Zing ni chhuah hmain harh ila, ni lo chhuahna tùr khaw chhak lam thlír vang vang ila, vawt tiin mûr seng seng ila … thenawm khaw véngte la tho lo se, zing thingpui thlum … a nih loha vêka leh thingpui sen háng leh kurtai in tùr pawh la chhuangin la peih lo ila … a nuam veng veng tho—thlasik a intan mék miau a!

Kawt leh tualah, pangpar khawina, pot chenin, tu tui pêk mah ni loin lo tui hlup mah se pawi kan ti lo ang—Lal pian hun champha a hnai tih min hriattírtu a ni miau a. Kawr leh ruam han thlír ila, naupang deuh tán phei chuan zuana han chen tâk bawrh bawrh châkawm khawpin lapaw chhùn khâwm emaw tih mai tùr chhûmin, a lo bawh paw var chúk a. Chutih lai vêk chuan khaw chhak káwlah ní lo chhuak chuan, chûng chhûm chu hmanhmawhna nei miah loin a’n vai kiang delh delh a. Chûngte chuan a ni, khawvêl hi ti lungawia ti  mawi thin ni—Sikpui ni êng lo chhuak hnathawh chuan!

Kawta tlangbàna kan puan pho seng theihnghilh te chu an lo zawr huh hnêp a—tu sûk nawna tu tleuh nawn mah ni si loin. A tlangbàn, thirzaia hrim hrim pawh chu, a lo thlan hluam mai. Dithli farfém zawna kan pangpar khawite pawh, tu tui pêk nge ni ang aw … tih tùr khawpin an hul lo nasa! Kan kawt tuala kan motor hùn zawng zawngte lah chu siltu nei hran miah loin an lo huh hluam bawk a. Chûng chuan a ni, calendar en miah lo pawha kawr thar neih hun a hnai ta tih min hriattír thin ni!

Kawm thlang huana dawl mawlh khu mawi ka ti thin! Hnim hnah ropui leh par chhuah mawi ber pawh a ni ngai lo. Mahse, a hnah, huh miah si loa tuifím, fím êm êm lo tling, zing ni chhuakin tle sura a lo chhun khuan a chawimawi asin! A màwina chu amah dawl hnah kha a ni lo a, dai lo tling ngawt kha a ni lo a; a tlintírtu kha a ni mawi ni … tih rilziate hi han hre thiam hlawm tak ila chuan, Krismas màwina leh ropuina hi Millennium Centre-ah kan zawng suau suau hlawm lo tùr a nia le! A ni asin! Kei hi ka mawi thei ngawt lo a, min Sil faitu, Bethlehema nau lo piang, Krawsa thi avàng chauhin ka mawi thei … tih thuchah, Dawl hnahin a paite hi hmu thiam tehrêng ila aw …

Ní a lo tláng sáng a, phùr êm êmin, an mahni thlírtu tùr an tam em, tam lo em, an làwm ang em, làwm lo ang em, tih pawh ngaihtuah ‘ve’ loin, tho fahrana thoin Tlangsàm leh Nihawi párin min vul khalh a—keinin khawvêl thilah kan buaisan a! An pár màwina zawng zawng thlír hman loin, hnathawk hotu ber ni àwm hrimin, tùlna chuan kan mit a hup zo a. Thlasik tlai ni tla eng mawi pawh thlír hman loin office lama kan hna kan ni lénpui … thim thakpui a—ui nacháng lah kan hre dèr lo! Thlasik ni êng mawi aiin sumin kan thluak a luah ta zâwk a, mi hman chauhte thlìr tùrah riak kan ngai ta!

Khawvêl hi mawi kan ti tawh lo a—kan neih rosumin min rûksak tawh avàngin. Kuhva scope la awmchhun seh chilh chunga “Hmãnah Kaisar lal lian réngpui …” tih ai chuan, Burma kuhva hring, a rah lianpui khel chungin kan “I won't forget…” duh zâwk ta!

