Ram hmasawnna (Economic development) chungchang hi kan hre lar khawp mai a, inthlan dawn hnaiah phei chuan politician-te inzawrhna ber a ni thin. Ram hmasawnna han tih hian hausakna te, changkanna te, in leh lo tha pui pui te, lirthei tha tak tak te hi kan rilruah a lang fo thin a, mahse heng hi ram hmasawnna han tih tur a tling lo fo; mipui mimir thleng phak lo, mi tlem te hmasawnna vang chauh a ni zawk fo thin. Chuvangin, mipui mimir thleng phak hmasawnna ‘Social development’ hi mi thiamte chuan an ngai pawimawh hle a ni. Social Development chu ram bial khata chengte hmasawnna chungchang sawina ti mai ila a dik awm e. United Nations Research Institute for Social Development (UNRISD)-in a hrilhfiah dan chuan — mihring khawsaknaah te, khawtlanga inkungkaihnaah te leh khawtlanga thawhhonah te a tha lama hmasawnna lo thleng hi social development chu a ni a, chu hmasawnna chu (mipui thlante rorelna fel tak hnuaiah) a rualkhai anga, a tlo tur a ni bawk, tiin. Mipui mimir sukthlek leh rilru put hmang lo inthlak danglamna te, hmanraw tha zawk leh tih dan tha zawk hman tangkai thiamna te, zirna lam te, eizawnna lam te, hriselna lam te, ei leh in lam te, vantlang himna lam te, chenna in leh silhfen lama hmasawnna, rethei zawkte khai chhuah te...a tawi zawngin Social development chu kawng tinrenga mipui vantlang hmasawnna hi a ni. Rualkhai taka mipui mimir dinhmun chawikanna hi social development-in a tum ber chu a ni bawk. Economic development leh Social development hi sawi hran hleihtheih loh khawpa inhnaih leh inkungkaih a ni a. ‘Economic development’ (neih sum leh thilsiam/tharchhuah leh sumdawnna lama hmasawnna) hian sum leh pai kaihhnawih lama hmasawnna a kawk deuh bik a. Chutihlaiin, social development chuan mipui vantlang dinhmun chawikanna lam a kawk thung. Mi tin a huap a, a rethei berte thleng phak hmasawnna a nih ber chu. Ram hmasawnna zar hi mipui vantlang hian kawng hrang hrangin an zo tur a nih laiin ram thenkhat, hmasawn chak (economic growth rate sang) takte pawh hi mipui mimirin a zar an zo tawk lo thin a, mi tlem zawkte hmasawnna chauh a lo ni fo thin. Chuvangin, social development chu mi zawng zawng huapa hmasawnna a nih avangin hmasawnna tak tak a tling a ni. Mipui vantlang hmasawn dan (Social development) tehfung hrang hrang a awm a. Mihringin nunna leh dam khaw chhuahna atan a mamawh (basic human needs) te hi hlawm hrang pali ah then a ni a, chungte chu: Nutrition/Food & Basic Medical Care (Taksa mamawh chaw tha leh damdawi lama inenkawlna), Water & Sanitation (Tui leh inthiarna leh bawlhhlawh paihna), Personal Safety (Mihring himna) leh Shelter & Clothing (Chenna in leh silhfen). Hengte hi mipui vantlang hmasawnna tura a bulpui an ni a, thenkhat chuan ‘Social infrastructure’ tih pawhin an sawi bawk thin. Mi thiamten retheihna (poverty) an tih pawh heng mihring mamawh bulpui (basic human needs) neih pha lote dinhmun sawina hi a ni. Taksa mamawh ang ei leh in tur nei zo lo te, silhfen tha nei lo te, chenna in nei tha lo te, hriselna lama inenkawlna tur nei lo te hi mi rethei chu an ni tihna a nih chu. Ram hrang hranga chengte dinhmun zir chiang thin Social Progress Imperative-in nikum (2014) a Social Development Index a chhuahah khan ram hrang hrang 132 an zir chian zingah India hi a hniam pawlah awmin 101-na a ni a, ram thenawm Nepal leh Sri Lanka ai pawhin a hniam zawk a, China pawh hi 90-na a ni bawk. A buatsaihtu Social Progress Imperative a executive director Michael Green chuan, “Sum leh pai leh sumdawnna lama hmasawnna hian mipui nawlpui hmasawnna a thlen tawk lo tih he index hian a tarlang,” tiin a sawi a. Chumi ti chiangtu chu tunlaia ram hmasawn chak ber pahnihte - China (90-na) leh India (102-na) dinhmun hi a ni, ram hmasawnna hi mipui mimirin an chhawrbawk tawk lo, tihna a nih ber chu. Mizoram pawh hi ngaihtuah thleng ta ila, zep thu a cheng lo, hmasawnna zar zotu hi an tam vak lo a, mipui nawlpuiin a hlawkna an tel pha lo fo thin. UNDP pawh hian kum tin Human Development Report an ti chhuak thin a, nikum report (HDR 2014) ah khan ram hrang hrang 187 zingah India hi 135-na a ni a, a hniam pawl a ni tho a nih chu. HDI-ah hian tehna atan Hriselna lam (Mihring dam rei zawng), Zirna lam (Education) leh sum lakluh zat (GDP) te hman a ni. Heng tehfung hian mipui vantlang dinhmun a phochhuak tha viau a ngaih a ni a, ram changkang leh changkang lo tehna pawimawh tak a ni bawk. A nihna takah chuan Human Development leh Social Development hi thil hrang anga sawi thin ni mah se a danglamna a tam vak lo, ram hrang hrangte dinhmun an inang tlangpui zel a, sawi pawlh a ni fo thin zawk. Ngaihtuahna zau zawk nena kan ram dinhmun kan thlir theihna tur atan leh ram hmasawnna kan sawi thin hian mipui vantlang leh mi harsa zawkte a thlen phak leh phak loh kan chhut chian theihna turin ‘Social Development’ chungchang kan tarlante hi kan ngaihtuah chian a tha awm e. Ram hruaitute leh mithiamten an vei em em ram hmasawnna chungchangah zau zawka rilru kan sen zel theihna turin chhunzawm leh kan tum dawn nia.