Politician-ten thalaite ngaihsak bik nih an inchuh thin a, mahse thalaite vei tak tak leh an harsatna sut kian tuma tih takzet a hmala erawh kan hmu khat khawp mai. Mizo thalaite mamawh hi infiamna hmunhma tha leh zu thlah zalen te hi a ni ber lo a, kan thil tuipuite hi kan mamawh ber an ni fo lem lo. Thalaite mamawh zawk chu eizawnna/hna hi a ni a, hai rual lohin he harsatna hian kan ram a tuam mek a, hna thawh tur nei lo an tam chuan sualna a pung duh lehnghal. Chuvangin, hna thar siam tura hmalak hi a hun tak zet tawh. Sorkar hna a inbeng luh vek theih a ni lo tih hi kan inhrilh zing viau a, a dik chiah. Chu chuan eizawnna kawng dang siam belh te, hnathawk tlaka thalaite buatsaih te hi a tul ta tih a entir thung. Khawi ramah pawh employment problem a awmin (thalai hna zawngte ni loin) sorkarin mawh a phur thin. Hetia keinin sports lama hmala nasa apiang thalaite ngaihsak anga kan sawi thin lai hian sorkar laipui chuan India ram thalai rualte buaipui tak tak a tum mek a. Chumi atana sorkar thar hmalakna langsar tak mai chu 'Skill development' an tih hi a ni. Red Ford-a India independence day lawm tura pung khawm hmaah khan prime minister Narendhra Modi chuan, "Vawiin hian thalaite tan eizawnna hna a tam thei ang ber siamsak ka tum a...India hi thalaite ram a ni (mihring 65% hi kum 35 hnuai lam an ni). Thalaite heti khawpa tam hi kan hmang tangkai tur a ni dawn lawm ni? Khawvel hian hnathawk tlaka thiamna nei (Skilled workforce) a mamawh a, India pawhin 'skilled workforce' a mamawh a ni," a ti a. Thalai eizawnna hnathawh tur nei lo tam tak an awm mek lai hian hnathawk tlak tak taka thiam erawh an tam lo thung, a ti a, "Ram hmasawnna hawi zawnga ke pen tak tak tur chuan skilled development a ngai a, chu chu kan thupui ber a ni," a ti bawk. Mizoramah pawh hian hman tangkai loh thalai (lehkhathiam leh thiam lo) tam tak an awm. Thahrui nei zawk, thiam zawk leh fing zawk thalaite fuih phur a, anmahni kan hmang tangkai a nih loh chuan NLUP emaw project dang tha tak emaw pawh nei thin mah ila beisei anga a hlawhtling tak tak hi ka ring lem lo. Thalaite chakna leh theihna chhawr thiam ram apiangin hma an sawn thin a, ram hmasawn ho chanchinah hian thalaite pawimawh zia kan hmu thin. Keini pawh hian thalaite hmang tangkai thiam ram hruaitu kan neih hunah hma kan sawn zawtin ka ring fo thin. Kan hmel anpui deuh an nih vang pawh a ni maithei Singapore indin chhoh dan chanchin khi a ngaihnawm ka ti thin. Indopui pahnihna lai khan Japan-in a awp a, chumi hnuah British-in a awp leh a, indopui zawhah Malaya nen inzawmin Malaysia an din a, 1965-ah Malaysia atanga chhuakin mahni a ro inrel ram a lo ni ta a. Chuta tang chuan an president Lee Kuan Yew hoin theihtawpin an bei a, rei lo te ah khawvela ram hausa bera chhiar tlak an ni thei a ni. Chuta an hmalakna langsar ber pakhat chu thalai hnathawktute (labour force) chhawr tlaka buatsaih a ni. Ram danga pawh hnathawk tura tlawm taka chhawr theih labour an tam a, mahse Singaporean-ho chuan zirtirna tha tak an dawn avangin hna an thiam bik a, an thawk rim a, chhawr an manhla bik. Chutianga sorkarin skill development beihpui thlaka hma a lak avang chuan rei lo teah an ding chhuak mai a ni. Skill development-in a tum ber chu hnathawktute chhawr manhla