Zawhna: Ka pu, kum 50 ka pel ve tawh a, nupui neiin fa pathum kan nei a, kan fate pawh a tê ber matric a zo tawh bawk. Ka buaina chu kan nu hi a sex drive a hniam em em mai a, a thi a la hul lo nangin nupa nun hman châkna hi a nei lo a ni ber awm e. Ka hrethiamin ka dawhthei viau a; mahse, mipa na na na chu sex hman châkna a lo awm lo thei lo va, nupuiten an peih miau loh chuan ngaihtuahna hi a kal kawi duh viau mai. Hmeichhe dang buaipui hi chu ni theiin ka hre si lo va, engtia han tih chi nge mawni dawn le? Inentirte ka han rawt ngawt a, a duh mang bawk si lo va, insawiselna dang a nei pawh a ni lo bawk nen. Min puih theih chuan ka lawm ngawt ang.

Chhanna: Mihring reng reng hian tisa châkna hi kan pianken a ni a, chutih rual chuan mihring kan inan loh em avangin tisa châkna neih dan pawh a inthlau thei viau mai.

Sex chungchang hrim hrim hi kan hnam ziaah hian sawi nuam lo kan tih ber pawl a ni awm e. Kohhran huang chhungah phei chuan sawi tha ngam kan awm meuh lo va, Pastor te’n nupui pasal nei tur counseling an pek hian an sawipui ngei thin chuan ka hria a; mahse, eng ang level-in nge an sawipui erawh ka hre tam lo. Nupa hetiang lam harsatna nei te hian kan Pastor te hi an pan thin em tihte pawh ka hre tam lo hle. Synod Kohhranin Family Guidance & Counseling Center an siam hi tangkaipui tak tak chu an awm tih zawng ka hria a. Ka rin ai tak chuan nupa kar harsatna neite pan ngam tur hian an vawrh lar tawk lo deuhte chu ka lo ti mai mai thung.

Nupa hlimna hi chhungkaw boruak hriselna atan a pawimawh khawp mai a, nupa hlim tur chuan nupa nun sex life lamah pawh inhriatthiamna thuk a pawimawh hle mai. Chutih laiin sex chungchang hi kan society-ah subject sawi nuam lo tak a nih vang te, zahmawh zawnga kan kaihlek leh fiamthu hawi zawnga kan sawi nasat avang hian a serious na lai hi a pawlh dal ni pawhin ka hre thin. Tleirawlte zingah Sexual & Reproductive Health chungchang hi zirtirna ka pe fo thin a, hmanni lawk khan College Students te zingah ka sawi leh bawk a. Sex hman dan kan hriat phian lai hian sex chungchang thuril leh pawimawh te kan lo hre tawk lo hle a ni tihte ka hre thar. Hemi lam hawi zirtirna hi kan mamawh tam hlein ka hriat phah bawk.

Sex drive (tisa châkna) hi mipa leh hmeichhiah a inang lo khawp mai a. A tlangpuiin mipa aiin hmeichhia an hniam a, sex hman kawngah pawh mipa chu sazu a fuk chuan sex hman an inpeih a ni nghal deuh mai a, hmeichhiaah erawh chuan a thawh dan a muan vangin innghah hrette an ngai fo a, chutiang avang chuan mipa lamin dawhtheih leh nghah peih te a ngai a, châkna kaih thawh hmasakte a tul fo thin. Tin, kan zia leh rilru sukthlek hi a inang lo nasa khawp mai a, hmeichhia chu inchhung khur te, fate leh khawsak phungin an rilru a luah nasa a, mipain kan lo ngaihtuah lem loh tam tak hian an rilru a luah thin. Nu an nih hnu, an chhangchhiat hnu phei chuan heng an rilru luahtu tam zawk avang hian nupa nun hman lam hrim hrim pawhin pawimawhna (priority) a nei chau duh viau.

Sex drive hi kan hriselnaah a innghat thui hle mai. Physical fitness mai bakah rilru lam mental health lam pawh a pawimawh hle. Damlohna chi hrang hrang, lang mai lo, entirnan Zunthlum leh Thisen sang te hian sex drive a tihniam duh khawp mai a, Thyroid lam problem te, thi neih buai te leh mental lam harsatna common zual, Depression leh Anxiety Disorder te hian sex drive a tibuai duh hle bawk. Chutiang avang tak chuan i nupui pawh hi chiangkuang taka in-check-up a pawimawh hle. Mental problem eng emaw tak a lo nei thei a, chutiangah chuan tha taka sawipuiin Psychiatrist te pawh panpui thei la a tha hle mai. Nupa inpawhtawn taka sawi dun theih hi a tha khawp mai. Hetiang harsatna avang hian uirena a thleng duh khawp mai a, chuvang chuan in chinfel thuai a tha ang. Family Guidance & Counseling Center te pawh pan a tangkai thei ang.