Dr Ka Zawhna

Sildenafil Citrate Tab. IP 100mg---Dr. X 100

Dr. Chawnglungmuana - Jun 01, 2021

Sildenafil Citrate Tab. IP 100mg---Dr. X 100

Zawhna: Ka pu, mipa kum 60 tling tep tawh, Diabetes Type 2 nei ka ni a, sex lama chak zawk nan Sildenafil Citrate Tab. IP 100mg---Dr. X 100 hi Viagra tlukpui a ni e an tih avangin ka lei a, ka la hmang/ei lo va, a hlauhawm ang em? Sex lam chakna atan a tha ang em tih hi min hrilh thei la ka lawm khawp ang.

Chhanna: Mihring hi kan kum a lo tam hian kan tisa châkna, sex drive hi mi tam zawkah chuan a lo hniam ve tial tial thin a. Insawiselna nei hranpa lo pawh hian chu chu kum tamin a rawn thlen pakhat a ni ve hrim hrim. Chutihrualin mihring kan inang vek lo va, kum 70 tawhah pawh a la in-fit tak, fate pawh la nei lehte pawh an awm tho tih erawh hria ila. Kum a lo tam piah lamah hian natna thenkhat, sex drive tihniamtu, mipa sazu fuk tha thei lo thlen natna common tak pahnih chu zunthlum (Diabetes) leh thisen sang (Hypertension) te hi an ni.

I rawn sawi damdaw,i Sildenafil Citrate hi sex drive tisangtu a ni hauh lo va, mipa sazu fuk tura pui theitu damdawi tangkai tak erawh a ni thung. Chumi awmzia chu he damdawi ringawt hian sex lama chakna emaw, châkna emaw a thlen lo va, sazu fuk turin tisa châkna a awm hmasak a ngai a, tisa châkna tizauthau zawnga hmalakna a awm loh chuan a damdawi hian hna a thawk meuh lo. I damdawi ei lai zingah sazu fuk tur tibuai thei chi ei i neih phei chuan he damdawi hian hna a thawk tha hauh lo bawk ang.

Sildenafil hi damdawi tha tak a nih laiin side effect a nei ve nual a. Lu hai, lu na, hnar ping, pum nuam lo, hmai sate a thlen ve thei a. Tin, kum tam lamah phei chuan BP hniam thutte a thlen thei bawk. Chuvangin, i fit em tih hriat hmasak a tha hle mai. Duhthusamah chuan i doctor lo inentir tawh (i zunthlum atan hian doctor rawn i nei tawh ngeiin ka ring a) te lo zawt hmasa leh thei la. Harsatna dang, lung lam fel lote i neih leh neih lohte hre hmasa phawt thei la a tha ang.

Share now