Khawvêl hi mawi kan ti tawh lo a—thlasik khua hi mawi kan ti hman tawh lo! Zing ni chhuak leh tlai ni tla sipisial bîkzia te hi, kan fùr leh thál ni chhuak leh tla hmuh zo vek ta! Thing hnah tla kawlh zo ta duak mai te pawh hi, pawi kan ti zo ringawt tawh a, computer leh phone hmai hmaah chuan a màwina kan pawh thei tawh lo a nih ber mai hi! Ni e, Fb, WhatsApp leh IG ten thil máwi min pe ta niin kan inhre ta si a!

Thlasik rim hi hnár hmanga hriat tum phêttu chuan a hre chatuan lo ang a, Siamtu ropuina leh them thiamzia hi, a dam chhúng tawi tê-ah pawh a hmu ve thei reng reng lo ang. Zíng daifim leh kawrlum chauh paw’n Lal pian hun an hmuah mék laia, lo changkànsan tum phêt hi a kawng hmang thlâwt lo! Chutiang mite thinlungah chuan Lal a piang har ngawt ang! Chibai bûkna rapthlâk pêk tum te pawh kan ang dawn hial hial ang … tih pawh ka hlau!

He thlasik hian kan nu leh pa, kan pi leh pute … a! Mizo tawh phawt zùnah rau a pai ve hrim hrim tih inhrilh thar a ngai hial mai te hian a nia ka lunglai ti na thin ni! Hêng Tlangsàm par leh chhak lam kopanga Nihawi pár lo vul chúkte hi, Mizo tan chuan Calendar en kher ngai loa hunpui hnaih hun min hriattirtu an ni thin. Thenkhat tán zin hun tih hriattírtu a ni a, mahni khua ngeia Mas hman hun a ni. Thenkhat tán chhúngkaw intawh khâwm hun, a kum linglet inhmu tawh lo leh lehkhathawn hmang chauha chanchin inhrilh thinte tana hun nghahhlelhawm a ni. Naupang thenkhat tán kawr thar lei tùra bazar kal hun a ni a, chu chu thil ropui tak a ni; Mas ni chiah chiaha unaua kawr inang hâk hun a ni miau a! Kohhran mi thenkhat tan, lèn khâwm châk thar viau hun a ni a; ruai theha duhtâwka sa lim hun a hnai tih hriltu pawh a ni. Naupang tan dawhthlâk hun a hnai tih a hriat theihna sign a ni a; thingpui sen leh kurtai in-chaw-be hun ber a ni tih pawh hrilh kher kan ngai ngai lo.

Sik leh sa inthlâkin thlasik a rawn her chhuahpui hian, Bethlehema nau lo piang ropuina kha pho chhuah tumin tan a la thin a, theih tâwp chhuahin min hrilh nawn a tum thin tihte hi kan va’n dáwn pha ta lo êm! Zingah tho la, khua han chuan teh. I hmu thiam em? I hre thiam mai lo em ni? Thlasik zing daifim atang ringawt pawh hian Nau lo pianga hi chibai bûk tùr chu kan ni maw le! Krawsa khen beh tùr, ran chaw pêknaa lo piang, Tlàwmna nun sin tluan kha entawn ve ni ila chuan, he thlasik rau hian kan rilruah eng thu emaw chu a sawi ve ang maw le! 

Ngàia thil nei thang kan nihna tak hi a ni kan than mawh báwk chu! Pêk kan nih hlut thiam lo; chatuana chanvo ropui a thlàwna min pêk hre thiam lo kan ni ta em ni, Mizote hi? Ka tana ran chaw pêkna thlênga lo piang chibai bûk tùr hian ka sáng ta deuh nge, sum ka ngah ta deuh aw? Thlasikin khawvêl mawi a pêk hmu thiam lo tùrin pawisa note hian ka mit a ti del ta em ni le? Thlasik boruak vawt nuam lo thleng hian ka rilruah ran in min thlen nge bazar leh park leh kàwn chei thleng chauh?

Kumin thlasik lo thleng mék hi, Lal thar lo piang chu rilrua chibai bûk chungin, khîng zawhnate khi, “Ni lul lo e!” tia chhàn i tum theuh ang u.