taka buatsaih a, an theihna leh thiamna (Skill) tihpun hi a ni. Lehkhathiam sang ringawt hian hna an thiam kher lo a, kut themthiam tak hian hisap an nei tha bik kher lo a, tharum ngah tak hi an thawk sawt kher lo bawk. Hnathawk tha tur leh thawk hlawk tur chuan a thawktute thiamna leh finna tihpun a ngai a, uluk taka zirtirna pek an ngai. Chu chu skill development-in a tum chu a ni. Kut hnathawh kher a kawk lo a, hna chi hrang hrang hlawk zawk leh tha zawka thawk thei tura inzirtir hi a ni ber. Tunlai khawvel hmasawn chak zia kan hria a, hnathawhna hmanraw thar leh tih dan thar tha zawk lo chhuak zel hmang thiam tura inbuatsaih a, inzirtir a tul hle a, chuvangin, training mumal tak neih hi thil tul tak a ni. India sorkar hian skill development pawimawh zia hi a hre chiang a, tuna five year plan kal mek (12th plan) ah pawh hian hmalakna tur hrang hrang tarlan a ni a, National Skill Development Board leh Natioanal Skill Development Corporation-te din a ni a, kumin budget tharah pawh khan hmalakna tur thenkhat tarlan a nih kha. NASSCOM sawi dan chuan kumtin India ramah hian engineering graduate thar 400,000 an awm zel a, chung zinga za a 20 chauh chu industry a thawk tlak an ni. Chumi in a entir chu Skill development atana hmalak tak tak dawn chuan zirna kalphung pawh engemaw chen her danglam a ngai dawn tihna a ni. National Policy on Skill Development-in a ruahman dan chuan 2022 hian chhawr tlaka thiam (skilled labour) maktaduai 500 chher chhuah hman tum a ni. Hmalakna atan ram chhung hmun hrang hrangah eizawnna peng hrang hrang zirna/training-na hmun din belh zel tum a ni a, ITI leh vocational training centre awm sa thuam that a, a dang din zel tum a ni. Mizote hi pi leh pu hun lai atanga kut hnathawk nasa hnam kan ni a, mahse, tunah hi chuan sum hmuhna awlsam zawk a tam tak em avang hian a kum telin kut hnathawh ban santu an pung zel a ni. Chuvangin, eizawnna hna dang chi hrang hrang tha taka thawk thei tura kan inzirtir a, chumi atana hmalak chu a hun khawp mai. School atangin bul tan ila, mi rama an tih angin eizawnna lam hawi te hi zirlaiah telh ni se a tha viauin a rinawm. Ram dang sumdawng pawl (bank leh financial institution hrang hrang te, oil company te, telecommunication company hrang hrang - airtel, vodafone,etc.,) lo lut mekte hian hna hniam ber atanga hna sang tak thlenga thawk tlaka min ngaih tura kan inbuatsaih a hun hle a ni. An sawi fo thin India look east policy-te hi a hlawhtling zel a nih phei chuan chutiang mi chu mamawhna a sang tial tial ang. Sorkar laipuia ministry hrang hrangten skill development atana hma an lak dan te hi zir chiangin 'skill upgrading programme' leh 'self-employment scheme' an siam te hi kan ramah a theih ang anga tih ve ni se. Zirna in behchhanin Vocational institution hrang hrangte din belh a, thingtlang miten an hman tangkai ve turin hmun kilkhawr zawkah te (Zirna in behchhan kher lo pawhin) din ni se. Hetiang zawnga sorkarin thapui thawha hma a lak phawt chuan Singapore thalaite ang khian Mizo thalaite hi eng hnathawkah pawh kan rintlak anga, hna kan thiam anga, hnam dang aiin kan chhawr tlak zawk ang. A tawi zawngin, Life Skill Development beihpui thlak mek sorkar laipui rinchhan hian Mizo thalaite chhanchhuah hna a thawh a hun hle a ni.