlawh bik deuh a ngaih tur thil a awm zeuh zeuh a, a pawi khawp mai. Hmasawnna kai rual loh chhan ber pawh hmun thengreng zawk leh kilkhawr zawkten ngaihsak an hlawh loh vang a ni ber. Ka ngaihtuah fo thin chu kum tin a sorkar laipui leh hmun dang atanga Mizoram hmasawnna tura sum lokal te hi dik takin, a nihna tur takah hmang ta ila... chutiang bawkin thingtlang hmasawnna tura ruahmanna hrang hrangte pawh hi dik taka hman thin ni ta se la chuan vawiinah hian Mizoramah hian mi rethei an awm mang lo hial ang a, thingtlang mite pawh an lungawi viau ang. Mahse, thingtlang hmasawnna tur sum lokal tam ber hian thingtlang mite a thleng pha lo thin thung, hei hi a veiawm khawp mai. Tun hnai lawka Zamuang khuaa kan kal tumin an khaw pa pakhatin huan neituten an sum dah thatna tur bank an mamawh thu min hrilh a. Sorkar hian thingtlang mite chawikanna tur leh lo neitute hamthatna tur zawng hian ngaihtuahna zau zawk sen a ngai khawp mai. Aizawla Rural Bank an din thar sup sup mai a, thingtlang mite hamthatna tur bank ni si hi khawpuia chengte hian an hlawkpui ber mai lo’ng maw? Aizawlah hi chuan commercial bank hrang hrang, multinational bank thleng a tam tawh viau lai hian thingtlang lama bank din belh zel turin thuneitute pawh hian tanla zel se. Tun tum Assembly thlasik thutkhawm chu thal laia an thukhawm ai chuan a ngaihnawm ta deuh a, an chhangchhe lutuk ta lo a, kohhran te deuh indang ang mai kha chu an ni tawh lo. Ama’rawhchu, eptu lam MLA an tlem mah mah a, an intam hneh lutuk deuh hi mi tam takin an duhkhawp lo deuhin a lang a, chu achhapah an zinga pahnih khat bak hi chu session atan hian an inpuahchah tak tak vak lo emaw tih mai tur an ni leh zel a. Democracy-ah chuan sorkar tha tak a awm theihna atan eptu lam an that a ngai a, sorkar kal dik lohna lai te, thutlukna tha lo an siam ang chi te phawrh chhuak a, a tul anga mipui thinlung chawk tho zawnga an kalpui thiam chuan sorkar pawh a fimkhur phah thin. Eptu MLA zingah mipui pawhin an fak deuh langsar bik an awm a, anni hian Assembly session hi an awi nung hram hram ti zawng pawhin a sawi theih awm e, pakhat phei chu ruling MLA lakah house leader pawhin a thlavang hauh deuh nghe nghe kha. Eptu MLA te hi tun ai hian tang leh zual ta se a, sorkar hmalakna hrang hrangte zir chiang leh zualin, sum dinhmun leh sorkarin a enkawl dan te hi zir chiang thin se, nasa zawkin sorkar hi han lepse ta se a hlawk thlak leh zual ngei ang. Tun session-a ha hawlh zak pakhat chu ‘Compensation hnam kan ni’ tih chungchang kha a ni. Mahni hnam kan hmuh dan hi a inang lo tlang awm hlawm viau awm e, keinin rinawmna hi kan hnam ze pui a ni a, hnam dangte pawhin kan pi pute an ngaihsan chhan a ni a, chu zia chu kan la hloh vek lo a, hruaitu tha takin min hruai se hnam rinawm ber pawl kan nih theih kan rin laiin thenkhat chuan hnam hmusitawm ber pawla min ngai tawk an awm a ni mai thei. Kan CM-in, ‘Compensation hnam kan ni’ tih a sawi khan ngaihtuah a tithui viau a, mi tlem te chauhin (za zel a pakhat pawh tling lo turin) dik lo taka compensation an lak avanga compensation buaipui luai luai hnam anga min puh kha hriatthiam a har khawp mai. Kum 2009 pawh khan hetiang chiah hian a lo sawi tawh a, mahni buaina hi hnam pum buaina emaw kan ti pawh a ni maithei e. Ram hruaitu thenkhat thusawi a ngaihnawm viau laiin thenkhat thusawi han ngaihthlak kha chuan an thu khel ber a an man chiah lo tih a hriat a, ngaihdan hlui pui pui nei pawh an awm leh zauh thin. Kawngpui tha chungchang sawitu pakhatin kawngpui tha nei tur chuan hnam upa tak (european-ho ang) nih a ngai ti zawnga a sawi kual chiam te kha a zia lo deuh. Lengpui airport runway tha tak a siam theih chuan he ramah hian kawngpui tha tak pawh a siam theih tur chu a ni. Hman atang tawhin kan kawngpui chhiat chhan hi chu, zep thu a awm lo, corruption vang a ni. Ram buai hmaa kawngpui leh tunlai kawng khaikhin chiam ai chuan hei hi pawm ngam tlang ila, kawngpui siamna sum chingpen nasa lutuk hi vei tlang ila, insiamthat tum ila kan tha mai ang. Finance minister-in kan sum dinhmun that loh zia a tarlan te, kumin chhunga pung neia sum puk (WMA) tamziate ngaihtuah chuan tun assembly session atang hi chuan inrenchem taka kal a, dik tak leh fel fai taka sum hman a tulzia a lang a. Sorkar laipui kalphung inthlak mek zei zia thlir chunga hmasawn zawng a kal thiam a ngai dawn tih a lang reng a, chumi hre reng a kan hruaituten min hruai chuan kan hmabak a eng viau thei a ni.