Kar hmasa khan sikulpui kawn kan rawn thleng chiah a nih kha. He kawn hi kawngin a rawn pawh tam khawp mai. Dawrpui kawng, Khatla kawng, Mission Vengthlang kawng, Mission Venglai kawng, Zosap vangla 2 kawng, Chhimlam kawngpui, Venghlui kawng, Sikulpui step, Tuikhuahtlang kawng tein a pawh vek a ni. Tun hmain (1930 vel) in a awm ngai lo. Sikulpui step khi sap kut chhuak mawi taka rem step 52, a sir tuaka tui liankawr awm, a laia chawlh hahdamna tur awma siam a ni. Sikulkawn timawitu a ni. Mahse, khi Aizawl College tih angreng in sak mawi pawh ni khian a hliah chhe khawlo zo ta vek a, thil hlui kawl that atan a awhawm tehlul nen, a step phei chu an thiat khawlo zo tawh nghe nghe emaw ni?!

Tuna Republic kan tih tak hi Venghlui nena kan inpawhna a ni thin. 1950 hmain in pakhat chauh a awm, chu chu tuna Republic Vengchungin Biak ina hmuna an hman tak hi a ni. He hmunah hian 1948 vel khan a ni ta’ng, Capt. L.R.Sailo (Kelsih lal, Lalsailoa fapa) an improved Basha type-in in mawi fe, ‘KELSIH HOUSE’ a sa a ni. Chu lo chu in dang a awm ngai lo. He kawng hi 1950 Republic Day (hmasa ber) khan khawtlangin an lai a, Pu Menan a chek hmasa ber a, chutah mipuiin kan chek ve ta a ni. Kei pawh kum 21 ka ni ve tawh a, ka tel ve nghe nghe. He kawng kama in sa hmasa pawl chu Muallungthu lal, Chhuanvawr fanu Chhungi tih vel kha ni takin ka hria.

Mission Venglai kawng pheiah pawh hian in a awm ngai lo. Batlangken kung 4. 5 a awm a, 1935-a King George V-in kum 25 ro a rel lawm tumte khan ‘LONG LIVE THE KING’ tih tar nante an hmang thin. Upa Vanchuanga (L) in hmunah te khian Bul thur Hreiha hlang laia laia liante Thingsaiphaw te a awm thin. Thingsaiphaw sang deuh kawrawngah chuan Chawke a awm thin a, sava hian chaw pek an inchuh em ni tih khawpin an chawm hut hut mai thin nia! “Chawke in lal a hlawh, savain an chawm thin,” tih kha a dik teh a nia. Lawr vain a dak ang phat a, an chawm hut hut mai maw le!

New Street kan tih maite khi hmun ruak vek a ni. Kawng thlang deuh hlekah khuan puan tah in, mission hmeichhe sikulho puah tah (la deh) zirna a awm thin. A thlangah chuan khur lianpui pui 3/4 a awm a, Pu Lalkhuma min hrilh danin Tuikhuah tlanga tuikhuah an siam khian, a mawng phahah boulder atan lei pangngai hi hlum angin lu tiat tiatin an hlawm a, an rawh ling vur a, chu chu khi tuikhuah mawngphah atan khian an hmang a ni tih min hrilh. Chung khuarkhurum chu a awm thualh thin.

Mission Bookroom chu Synod gate-pui vei lam bera chhohah khian bangla han thleng si loin rangva in lian vak lo a awm thin. Mission biak inpui chu a hmun ngai rengah hian a ni tho a, ka hriat ve phakah chuan, rangva inchung sen, porch (inte) nei a ni thin. Biak in thlang chu Mission Venglai leh thlang lo chhuahna kawng a ni. Biak in thlanga Ngawivung ruam te hi in a awm lo.